ក្រុមកីឡាបាល់ទាត់ជម្រើសជាតិនារីចិន បង្ហាញសមាសភាពកីឡាការិនីចំនួន ២៣រូបសម្រាប់ការប្រកួតប្រជែងនៅក្នុងព្រឹត្តិការណ៍ Women’s World Cup 2023 ដែលធ្វើឡើងក្នុងប្រទេសអូស្ត្រាលី និងនូវែលសេឡង់។ អ្នកស្រី Shui Qingxia គ្រូជម្រើសជាតិចិន កំណត់គោលដៅចុងក្រោយ ធ្វើយ៉ាងណាឡើងឱ្យដល់វគ្គ ៨ក្រុមចុងក្រោយ។
បើតាមសេចក្តីថ្លែងការណ៍របស់សហព័ន្ធបាល់ទាត់ចិន ក្រុមរហ័សនាមកូលាបដែក នឹងធ្វើដំណើរទៅកាន់ទីក្រុង Adelaide នៅថ្ងៃទី៧ ខែកក្កដា ដែលជាទីកន្លែងពួកគេត្រូវបោះជំរុំហ្វឹកហាត់សម្រាប់បេសកកម្មប្រជែងពានរង្វាន់ Women’s World Cup 2023។ Women’s World Cup 2023 នឹងចាប់ផ្តើមការប្រកួតនៅថ្ងៃទី២០ ខែកក្កដា ដល់ថ្ងៃទី២០ ខែសីហា។
ស្ថិតក្នុងចំណោមកីឡាការិនី ២៣រូប សម្រាប់ការប្រកួតប្រជែង កីឡាការិនីចំនួន ៩នាក់ធ្លាប់មានបទពិសោធន៍លេងនៅព្រឹត្តិការណ៍ World Cup ដោយក្នុងនោះរួមមានប្រធានក្រុម Wang Shanshan និងខ្សែប្រយុទ្ធដ៏មុតស្រួចប្រចាំក្រុម Wang Shuang។
ក្រុមជើងឯករងឆ្នាំ ១៩៩៩ ចិន កាលពីប្រកួតប្រជែងនៅក្នុងព្រឹត្តិការណ៍ Women’s World Cup 2019 នៅក្នុងប្រទេសបារាំង ក្រុមបាល់ទាត់នារីចិនរងបរាជ័យធ្លាក់ចេញក្នុងវគ្គ ១៦ក្រុមចុងក្រោយ។ តែមកប្រជែងនៅក្នុងពានរង្វាន់ Asian Cup ក្រុមនារីចិនយកឈ្នះលើក្រុមនារីកូរ៉េខាងត្បូង យ៉ាងលំបាកកាលពីឆ្នាំ ២០២២ បង្កើនក្តីសង្ឃឹមសម្រាប់ការប្រកួតក្នុងទឹកដីប្រទេសអូស្ត្រាលី និងនូវែលសេឡង់។
ក្រុមបាល់ទាត់នារីចិន នឹងត្រូវតទល់ជាមួយក្រុមដាណឺម៉ាក ក្នុងទីក្រុង Perth សម្រាប់ការប្រកួតប្រជែងក្នុងពូល D នៅថ្ងៃទី២២ ខែកក្កដា មុនពេលជួបហៃទី និងអង់គ្លេស៕
អ្នកចាំទី ៖ Zhu Yu, Xu Huan, Pan Hongyan
ខ្សែការពារ ៖ Wu Haiyan, Yao Wei, Wang Linlin, Gao Chen, Chen Qiaozhu, Li Mengwen, Dou Jiaxing
ខ្សែបម្រើ ៖ Zhang Rui, Yao Lingwei, Gu Yasha, Zhang Xin, Yang Lina, Wu Chengshu, Zhang Linyan, Shen Mengyu
ខ្សែប្រយុទ្ធ ៖ Wang Shanshan, Wang Shuang, Tang Jiali, Xiao Yuyi, Lou Jiahui៕