ជាតិ
បទយកការណ៍ / បទសម្ភាសន៍
វីដេអូ
លោក សេង វិសុទ្ធ ថាការបង្កើតរូបភាពដែលបង្កប់សំណើច អាចធ្វើឱ្យកុមារកាន់តែស្និទ្ធនឹងសៀវភៅ
× ភ្នំពេញ៖ គំនូរគឺជាផ្នែកដ៏សំខាន់មួយ ទាក់ទាញកុមារនិងយុវជន ឱ្យចង់ចាប់កាន់សៀវភៅ មុនពេលពួកគេបន្តចង់ដឹងសាច់រឿងបន្ថែម នៅក្នុងសៀវភៅនោះ។ ទោះជាយ៉ាងណា ការគូរគំនូរក្នុងសៀវភៅកុមារ ត្រូវបានបែងចែកតាមកម្រិតអាយុកុមារ ក៏ដូចជាប្រភេទគំនូរផងដែរ។ លោក សេង វិសុទ្ធ អ្នករចនាក្រាហ្វិក និងជាវិចិត្រករ បានប្រាប់សារព័ត៌មានថ្មីៗថា មុនពេលដែលកុមារចាប់អារម្មណ៍លើអត្ថបទ កុមារមើលនិងចាប់អារម្មណ៍លើរូបភាពមុន។ ដូច្នេះសម្រាប់វិចិត្រកររូបនេះ តែងតែព្យាយាមរិះរកគំនិតច្នៃប្រឌិតសម្រាប់របស់ខ្លួន និងបញ្ចូលសកម្មភាពដែលបង្កប់នូវសំណើចក្នុងគំនូរនោះផង ដើម្បីទាក់ទាញចិត្តកុមារ ឱ្យចូលចិត្ត ឬស្និទ្ធស្នាលនឹងសៀវភៅ។
ដើម្បីជ្រាបច្បាស់ សូមអញ្ជើញលោកអ្នកនាង តាមដានកិច្ចសម្ភាសរវាង កញ្ញា ប៉ូ សាគុន អ្នកសារព័ត៌មាននៃសារព័ត៌មានឌីជីថលថ្មីៗ និងលោក សេង វិសុទ្ធ អ្នករចនាក្រាហ្វិក និងវិចិត្រករគូររូបសម្រាប់សៀវភៅកុមារ ដូចតទៅ៖
បើតាម លោក សេង វិសុទ្ធ កុមារមានការសម្គាល់របស់ខ្លួន ពេលដែលពួកគេមើលរូបភាព បន្ទាប់មកគេចាប់ផ្ដើមឆ្ងល់ ហើយចង់ដឹងថា អត្ថបទនៅខាងក្នុងនោះសរសេរយ៉ាងណា ទើបបានជារូបភាពទាំងនោះ ធ្វើសកម្មភាពបែបនោះ។ សៀវភៅមួយក្បាល ដែលអាចទាក់ទាញចិត្តកុមារបាន ទាល់តែសៀវភៅនោះមានរូបភាពល្អ ដែលមើលទៅឃើញច្បាស់ ហើយកុមារអាចមើលយល់។ «ដូចជាសៀវភៅ “សោភា សាលារៀន និងសួនកុមារ” រឿងនេះអ្នកនិពន្ធមិនបានសរសេរថា មានកណ្ដុរទេ។ នៅពេលខ្ញុំអានរឿងនេះទៅ វាដូចសាមញ្ញពេក ដូច្នេះខ្ញុំបង្កើតឱ្យមានកណ្ដុរ២ មាននៅគ្រប់ទំព័រចាំមើលសកម្មភាពរបស់ក្មេងនោះ។ តាមពិតក្មេងពេលមើលអ្វីមួយ គាត់មានការសម្គាល់របស់គាត់។ ដូច្នេះយើងបង្កើតអ្វីមួយឱ្យគាត់ចាប់អារម្មណ៍»។ នេះជាការពន្យល់របស់លោក សេង វិសុទ្ធ។
លោក សេង វិសុទ្ធ ត្រូវការពេលគូររូប និងរចនាក្រាហ្វិច ចន្លោះពី៣សប្ដាហ៍ទៅមួយខែ សម្រាប់សៀវភៅកុមារមួយក្បាល។ ប៉ុន្តែប្រសិនកុមារនោះ មានអាយុចាប់ពី៦ឆ្នាំឡើង រហូតដល់១២ឆ្នាំ លោកត្រូវការពេលលើសនោះ ដោយសារតែគំនូរទាំងនោះ ត្រូវគូរលម្អិតជាងកុមារអាយុចាប់ពី០ឆ្នាំ ដល់៦ឆ្នាំ។ បន្ថែមពីនោះ បុរសសម្បុរស្រអែមមុខមូលរូបនេះ សង្កត់ធ្ងន់ថា ដើម្បីគូរគំនូរឱ្យមានភាពទាក់ទាញ ដល់អ្នកអាន ពិសេសកុមារ វិចិត្រករត្រូវតែមានគំនិតច្នៃប្រឌិតដោយខ្លួនឯង ដោយផ្អែកលើចំណេះដឹងទូទៅ ដែលខ្លួនបានជួបប្រចាំថ្ងៃ៕
Tag:
តោះយើងអានជុំគ្នា
អប់រំ
អំណាន
គំនូរ
កុមារ
សៀវភៅ
សៀវភៅកុមារ
© រក្សាសិទ្ធិដោយ thmeythmey.com