កីឡាអន្តរជាតិ
អន្តរជាតិ
៧ឆ្នាំក្រោយ Xhaka ចេញពី Arsenal ត្រឡប់ទៅទឹកដីអាល្លឺម៉ង់វិញ
× Granit Xhaka វិលត្រឡប់ទៅប្រកបអាជីពនៅទឹកដីអាល្លឺម៉ង់វិញ ដោយចូលរួមជាមួយក្រុម Bayer Leverkusen បន្ទាប់ចាកចេញពីក្រុម Arsenal ក្រោយរួមរស់រយៈពេល ៧ឆ្នាំ។
កីឡាករសញ្ជាតិស្វ៊ីស វ័យ ៣០ឆ្នាំ បានចូលរួមជាមួយក្រុមកាំភ្លើងធំកាលពីឆ្នាំ ២០១៦ ដោយផ្ទេរចេញពីក្រុម Borussia Monchengladbach ហើយរូបគេបង្ហាញខ្លួនឱ្យ Arsenal ចំនួន ២៩៧ប្រកួត។
វិលទៅក្របខណ្ឌ Bundesliga ដោយចុះកិច្ចសន្យា៥ឆ្នាំ ជាមួយក្រុម Leverkusen ខ្សែបម្រើ Xhaka ថាទឹកដីអាល្លឺម៉ង់ រូបគេស្គាល់ច្បាស់អំពីលីគកំពូលមួយនេះ ហើយតែងតែតាមដានអំឡុងស្ថិតនៅជាមួយ Arsenal។
«ខ្ញុំស្គាល់ច្បាស់ពី Bundesliga ទាំងក្នុងទាំងក្រៅ ហើយខ្ញុំបានមើលការប្រកួតពួកគេពីទីក្រុងឡុងដ៍។ Leverkusen គឺជាក្លិបមួយដែលមានប្រវត្តិសាស្ត្រដ៏ទាក់ទាញ និងគោលដៅច្បាស់លាស់ លើសពីនេះខ្ញុំមើលឃើញថាក្លិបនឹងមានអនាគតដ៏អស្ចារ្យ។»។ Xhaka បាននិយាយបែបនេះអំឡុងពេលចុះកិច្ចសន្យាជាមួយក្លិបស្ថិតនៅប្រទេសអាល្លឺម៉ង់។
កាលស្ថិតនៅជាមួយក្រុម Arsenal កីឡាករវ័យ ៣០ឆ្នាំ បានឈ្នះពានរង្វាន់ FA Cup ចំនួន ២លើក និងពានរង្វាន់ Community Shields ២លើក។ រូបគេបានក្លាយជាប្រធានក្រុមកាំភ្លើងធំ ពេលស្ថិតក្រោមការដឹកនាំរបស់លោក Unai Emery នៅក្នុងឆ្នាំ ២០១៩ ប៉ុន្តែពេលនោះបានត្រឹមតែរយៈពេល ២ខែតែប៉ុណ្ណោះ។
អំឡុងពេលក្រុមស្ថិតក្រោមការដឹកនាំរបស់លោក Mikel Arteta ខ្សែបម្រើសញ្ជាតិស្វ៊ីសបានរកឃើញនៅទម្រង់លេងដ៏ខ្លាំងរបស់គេ ហើយបានក្លាយជាកីឡាករមួយរូបដ៏សំខាន់ក្នុងក្រុមកាំភ្លើងធំនារយៈពេលចុងក្រោយមកនេះ៕
Tag:
Granit Xhaka
Arsenal
© រក្សាសិទ្ធិដោយ thmeythmey.com