​ជាផ្នែកមួយនៃគម្រោងរបស់កិច្ចសហការរវាង UEFA តំបន់អឺរ៉ុបនិង CONMEBOL តំបន់អាម៉េរិក​ខាង​ត្បូង ​ការប្រកួតពានរង្វាន់ថ្មី សម្រាប់ក្រុមជើងឯកពានរង្វាន់លំដាប់ទីពីរ មកពីប្រទេស​អេស្ប៉ាញ ទល់ជើងឯកមកពីប្រទេសអេក្វាទ័រ នៃពានរង្វាន់លំដាប់ទីពីរទ្វីបអាម៉េរិកខាងត្បូង ​នឹង​ត្រូវប្រកួតនៅថ្ងៃទី១៩ ខែកក្កដា ដែលធ្វើឡើងនៅក្នុងកីឡដ្ឋាន Ramon Sanchez-Pizjuan ក្នុងទីក្រុង​ Seville។
  

«ពានរង្វាន់ Club Challenge គឺជាការប្រកួតមួយដែលលេងលើសពី ៩០នាទី ដោយគ្មាន​ការ​បន្ថែម​ម៉ោង​​បន្ថែមឡើយ ដូច្នេះ​បើការប្រកួតស្មើរហូតដល់វិនាទីចុងក្រោយ នោះការប្រកួតនេះ​នឹងឈាន​ដល់​​ការស៊ុត​បាល់កាត់សេចក្តី ១១ម៉ែត្រតែម្តង។ ក្រុមដែលឈ្នះជើងឯក នឹងទទួល​បាន​​ពានរង្វាន់​មួយនឹងមេដាយ ដែលបានធ្វើឡើងជាពិសេស សម្រាប់ផ្តល់ឱ្យក្រុមជើងខ្លាំងឈ្នះការប្រកួត។»។ នេះ​បើតាមសេចក្តីថ្លែងការណ៍របស់ CONMEBOL។
 

ការប្រកួតពានរង្វាន់ថ្មីមួយនេះ ក៏ត្រូវដាក់ឈ្មោះថា Antonio Puerto XII ក្នុងការផ្តល់កិត្តិយស និង​ការ​រំឭកដល់អតីតកីឡាករក្រុម Sevilla ឈ្មោះ ​Antonio Puerto នេះផ្ទាល់ ដែលបាន​បាត់បង់​ជីវិត​ដោយសារជំងឺគាំងបេះដូង ក្នុងវ័យ ២២ឆ្នាំ។
 

គួររំឭកថា ពានរង្វាន់ដែល UEFA និង​ CONMEBOL បានសហការបង្កើត​ការប្រកួត​នាពេល​កន្លង​មក មានដូចជាពានរង្វាន់ Finalissima ដែលជាការប្រកួតប្រជែង រវាងក្រុមជើងឯក UEFA Euro និង Copa America ទាំងបុរស និងនារី ដោយពានរង្វាន់សម្រាប់ក្រុមជើងឯក​តំបន់ ​ជាការប្រជែងដ៏​ជក់ចិត្តបំផុត៕