អាជ្ញាធរទេសចរណ៍ រងការអាម៉ាសយ៉ាងខ្លាំង ដោយសារតែភ្នាក់ងារពាណិជ្ជកម្ម បានយករូបភាពពីប្រទេសផ្សេង ដាក់បញ្ចូលក្នុងវីដេអូ ហើយបញ្ជាក់ថា ស្ថិតនៅក្នុងប្រទេសហ្វីលីពីន។ វីដេអូនោះ គឺជាការផ្សព្វផ្សាយដើម្បីទាក់ទាញទេសចរទៅកាន់ជាតិដែនកោះមួយនេះ នាវិស្សមកាល។ 

 

ភ្នាក់ងារផ្សាយពាណិជ្ជកម្ម DDB Philippines បានចេញមុខសុំទោសជាសាធារណៈចំពោះការប្រើប្រាស់រូបភាពមិនត្រឹមត្រូវ ក្នុងវីដេអូផ្សព្វផ្សាយទេសចរណ៍ហ្វីលីពីន។ ក្នុងចំណោមរូបភាពទាំងនោះ មានរូបភាពវាលស្រែនៅឥណ្ឌូណេស៊ី និងវាលខ្សាច់នៅប្រេស៊ីល។

 

 

យោងតាម AFP ភ្នាក់ងារពាណិជ្ជកម្ម DDB បានទទួលបន្ទុកលើការថតវីដេអូផ្សព្វផ្សាយយុទ្ធនាការទេសចរណ៍ «Love The Philippines» ក្រោមកញ្ចប់ថវិកា៩សែនដុល្លារអាម៉េរិក ហើយវីដអូបានផ្សព្វផ្សាយផ្លូវការកាលពីថ្ងៃទី២៧ ខែមិថុនា។

 

 

ក្រសួងទេសចរណ៍ហ្វីលីពីន កាលពីថ្ងៃសៅរ៍ បានបើកការស៊ើបអង្កេតលើករណី DDB ចំពោះការប្រើប្រាស់រូបភាពដែលខ្លួនមិនបានថតផ្ទាល់ ក្រោយមក វីដេអូនោះក៏ត្រូវបានដកចេញពីទំព័រហ្វេសប៊ុកក្រសួងផងដែរ។

 

បើតាមក្រុមការងារ Fact Check របស់ AFP ក្រៅពីយករូបភាពពីប្រេស៊ីល និងឥណ្ឌូណេស៊ី គេក៏រកឃើញរូបភាពនៅស៊្វីស និងអេមីរ៉ាតអារ៉ាប់រួម ថែមទៀតផង៕