កីឡាអន្តរជាតិ
អន្តរជាតិ
លោក Pochettino ជឿជាក់ថានឹងកសាង Chelsea ទៅរកភាពជោគជ័យក្នុងរយៈពេលខ្លី
× លោក Mauricio Pochettino អ្នកចាត់ការថ្មីក្រុម Chelsea ជឿជាក់ថា ក្រុមនេះនឹងវិលត្រលប់ទៅកាន់ភាពខ្លាំង និងល្អប្រសើរឡើងវិញ ខណៈដែលអះអាងថាការកសាងក្រុមខ្លាំងឡើងវិញ នៅក្នុងរយៈពេលដ៏ឆាប់រហ័ស។ អ្នកចាត់ការសញ្ជាតិអាហ្សង់ទីន បាននិយាយក្នុងសន្និសីទកាសែតជាមួយក្លិបស្ថិតក្នុងទីក្រុងឡុងដ៍នេះ នាថ្ងៃទី៧ ខែកក្កដា។
Chelsea បានតែងតាំងលោក Pochettino នៅចុងខែឧសភា បន្ទាប់ពីក្រុមបានបញ្ចប់រដូវកាល ២០២២-២៣ យ៉ាងលំបាក ដោយស្ថិតនៅចំណាត់ថ្នាក់លេខ ១២ ក្នុងក្របខណ្ឌ Premier League។ កាលពីរដូវកាលមុន Chelsea ស្ថិតក្រោមការដឹកនាំរបស់អ្នកចាត់ការចំនួន ៣រូប រួមមាន លោក Thomas Tuchel, លោក Graham Potter និងលោក Prank Lampard។
ដោយឡែកអ្នកចាត់ការវ័យ ៥២ឆ្នាំ ដែលបានចុះកិច្ចសន្យារយៈពេល២ឆ្នាំ ជាមួយ Chelsea បានចាប់ផ្តើមការងារថ្មីរបស់លោក កាលពីថ្ងៃទី១ ខែកក្កដា ហើយលោករំពឹងថា នឹងកែប្រែ Chelsea ឡើងវិញ បន្ទាប់ពីឆ្លងកាត់រដូវកាលដ៏អាក្រក់លើកដំបូង ចាប់តាំងពីឆ្នាំ ១៩៩៤។
«គោលដៅរបស់ខ្ញុំគឺដើម្បីឈ្នះ ខ្ញុំសម្លឹងមើលជ័យជម្នះ។ បាល់ទាត់គឺសម្រាប់ថ្ងៃនេះ ថ្ងៃម្សិលកន្លងទៅ អ្នកនឹងមិនអាចនិយាយអ្វីច្រើនលើសពីនេះ រយៈពេលយូរបានទេ យើងមិនអាចប្រាប់មនុស្សគ្រប់គ្នាថា យើងត្រូវការពេល ៦ខែ ដើម្បីកសាងអ្វីថ្មីឡើយ ព្រោះថាមិនហាក់បីមិនសូវល្អ យើងត្រូវកសាងការជឿជាក់តាំងតែពីពេលដំបូងតែម្តង។ យើងនឹងផ្តល់គ្រប់យ៉ាងក្នុងរយៈពេលមួយដ៏ខ្លី យើងគិតអំពីការឈ្នះ […] ពីដំបូងតែម្តងនោះគឺ យើងត្រូវគិតសម្រាប់ការប្រកួតដំបូងនៃ Premier League យើងត្រូវតែបំបាក់ Liverpool។»។ អតីតអ្នកចាត់ក្រុម Tottenham Hotspur បាននិយាយបែបនេះក្នុងសន្និសីទកាសែត ចំពោះគោលដៅនៃការកសាងក្រុម Chelsea ឡើងវិញ។
Chelsea ដែលដឹកនាំដោយលោក Pochettino នឹងត្រូវប្រកួតបើកឆាកក្របខណ្ឌ Premier League រដូវកាលថ្មីដោយ ជំនួបដំបូងនឹងត្រូវជួបតទល់ក្រុម Liverpool ដែលដឹកនាំដោយលោក Jurgen Klopp នៅថ្ងៃទី១៣ ខែសីហា។
យ៉ាងណានារយៈពេលប៉ុន្មានសប្តាហ៍ចុងក្រោយ Chelsea បានបាត់បងកីឡាករសំខាន់ៗជាច្រើនរូប ចាប់តាំងពីឆ្លងកាត់រដូវកាលដ៏លំបាក់រួចមក។ កីឡាករខ្សែប្រយុទ្ធ Kai Havertz បានផ្លាស់ទៅក្រុម Arsenal។ ចំណែកកីឡាករ N’Golo Kante, Kalidou Koulibaly, Mateo Kovacic និង Eduard Mendy សុទ្ធសឹងតែកីឡាករសំខាន់បានចេញពីក្រុម៕
Tag:
Chelsea
Mauricio Pochettino
© រក្សាសិទ្ធិដោយ thmeythmey.com