ជាតិ
លោកស្រី ម៉ិញ កុសនី រដ្ឋលេខាធិការក្រសួងវប្បធម៌ ទទួលមរណភាពក្នុងអាយុ៧៧ឆ្នាំ
រូបពី ហ្វេសប៊ុកផេក ក្រសួងវប្បធម៌ និង វិចិត្រសិល្បៈ
×![]()
ដោយ: ប៉ូ សាគុន
ភ្នំពេញ៖ លោកស្រី ម៉ិញ កុសនី រដ្ឋលេខាធិការក្រសួងវប្បធម៌ និងវិចិត្រសិល្បៈ បានទទួលមរណភាព នៅថ្ងៃអង្គារ ទី៤ ខែកក្កដា ឆ្នាំ២០២៣ វេលាម៉ោង០៤:៥០នាទីព្រឹក ក្នុងជន្មាយុ៧៧ឆ្នាំ ដោយរោគាពាធ។ នេះបើតាមទំព័រហ្វេសប៊ុកក្រសួងវប្បធម៌ និងវិចិត្រសិល្បៈ។
លោកស្រី ម៉ិញ កុសនី គឺជាព្រឹទ្ធាចារ្យសិល្បៈ ដ៏ល្បីល្បាញមួយរូប លើវិស័យសិល្បៈរបាំបុរាណខ្មែរ ដែលបានបូជាកម្លាំងកាយចិត្ត ប្រាជ្ញាស្មារតី និងពេលវេលា ចូលរួមចំណែកយ៉ាងសកម្ម ក្នុងការបម្រើវិស័យសិល្បៈវប្បធម៌ ដែលជាគំរូវីរភាព និងជាគុណបំណាច់ ចំពោះបុព្វហេតុបម្រើជាតិមាតុភូមិ។
យោងតាមគេហទំព័រ ក្រសួងវប្បធម៌ និងវិចិត្រសិល្បៈ លោកស្រី ម៉ិញ កុសនី បានចាប់កំណើតនៅថ្ងៃទី១៩ ខែមករា ឆ្នាំ១៩៤៩ នៅឃុំកំពង់ធំ ស្រុកកំពង់ស្វាយ ខេត្តកំពង់ធំ។ លោកស្រីបានសិក្សាមធ្យមសិក្សាប័ត្រភាគ១។ វិញ្ញាបនប័ត្រមហាវិទ្យាល័យគរុកោសល្យរាជធានីភ្នំពេញ។ វិញ្ញាបនប័ត្រព្រឹទ្ធាចារ្យវប្បធម៌សិល្បៈខ្មែរ(រាជបណ្ឌិតសភាកម្ពុជា)។
ចំពោះបទពិសោធការងាររបស់លោកស្រីវិញ នៅឆ្នាំ២០០៨ លោកស្រីមានតួនាទីជារដ្ឋលេខាធិការ ក្រសួងវប្បធម៌ និងវិចិត្រសិល្បៈ។ ឆ្នាំ១៩៩៩ មានតួនាទីជាអគ្គនាយករងបច្ចេកទេស នៃក្រសួងវប្បធម៌ និងវិចិត្រសិល្បៈ។ ឆ្នាំ១៩៩៨ ជាជំនួយការរដ្ឋមន្ត្រីក្រសួងវប្បធម៌ និងវិចិត្រសិល្បៈ។ ឆ្នាំ១៩៩០ ជាសាស្ត្រាចារ្យមហាវិទ្យាល័យនាដសាស្ត្រ។ ឆ្នាំ១៩៨០ ជាប្រធានផ្នែករបាំបុរាណ នៃក្រសួងឃោសនាការវប្បធម៌ និងព័ត៌មាន។ ឆ្នាំ១៩៧៩ ជាប្រធានផ្នែករបាំក្បាច់បុរាណ និងជាសមាជិករណសិរ្យ សមាជិកតាក់តែងច្បាប់រដ្ឋធម្មនុញ្ញ នៃក្រសួងឃោសនាការវប្បធម៌ និងព័ត៌មាន។
ឆ្នាំ១៩៧០ ជានាដកាឯក និងជាគ្រូបង្ហាត់នៅក្នុងព្រះបរមរាជវាំង។ ឆ្នាំ១៩៧៥ ជាគ្រូបង្ហាត់សិល្បៈ នៅការិយាល័យរបាំព្រះរាជទ្រព្យ។ ឆ្នាំ១៩៦៨ ជាគ្រូបង្ហាត់សិល្បៈ នៃការិយាល័យរបាំព្រះរាជទ្រព្យ នៅក្នុងព្រះបរមរាជវាំង។
ចំពោះគ្រឿងឥស្សរិយយស ដែលលោកស្រីទទួលបានវិញរួមមាន គ្រឿងឥស្សរិយយស មុនីសារាភ័ណ្ឌ ថ្នាក់ ធិបឌិន្ទ ថ្នាក់ សេនា និងថ្នាក់ អស្សឬទ្ធិ។ គ្រឿងឥស្សរិយយស ការងារថ្នាក់ មេដាយមាស។ គ្រឿងឥស្សរិយយស មុនីសារាភ័ណ្ឌ ថ្នាក់សេនា ពីព្រះករុណានរោត្តមសីហនុ។ គ្រឿងឥស្សរិយយស ព្រះរាជសង្ហា មានព្រះឆាយាល័ក្ខសម្ដេចមុនីនាថសីហនុ៕
Tag:
សិល្បៈ
មរណភាព
វប្បធម៌
© រក្សាសិទ្ធិដោយ thmeythmey.com
