រដ្ឋបាលខេត្តពោធិ៍សាត់ បានចេញសេចក្ដីបំភ្លឺ កាលពីថ្ងៃទី២៧ ខែមិថុនា ឆ្នាំ២០២៣ថា ព្រះពុទ្ធរូបផ្ចាញ់មា១ព្រះអង្គ ស្ថិតនៅក្នុងបរិវេណវត្តវាល ភូមិផ្សារលើ សង្កាត់លលកស ក្រុងពោធិ៍សាត់ ខេត្តពោធិ៍សាត់ ពិតជាមានលក្ខណៈមិនស្អាតល្អមែន។ ទាក់ទងនឹងការបែបនេះ លោក សេង សុមុនី អ្នកនាំពាក្យក្រសួងធម្មការ និងសាសនា ស្នើឱ្យគណៈកម្មការវត្ត ជាពិសេសព្រះចៅអធិការ ត្រូវដឹងឱ្យច្បាស់ពីជំនាញ និងបទពិសោធរបស់ជាងសាងសង់។
ក្នុងសេចក្តីបំភ្លឺរបស់ខ្លួន រដ្ឋបាលខេត្តពោធិ៍សាត់បន្ថែមថា តាមរយៈការចុះពិនិត្យស្រាវជ្រាវ និងវាយតម្លៃរបស់មន្ទីរធម្មការ និងសាសនាខេត្ត ព្រះពុទ្ធរូបផ្ចាញ់មា១ ព្រះអង្គនោះ ត្រូវបានកសាងឡើងតាំងពីឆ្នាំ២០០៩មកម្ល៉េះ ក្រោមការផ្ដួចផ្ដើមរបស់ព្រះចៅអធិការវត្តវាល ព្រះនាម ជុំ សារឿន ស្ថិតនៅភូមិផ្សារលើ សង្កាត់លលកស ក្រុងពោធិ៍សាត់។
យោងតាមព្រះចៅអធិការវត្តវាល ការកសាងព្រះពុទ្ធរូបផ្ចាញ់មានេះបានប្រើប្រាស់ជាងដែលមានចំណេះដឹងតិចតួច និងបច្ចេកទេសសូន្យរូបនៅមានកម្រិត ពុំត្រឹមត្រូវតាមក្បួនខ្នាត ដែលមានការខុសឆ្គងខ្លះៗ។ តាមការពិនិត្យជាក់ស្ដែង បើមើលចំពីមុខព្រះភក្តព្រះអង្គ ពិតជាមានទម្រង់សមរម្យជាងមើលពីចំហៀង។
រដ្ឋបាលខេត្តពោធិ៍សាត់ នឹងណែនាំដល់មន្ទីរជំនាញ សហការជាមួយអ្នកបច្ចេកទេស និងព្រះចៅអធិការវត្ត ដើម្បីបន្តពិនិត្យ និងវាយតម្លៃឱ្យបានល្អិតល្អន់ នូវចំណុចខ្វះខាត ឆ្គាំឆ្គងណាដែលគួរកែលម្អឱ្យបានសមរម្យ។
លោក សេង សុមុនី អ្នកនាំពាក្យក្រសួងធម្មការនិងសាសនា បានណែនាំដល់ជាងទាំងអស់នៅទូទាំងប្រទេស ថាប្រសិនមិនទាន់មានចំណេះដឹងច្បាស់លាស់ លើខ្នាតឬទម្រង់នៃរូបព្រះពុទ្ធបដិមា ត្រូវតែសិក្សាស្រាវជ្រាវឱ្យបានច្បាស់លាស់ មុនពេលសាងសង់។
អ្នកនាំពាក្យរូបនេះ ក៏បានសំណូមពរដល់ ព្រះចៅអធិការវត្តទាំងអស់ផងដែរ ថាប្រសិនព្រះអង្គចង់កសាងព្រះពុទ្ធរូប សម្រាប់តម្កល់ទុកក្នុងវត្ត សូមព្រះអង្គសិក្សាពីខ្នាតព្រះពុទ្ធបដិមាឱ្យបានច្បាស់ មុនឱ្យជាងសាងសង់។
លោក សេង សុមុនី ពន្យល់បន្ថែម៖«សំណង់ដែលបានកសាងហើយ ពាក់ព័ន្ធនឹងវប្បធម៌ និងជាមរតករបស់ជាតិ ដូច្នេះមុននឹងសាងសង់ ជាងត្រូវតែសិក្សាស្រាវជ្រាវឱ្យបានច្បាស់លាស់។ នៅសាលាភូមិន្ទវិចិត្រសិល្បៈ គេបានបង្រៀនពីខ្នាតរូបដំណាកផ្សេងៗ តាមក្បូនខ្នាតច្បាស់លាស់ណាស់ ដូច្នេះជាងទាំងឡាយត្រូវស្រាវជ្រាវក្បួនខ្នាតទាំងនោះ ឱ្យបានច្បាស់លាស់។ ព្រះសង្ឃក៏ដូចគ្នា សូមព្រះសង្ឃមុនជ្រើសរើសជាងឱ្យសាងសង់ ត្រូវច្បាស់ថាជាងទាំងនោះ មានជំនាញច្បាស់លាស់»។
យ៉ាងណាក៏ដោយ លោក សេង សុមុនី បានលើកឡើងថា កន្លងមកការសាងសង់រូបព្រះពុទ្ធបដិមា នៅទូទាំងប្រទេស បានស្អាតល្អច្រើន ប៉ុន្តែលោកក៏ទទួលស្គាល់ដែរ ថានៅតែមានការឆកល្វែងមួយចំនួនតូច។ លោកស្នើដល់សាធារណជន ក៏ដូចជាអ្នកសារព័ត៌មាន ព្យាយាមផ្សព្វផ្សាយពីចំណុចល្អ ឱ្យបានច្រើន។ ចំពោះចំណុចមិនល្អវិញ លោកសំណូមពរឱ្យសាធារណជន ផ្ដល់មតិរិះគន់បែបស្ថាបនា។
សូមបញ្ជាក់ថា ព្រះពុទ្ធបដិមា ដែលរកការរិះគន់ ស្ថិតក្នុងខេត្តពោធិ៍សាត់នោះ កើតចេញជារូបរាងឡើង ដោយកម្លាំងសាមគ្គីរបស់សប្បុរសជនខ្មែរ ដែលមានសទ្ធាជ្រះថ្លា ក្នុងវិស័យព្រះពុទ្ធសាសនា។ ព្រះពុទ្ធបដិមានោះ មានកម្ពស់២៩ម៉ែត្រ ព្រះភ្នែន២១ម៉ែត្រ៕