ជាតិ
អ្នកសារព័ត៌មានថ្មីៗ បានចូលរួមយកព័ត៌មាននិងទស្សនកិច្ចនៅក្រៅប្រទេស៥លើក ក្នុងខែមិថុនា
× ភ្នំពេញ៖ នៅក្នុងខែមិថុនាកន្លងទៅ សាព័ត៌មានឌីជីថលថ្មីៗ ទទួលបានការអញ្ជើញឱ្យចូលរួមយកព័ត៌មាន និងធ្វើទស្សនកិច្ចនៅក្រៅប្រទេសចំនួន៥លើក ពីស្ថាប័នដៃគូ ទៅកាន់ប្រទេសចំនួន ៤ រួមមានប្រទេសថៃ ឥណ្ឌូនេស៊ី វៀតណាម និងប្រទេសចិន។ ក្រៅពីបេសសកម្មនៅក្រៅប្រទេស ក្រុមការងាររបស់យើង ក៏មមាញឹកក្នុងការអនុវត្តគម្រោងបណ្តុះបណ្តាល និងផលិតវីដេអូ ជាមួយស្ថាប័នដៃគូជាតិ និងអន្តរជាតិដែរ។
នៅដើមខែមិថុនា អ្នកសារព័ត៌មានថ្មីៗ កញ្ញា ម៉េង សៀវម៉ី អ្នកសារព័ត៌មានថ្មីៗ តាមរយៈការអញ្ជើញពីអង្គការ UNAIDS Cambodia បានចូលរួមសិក្ខាសាលា«អាស៊ីអាគ្នេយ៍ស្តីពីការមាក់ងាយទាក់ទងនឹងមេរោគអេដស៍ និងការរើសអើង» នៅប្រទេសថៃ។ សិក្ខាសាលានេះ ចាប់ផ្តើមនៅថ្ងៃទី ៦-៧ មិថុនា។
ពីថ្ងៃទី១៤-១៦ ខែមិថុនា តាមការអញ្ជើញពីក្រុមការងារ TikTok ប្រចាំប្រទេសកម្ពុជា អ្នកស្រី ញឹក ស្រីលក្ខ និពន្ធនាយិកា ThmeyThmey25 បានទៅចូលរួមវេទិកាតំបន់មួយស្តីពី «ឥទ្ធិពលរបស់ TikTok នៅក្នុងតំបន់អាស៊ីអាគ្នេយ៍-TikTok Southeast Asia Impact Forum» នៅទីក្រុងហ្សាការតា ប្រទេសឥណ្ឌូណេស៊ី។
ទន្ទឹមគ្នានេះដែរ កញ្ញា អ៊ូ សុខមាន ការីនិពន្ធរងនៃសារព័ត៌មានថ្មីៗ ត្រូវបានកាសែតវៀតណាមកាសែត Tuoi Tre អញ្ជើញឱ្យចូលរួមកម្មវិធីប្រគល់ពានរង្វាន់ «32nd SEA Games Inspiration’ Awards» ដែលរៀបចំនៅថ្ងៃទី១៨ មិថុនា នៅក្រុងហូជីមិញ ប្រទេសវៀតណាម។ ជាកម្មវិធីផ្តល់ពានរង្វាន់ដល់អត្តពលិកឆ្នើម និងមានភាពលេចធ្លោ ដល់អត្តពលិក៣រូប នៅក្នុងព្រឹត្តិការណ៍ស៊ីហ្គេមលើកទី៣២ ក្នុងនោះមានអត្តពលិកកម្ពុជា បូ សំណាង និង២រូបទៀត ជាអត្តពលិកវៀតណាម។
កញ្ញា ខន ចំប៉ា និពន្ធនាយករងនៃសារព័ត៌មានថ្មីៗ និងអ្នកសារព័ត៌មាន កម្ពុជា១៣រូបពីស្ថាប័នផ្សេងទៀត បានចូលរួមកម្មវិធី «អ្នកសារព័ត៌មានកម្ពុជា មើលខេត្តក្វាងស៊ី» ប្រទេសចិន។ កម្មវិធីនេះ រៀបចំឡើងដោយ កាសែត The Commercial News និង Cambodia Guangxi Cloud ASEAN International Communication Station ដែលជាអង្គភាពចំណុះ Guangxi Daily ចាប់ពីថ្ងៃទី១៥ ដល់ថ្ងៃទី២០ មិថុនា ឆ្នាំ២០២៣។
នៅចុងខែមិថុនា និងដើមខែកក្កដា លោក រំដួល ចិត្រា និពន្ធនាយកនៃសារព័ត៌មានថ្មីៗ និងកញ្ញា អ៊ូ សុខមាន អ្នកសារព័ត៌មានថ្មីៗ ត្រូវបានកាសែតដ៏ធំរបស់ចិន People’s Daily អញ្ជើញឱ្យចូលរួមកិច្ចប្រជុំកំពូល នៃកិច្ចសហប្រតិបត្តិការ ប្រព័ន្ធផ្សព្វផ្សាយ មេគង្គ-ឡានឆាងប្រចាំឆ្នាំ២០២៣ ដែលរៀបចំឡើងនៅទីក្រុងប៉េកាំង ប្រទេសចិន។ កម្មវិធីនេះចាប់ផ្តើមពីថ្ងៃទី២៥ មិថុនា ដល់ថ្ងៃទី៥ កក្កដា ឆ្នាំ២០២៣ ដោយអ្នកសារព័ត៌មានរបស់យើង នឹងធ្វើដំណើរទៅទីក្រុងប៉េកាំង, ខេត្ដក្វាងទង់ និងខេត្ដយូណាន ដើម្បីធ្វើទស្សនកិច្ច «China Energy Engineering Corporation Ltd. និងសាកលវិទ្យាល័យទំនាក់ទំនង នៃប្រទេសចិន, ទស្សនកិច្ចសហប្រតិបត្តិការធនធានទឹក ឡានឆាង-មេគង្គ មជ្ឈមណ្ឌលក្រសួងធនធានទឹកចិនផងដែរ។
នៅក្នុងស្រុកក៏ដូចគ្នាដែរ សារព័ត៌មានថ្មីៗ បានសហការជាមួយស្ថានទូតអាម៉េរិកប្រចាំកម្ពុជា បានរៀបចំវគ្គបណ្ដុះបណ្ដាលខ្លីមួយស្ដីពី «យុវជន និងការប្រើប្រាស់បណ្ដាញព័ត៌មានសង្គមប្រកបដោយការទទួលខុសត្រូវ» នៅថ្ងៃទី១៧ ខែមិថុនា ឆ្នាំ២០២៣ នៅ American Corner នៃសាកលវិទ្យាល័យគ្រប់គ្រង និងសេដ្ឋកិច្ច ខេត្តបាត់ដំបង។ វគ្គបណ្តុះបណ្តាលនេះ ជាគម្រោងដែលទទួលបានការឧបត្ថម្ភ ពីស្ថានទូតសហរដ្ឋអាម៉េរិកប្រចាំកម្ពុជា ក្នុងគម្រោងនេះ សារព័ត៌មានថ្មីៗ នឹងបណ្តុះបណ្តាលយុវជន ក្នុងរាជធានីភ្នំពេញ ខេត្តសៀមរាប បាត់ដំបង និងខេត្តកំពង់ចាម៕
© រក្សាសិទ្ធិដោយ thmeythmey.com