ភ្នំពេញ៖ ក្រសួងវប្បធម៌និងវិចិត្រសិល្បៈ នឹងរៀបចំមហោស្រពជាតិសិល្បៈចម្លាក់ស្មិត ឆ្នាំ២០២៣ ក្រោមប្រធានបទ “ក្បាច់គុនបុរាណខ្មែរល្បុក្កតោ” ក្នុងគោលបំណងជំរុញ និងលើកទឹកចិត្តដល់សិល្បករ សិប្បករ ក្នុងការអភិវឌ្ឍសមត្ថភាព និងការបង្កើតគំនិតច្នៃប្រឌិត ដើម្បីរួមចំណែកអភិរក្ស និងអភិវឌ្ឍន៍វិស័យសិល្បៈសូនរូប និងសិល្បៈសិប្បកម្មឱ្យបានគង់វង្ស។
កម្មវិធីមហោស្រពជាតិសិល្បៈចម្លាក់ស្មិត ឆ្នាំ២០២៣ ក្រោមប្រធានបទ “ក្បាច់គុនបុរាណខ្មែរល្បុក្កតោ” នឹងប្រព្រឹត្តទៅរយៈពេល៣ថ្ងៃ ចាប់ពីថ្ងៃទី១៦-១៨ ខែវិច្ឆិកា ឆ្នាំ២០២៣ នៅបរិវេណបណ្ណាល័យជាតិ រាជធានីភ្នំពេញ។
រាល់ស្នាដៃទាំងអស់ ដែលដាក់ចូលរួមប្រកួតប្រជែង ក្នុងមហោស្រពជាតិសិល្បៈចម្លាក់ស្មិតឆ្នាំ២០២៣ បេក្ខជន បេក្ខនារីត្រូវមានសញ្ជាតិខ្មែរ។ ទំហំស្នាដៃដែលត្រូវចូលរួមប្រកួតប្រជែង កម្ពស់រូបចម្លាក់សរុប៦០សម ដោយបូករួមទាំងជើងទម្រ៥សម។
ស្នាដៃត្រូវបង្កើតនៅក្នុងឆ្នាំ២០២៣ ជាទម្រង់បុរាណឬសម័យក៏បាន។ រាល់ស្នាដៃចម្លាក់ ដែលដាក់មកប្រកួត ត្រូវតែមិនធ្លាប់យកទៅ ដាក់តាំងបង្ហាញនៅកន្លែងដទៃ។ អត្ថន័យឆ្លុះបញ្ចាំងពីទិដ្ឋភាព ដែលបង្កប់នូវក្បាច់គុនបុរាណខ្មែរ ជាអត្តសញ្ញាណសិល្បៈជាតិ។ ភាពច្នៃប្រឌិត សោភ័ណភាព និងប្រណីតភាព ផ្ដោតលើភាពប៉ិនប្រសប់ ប្រកបដោយទេពកោសល្យខ្ពស់ របស់សិល្បករ ដោយបង្កប់នូវបច្ចេកទេសរស់រវើក។
បេក្ខជន-នារី ត្រូវភ្ជាប់ទៅជាមួយពាក្យសុំចូលរួមប្រឡង១ច្បាប់។ ប្រវត្តិរូបសង្ខេប១ច្បាប់ រូបថត៤x៦ ២សន្លឹក។ លិខិតបញ្ជាក់ទីលំនៅ ឬអត្តសញ្ញាណបណ្ណថតចម្លង(ផ្លូវការ)១សន្លឹក។
សាធារណជនដែលចាប់អារម្មណ៍ អាចដាក់ពាក្យនៅមន្ទីរវប្បធម៌ និងវិចិត្រសិល្បៈ រាជធានី-ខេត្ត ឬនៅនាយកដ្ឋានសិល្បៈសូនរូប និងសិល្បៈសិប្បកម្ម (ទីស្ដីការក្រសួងវប្បធម៌ និងវិចិត្រសិល្បៈ)។ ការទទួលស្នាដៃរបស់បេក្ខជន-នារី ចាប់ពីថ្ងៃជូនដំណឹងរហូតដល់ថ្ងៃទី១៦ខែតុលា ឆ្នាំ២០២៣ នៅនាយកដ្ឋានសិល្បៈសូនរូប និងសិល្បៈសិប្បកម្ម ដែលស្ថិតនៅទីស្ដីការក្រសួងវប្បធម៌ និងវិចិត្រសិល្បៈ។
គណៈកម្មការពិនិត្យ និងវាយតម្លៃ នៅថ្ងៃទី២៣ ខែតុលា ឆ្នាំ២០២៣។ ប្រារព្ធពិធីមហោស្រពសិល្បៈជាតិ នៅថ្ងៃទី១៦ខែវិច្ឆិកា ឆ្នាំ២០២៣។ អ្នកជាប់ចំណាត់ថ្នាក់លេខ១ នឹងទទួលបានទឹកប្រាក់ចំនួន ៤,០០០,០០០រៀល អមដោយប័ណ្ណជយលាភី។ ចំណាត់ថ្នាក់លេខ២ ទទួលបានទឹកប្រាក់ ៣,០០០,០០០រៀល អមដោយប័ណ្ណជយលាភី។ ចំណាត់ថ្នាក់លេខ៣ ទទួលបានទឹកប្រាក់ ២,៥០០,០០០រៀល អមដោយប័ណ្ណជយលាភី។ រង្វាន់លើកទឹកចិត្ត ទឹកប្រាក់ចំនួន ៨០០,០០០រៀល អមដោយលិខិតថ្លែងអំណរគុណ។
សម្រាប់ព័ត៌មានលម្អិត សូមទាក់ទងមន្ទីរវប្បធម៌ និងវិចិត្រសិល្បៈរាជធានី-ខេត្ត ឬនាយកដ្ឋានសិល្បៈសូនរូប និងសិល្បៈសិប្បកម្ម តាមរយៈទូរសព្ទលេខ ០១២ ៦១ ៦៥ ៤៥ ឬ ០១២ ៨៣ ២២ ២៨ ឬ០១២ ៧៧ ៧៩ ២៨ ឬ ០១២ ៨៧ ៧៣ ១៨។ និងតាមរយៈ Email:
[email protected] ឬ
[email protected] ឬ
[email protected] ។
ចំពោះសិល្បករ សិប្បករដែលមានបំណង ចង់ដាក់តាំងពិព័រណ៍បង្ហាញស្នាដៃសិល្បៈសូនរូប និងសិល្បៈសិប្បកម្មចម្រុះរបស់ខ្លួន សូមយកទៅនៅថ្ងៃទី១៥ ខែវិច្ឆិការ ឆ្នាំ២០២៣ នៅបរិវេណបណ្ណាល័យជាតិ រាជធានីភ្នំពេញ។
សូមបញ្ជាក់ថា នៅថ្ងៃមហោស្រព កម្មវិធីគ្រោងទទួលបានស្ដង់សិល្បៈសូនរូប ចំនួន៦០ស្ដង់ ដែលមានគំនូរ ចម្លាក់ សូត្រ និងវត្ថុសិល្បៈជាច្រើនទៀត ដើម្បីដាក់លក់ជូនសាធារណជន៕