បើតាមការប្រកាសរបស់ FAS កម្មវិធីថ្មីមួយឈ្មោះថា FAS Players’ Concierge​ បង្កើតឡើងដើម្បីគាំទ្រជីវភាពរស់នៅរបស់កីឡាករដែលកំពុងលេងឱ្យក្រុមជម្រើសជាតិសិង្ហបុរីនាពេលបច្ចុប្បន្ន​ នៅពេលពួកគេចូលនិវត្តន៍។ ការផ្តួចផ្តើមគំនិតថ្មីរបស់ FAS នឹងដឹកនាំដោយអតីតកីឡាករជម្រើសជាតិសិង្ហបុរី លោក Baihakki Khaizan។

​ស្ថិតនៅក្នុងសិក្ខាសាលា UEFA Career Assist Workshop នៅក្នុងប្រទេសសិង្ហបុរីពីថ្ងៃទី២១ ដល់ថ្ងៃទី២២ លោក ​Baihakki បាននិយាយថា គម្រោងនៃការផ្តួចផ្តើម ដើម្បីផ្តល់អំណាចដល់កីឡាករ និងផ្តល់ទិសដៅថ្មីសម្រាប់ពួកគេ នៅពេលពួកគេឈានដល់ដំណាក់កាលបញ្ចប់អាជីពបាល់ទាត់។
 

«យើងមិននៅទីនោះដើម្បីកំណត់ជីវិតរបស់ពួកគេទេ យើងចង់លើកទឹកចិត្តពួកគេឱ្យឆ្លងកាត់ដំណើរផ្លូវជីវិតទាំងនេះ ដើម្បីឱ្យពួកគេមានភាពល្អប្រសើរ។»។ លោក Baihakki បាននិយាយបែបនេះ។
 

គម្រោង FAS Players’ Concierge បង្កើតលើទិដ្ឋភាពពីរនៃកម្មវិធីសុខុមាលភាពកីឡាករជម្រើសជាតិ តាមរយៈការលើកទឹកចិត្តជាសាច់ប្រាក់ និងជាអាហារូបករណ៍សម្រាប់កីឡាករជម្រើសជាតិ ក្នុងការសិក្សាបន្ថែមអំពីកីឡាបាល់ទាត់នៅលើឆាកអន្តរជាតិ។ 
  

 

FAS Players’ Concierge មានគំនិតផ្តួចផ្តើមជាគោលចំនួន ៦ រួមមាន ប្រាក់រង្វាន់អន្តរជាតិ, ឥណទានអាហារូបករណ៍, ឱកាសការងារ, ភាពជាដៃគូអប់រំ, ការហ្វឹកហាត់ និងការគាំទ្រពីក្រៅប្រទេស។ គម្រោងជាគោលទាំងអស់មានបំណងសម្រាប់ដោះស្រាយតម្រូវការ និងកង្វល់របស់កីឡាករបាល់ទាត់អាជីពដែលកំពុងស្វែងរកការផ្លាស់ប្តូរអាជីពលើវាលស្មៅ។
 

បើតាមសម្តីលោក Baihakki  គោលដៅរយៈពេលវែងនៃគំនិតផ្តួចផ្តើម FAS Players’ Concie ដើម្បីបង្ហាញឪពុកម្តាយរបស់កីឡាករបាល់ទាត់ជំនាន់ក្រោយ រួមទាំងកីឡាករផ្ទាល់កាន់តែមានភាពកក់ក្តៅ ក្នុងអាជីព និងក្រោយបញ្ចប់អាជីពជាកីឡាករបាល់ទាត់របស់ពួកគេ៕