ការឃោសនាបោះឆ្នោត នឹងប្រព្រឹត្តទៅ ចាប់ពីថ្ងៃទី១ខែកក្កដា ដល់២១ខែកក្កដា។ ចំពោះការហែក្បួនឃោសនាទ្រង់ទ្រាយធំ គឺមិនរាប់បញ្ចូលការដើរចែកខិតិប័ណ្ណតាមផ្ទះ និងការជួបប្រជុំតាមការិយាល័យបក្សឡើយ។ 

 

ទម្រង់ដែលចាត់ទុកជាការហែក្បួនឃោសនាទ្រង់ទ្រាយធំ មាន៣ទម្រង់។ ទីមួយ មានអ្នកនាំទ្រ និងសមាជិកបក្ស ដើរហែចាប់ពី២០នាក់ឡើងទៅ អមដោយឃោសនស័ព្ទ(មេក្រូ) រួមទាំងមានការចាក់ភ្លេងឬប្រគំតន្ត្រី។ ទីពីរ អ្នកគាំទ្របក្ស ហែដោយរថយន្តពីរគ្រឿង រួមនឹងម៉ូតូ១០គ្រឿង។ ទីបី ការហែមានទោចក្រយានលើសពី២០គ្រឿង។ នេះបើតាមការបញ្ជាក់របស់លោក ហង្ស ពុទ្ធា ហើយបន្ថែមថា តាមដងទន្លេ ទូកឬកាណូត ដែលបានចូលរួមហែបក្សចាប់ពីចំនួនពីរទូកឡើងទៅ ក៏ត្រូវរាប់ចូលជាការហែទ្រង់ទ្រាយធំដូចគ្នា៕