ផ្អែកតាមមាត្រាថ្មី ដែលទើបបន្ថែមទៅក្នុងច្បាប់បោះឆ្នោត ការណែនាំ ឬការញុះញង់ឲ្យអ្នកបោះឆ្នោតបំផ្លាញសន្លឹកឆ្នោត ឬធ្វើឲ្យខូចសន្លឹកឆ្នោត នឹងរងពិន័យពី៥លានរៀល ដល់២០លានរៀល។ នៅមានអំពើផ្សេងទៀត ដែលនាំឲ្យរងពិន័យពី៥លានរៀល ដល់២០លានរៀលដែរ រួមមាន រារាំង ឬញុះញង់ប្រជាពលរដ្ឋមិនឲ្យទៅបោះឆ្នោត, ធ្វើឲ្យបាត់ទំនុកចិត្តលើការបោះឆ្នោត, ធ្វើឲ្យខូចរបៀបរៀបរយក្នុងពេលបោះឆ្នោត, បង្កការរំខានមិនឲ្យការបោះឆ្នោតដំណើរការបាន, និង បង្កការរំខានមិនឲ្យការរាប់សន្លឹកឆ្នោតដំណើរការបាន ជាដើម។
 

ទោសមិនមែនមានតែការពិន័យប្រាក់ពី៥លានរៀល ដល់២០លានរៀលប៉ុណ្ណឹងទេ បើអ្នកដែលប្រព្រឹត្តនោះ ជាបេក្ខជនឈរឈ្មោះ ឬក៏ជាគណបក្ស។ បន្ថែមពីលើការពិន័យជាទឹកប្រាក់ បេក្ខជនឈរឈ្មោះ ឬគណបក្ស នឹងត្រូវដកសិទ្ធិមិនឲ្យឈរឈ្មោះបោះឆ្នោតរយៈពេល៥ឆ្នាំយ៉ាងតិច បើហ៊ានប្រព្រឹត្តអំពើតែមួយចំណុច ក្នុងចំណោមអំពើខាងលើ។ ក្នុងករណីនេះ បេក្ខជនឈរឈ្មោះ អាចត្រូវពិន័យពី៥លានរៀល ដល់២០លានរៀល ហើយគណបក្ស អាចត្រូវពិន័យពី១០លានរៀល ដល់៣០លានរៀល។  

 

ស្ថាប័ន ដែលត្រូវច្បាប់ផ្តល់សិទ្ធិអំណាចឲ្យ ដើម្បីចាត់ការ និងដាក់ពិន័យទាំងអស់ខាងលើ ទៅលើបុគ្គលទូទៅ បេក្ខជនឈរឈ្មោះ ឬគណបក្សនយោបាយ គឺគណៈកម្មាធិការជាតិរៀបចំការបោះឆ្នោត (គ.ជ.ប)។

 

សូមបញ្ជាក់ថា ច្បាប់បោះឆ្នោត ទើបត្រូវបានធ្វើវិសោធនកម្ម ហើយព្រះមហាក្សត្រ ទ្រង់ចេញព្រះរាជក្រមប្រកាសឲ្យប្រើប្រាស់ជាផ្លូវការ កាលពីថ្ងៃទី៤ ខែកក្កដា ឆ្នាំ២០២៣។ ការបោះឆ្នោតជាតិ នឹងប្រព្រឹត្តទៅនៅថ្ងៃទី២៣ ខែកក្កដា៕