ភ្នំពេញ៖ ព្រឹទ្ធាចារ្យស្ថាបត្យករ លុយ បានហាប់ បានទទួលមរណភាព កាលពីវេលាម៉ោង១៦និង១៥នាទីល្ងាច ថ្ងៃទី២៥ ខែមិថុនា ឆ្នាំ២០២៣ នាទីក្រុងប៉ារីស ប្រទេសបារាំង ក្នុងជន្មាយុ៩២ឆ្នាំ ដោយជរាពាធ។ នេះបើតាមលោក វីរៈ វ៉ារ៉ានី ប្រធានក្រុមដំណើរខ្មែរ។
ដំណើរខ្មែរ ជាក្រុមយុវជនស្ម័គ្រចិត្ត ដែលបំពេញបេសកកម្មលើការស្រាវជ្រាវ ចងក្រង និងផ្សព្វផ្សាយនូវឯកសារភាពយន្ត ចម្រៀងក្នុងសម័យយុគមាស សាវតាព្រះរាជវង្សានុវង្ស រួមទាំងព្រឹត្តិការណ៍ប្រវត្តិសាស្រ្តផ្សេងៗ។ ទាក់ទងនឹងព័ត៌មានមរណភាពព្រឹទ្ធាចារ្យ លុយ បានហាប់ គឺលោក វីរៈ វ៉ារ៉ានី អះអាងថា លោកបានឆ្លើយឆ្លងតាមទូរសព្ទជាមួយអ្នកស្រី មាស មន្តា ត្រូវជាក្មួយស្រីរបស់ព្រឹទ្ធាចារ្យ លុយ បានហាប់។
លោក វីរៈ វ៉ារ៉ានី បញ្ជាក់បន្ថែម៖«ខ្ញុំទើបតែបានជជែកទូរសព្ទជាមួយគាត់ [អ្នកស្រី មាស មន្តា]។ ពិធីបុណ្យសព កំពុងរៀបចំតាមប្រពៃណី។ ហើយដំណឹងនៃបុណ្យសព អត់ទាន់បញ្ជាក់ថា ធ្វើពិធីបូជា ឬបញ្ចុះទេ»។
ឆ្លៀតក្នុងឱកាសនេះ លោក វីរៈ វ៉ារ៉ានី ក៏ចង់បញ្ជាក់ថា ព្រឹទ្ធាចារ្យ លុយ បានហាប់ ពុំបានជាប់សាច់ឈាមជាមួយ ព្រឹទ្ធាចារ្យ វណ្ណ មូលីវណ្ណ ដូចជាការលើកឡើងមួយចំនួននោះឡើយ ដោយព័ត៌មាននេះ មានការបញ្ជាក់ពីអ្នកស្រី មាស មន្តា ត្រូវជាក្មួយស្រីសព។
«លោកអ៊ំ ហាប់ មិនមែនជាគ្រួសារ ឬក៏ជាសាច់ញាតិ របស់លោកអ៊ំ វណ្ណ មូលីវណ្ណ ទេ។ ព្រោះអីមុននេះអ្នកមីង [អ្នកស្រី មាស មន្តា] គាត់ហៅទូរសព្ទមកខ្ញុំ ប្រាប់រឿងហ្នឹង។ គ្រាន់តែថាលោកអ៊ំ វណ្ណ មូលីវណ្ណគាត់គឺជារៀមច្បង។ អ្នកមីង មាស មន្តា ដែលត្រូវជាក្មួយស្រីរបស់លោកអ៊ំ លុយ បានហាប់ ក៏ត្រូវជាប្អូនថ្លៃរបស់លោក គង់ សំអឿន ដែរ។ នេះជាការពន្យល់បន្ថែមរបស់លោក វ៉ារ៉ានី។
សូមបញ្ជាក់ថា ក្នុងសម័យសង្គមរាស្រ្តនិយម ព្រឹទ្ធាចារ្យ លុយ បានហាប់ គឺជាស្ថាបត្យករខ្មែរមួយរូបដែលបានគូរប្លង់ និងចូលរួមកសាង សណ្ឋាគារខេមបូឌីយ៉ាណា រាជដំណាក់ព្រះគន្ធបុប្ផា នៅក្នុងវិមានរដ្ឋចម្ការមន អគារសាលាខេត្តកណ្តាល រោងកុនចេនឡា អគារប៊ូឌីង(អគារស បច្ចុប្បន្នត្រូវបានវាយកម្ទេចចោលហើយ) វិទ្យាល័យទួលស្វាយព្រៃ(បច្ចុប្បន្នគឺជាសារមន្ទីរជាតិទួលស្លែង) មណ្ឌលកីឡាខេត្តបាត់ដំបង អគារសាកលវិទ្យាល័យភូមិន្ទកំពង់ចាម និងព្រះរាជដំណាក់លើភ្នំគិរីរម្យជាដើម។
ជាមួយគ្នានេះ គុណសម្បត្តិដ៏សំខាន់មួយទៀត កាលពីឆ្នាំ១៩៦០ សម្តេចព្រះនរោត្តមសីហនុ បានចេញព្រះរាជបញ្ជា ចាត់តាំងឲ្យលោកព្រឹទ្ធាចារ្យ ដឹកនាំបង្កើតមន្ទីរសាងសង់លំនៅដ្ឋាន និងរៀចំគម្រោងប្លង់នៃសាលារាជធានីភ្នំពេញ ដោយលោកអភិបាលរាជធានី ទេព ផន បានផ្តល់ឲ្យលោកនូវសេរីភាពពេញទី ដើម្បីធ្វើទំនើបកម្មគម្រោងរៀបចំទីក្រុង។
លោក លុយ បានហាប់ ជាមួយនឹងបុគ្គលិក១២នាក់ បានគ្រប់គ្រងអ្វីគ្រប់យ៉ាង រាប់តាំងពីនគរូបនីយកម្ម ដល់ការរចនានិងថែរក្សាសួនច្បារសាធារណៈ ការគ្រប់គ្រងសំណល់ ភ្លើងបំភ្លឺតាមចញ្ចើមផ្លូវ ការផ្គត់ផ្គង់ថាមពល និងការអនុញ្ញាតការសាងសង់។ រាជធានីដ៏ចំណាស់មួយ ដែលជាបេះដូងនៃជាតិ បានប្រែមុខមាត់ថ្មី ក្រោមការដឹកនាំរបស់លោក លុយ បានហាប់។ នេះបើតាម ទំព័រហ្វេសប៊ុក ដំណើរខ្មែរ៕