កញ្ញា ឃន លាងអេង ជាអ្នកចូលចិត្តដើរព្រៃ​និងមានបំណងផ្សព្វផ្សាយតំបន់ទេសចរណ៍នានា ដែលជាទីទាក់ទាញទេសចរ ដូចជា តំបន់ជួរភ្នំក្រវ៉ាញ ភ្នំខ្នងផ្សារ តំបន់ភ្នំឱរ៉ាល់ តំបន់អារ៉ែង ភូមិភាគឦសាន និងតំបន់សមុទ្រផងដែរ។ ដំណើរផ្សងព្រេងបោះតង់ គឺជាក្តីស្រមៃ របស់យុវតីវ័យ២១ឆ្នាំរូបនេះ ដោយបានសម្រេចបំណងក្នុងឆ្នាំ២០១៩។
  

ក្នុងចំណោមបេសកកម្មរបស់ នារីចល័តចរ បទពិសោធឡើងភ្នំដែលកញ្ញាទទួលបានច្រើនជាងគេ គឺការឡើងភ្នំខ្នងផ្សារ មានចំនួន ៣០ដង។ នេះជាចំនួនច្រើនជាងគេ ក្នុងចំណោមការដើរលេងតាមតំបន់ទេសចរណ៍កន្លងមក។ ការឡើងភ្នំខ្នងផ្សារទាំង ៣០ដងគឺមានមួយដង កញ្ញាដើរឡើងភ្នំតែម្នាក់ឯង ក្រៅពីនេះកញ្ញាឡើងភ្នំជាក្រុម និងជាមួយ​ដៃគូរបស់កញ្ញា។

 

នារីចល័តចរ រៀបរាប់ប្រាប់សារព័ត៌មានThmeyThmey25 ថាការឡើងភ្នំ គឺជារឿងធម្មតា សម្រាប់អ្នកមានបទពិសោធដើរព្រៃច្រើនឆ្នាំ។ ចំពោះ កញ្ញាការដើរព្រៃម្នាក់ឯង និងជាក្រុម គឺខុសគ្នាត្រង់ទៅម្នាក់ឯង ត្រូវស្ពាយអីវ៉ាន់ច្រើន ដោយឡែកការដើរជាក្រុម អាចចែករំលែកសម្ភារៈពេលឡើងភ្នំបាន។ ប៉ុន្តែ ការផ្សងព្រេងម្នាក់ឯង លាងអេង ទទួលបានបទពិសោធថ្មី ចេះដោះស្រាយបញ្ហា ហើយក៏ធ្វើឱ្យយើងរឹងមាំជាងមុន។
 

«កាលខ្ញុំឡើងខ្នងផ្សារលើកទី១​អាចនិយាយបានថានៅថ្មីពេក ធ្វើឱ្យយើងហត់អស់កម្លាំងខ្លាំង។ បើសួរថាខ្ញុំចង់សាកល្បងទៀតឬទេ? ច្បាស់ណាស់ខ្ញុំនៅតែចង់សាកល្បងដដែលៗ រហូតមកដល់ឥឡូវ ហាក់ដូចជាមិនខ្លាចរអាល លើការឡើងខ្នងផ្សារបន្តិចសោះឡើយ។ ខ្ញុំមានអារម្មណ៍ថា ខ្នងផ្សារ បានទាក់ចិត្តរបស់ខ្ញុំ ដោយសារទេសភាព ដែលមិនចេះជិនណាយ»។ កញ្ញា ឃន លាងអេង បញ្ជាក់បែបនេះលាយឡំនឹងសំឡេងសើចបន្តិច។
 

និយាយដល់ការដើរព្រៃលើកដំបូង ហត់ខ្លាំងពិតមែន ប៉ុន្តែនេះមិនមែនជាឧបសគ្គសម្រាប់ លាងអេង ឡើយ។ កញ្ញា បន្តទៀតថា  អំឡុងបោះតង់ក្នុងព្រៃ អ្វីដែលបារម្ភនោះ គឺពេលងូតទឹក ការផ្លាស់សម្លៀកបំពាក់ ​ដែលត្រូវការពេលវេលាផ្ទាល់ខ្លួន។ បើនិយាយពីការធ្វើដំណើរតាមផ្លូវ គឺមិនបារម្ភអ្វីនោះទេ។

 

កញ្ញា បានចំណាយពេលឡើងភ្នំខ្នងផ្សារចំនួន ៤ម៉ោង​ ចំណែកពេលខ្លះលាងអេង ក៏ដាក់បេសកកម្មឡើងភ្នំខ្នង​ផ្សារវិលល្ងាច ការឡើងកំណត់ម៉ោង និងឡើងភ្នំពេលយប់ក៏មាន។ បើទោះបី នេះជាការឡើងភ្នំចំនួន ៣០ដងពិតមែន តែ ឃន លាងអេង នៅតែមានបំណងឡើងខ្នងផ្សាបន្តទៀត។ យុវតីរូបនេះ​ បន្ថែមថា  បើទោះទៅដល់ខ្នងផ្សាក្នុងកាលៈទេសៈណាក៏ដោយ​ តែទេសភាពនៅតែស្រស់គ្រប់ពេល។ នារដូវប្រាំង ស្មៅនៅខ្នងផ្សារប្រែជាពណ៌មាស ចំណែករដូវវស្សា បានប្រែក្លាយជាពណ៌បៃតងខ្ចី អមដោយខ្យល់អាកាសត្រជាក់ៗ។
 

ជាង៤ឆ្នាំមកនេះ កញ្ញា ឃន លាងអេង តែងបង្ហាញភាពអស្ចារ្យនៃតំបន់ទេសចរណ៍ មួយចំនួនដែលធម្មជាតិបង្កើតឡើងយ៉ាងប្រណិត។ បន្ទាប់ពីដើរលេងជាច្រើនកន្លែងកញ្ញា លាងអេង បានបង្កើតទំព័ហ្វេសប៊ុក និងគណនី TikTok មានឈ្មោះ នារីចល័តចរ ដើម្បីផ្សព្វផ្សាយពីតំបន់ទេសចរណ៍ក្នុងប្រទេសកម្ពុជា៕