បើតាមសេចក្តីប្រកាសព័ត៌មានរបស់ក្រសួងអប់រំ ​ ចុះថ្ងៃទី៧​កក្កដា​ ព្រឹត្តិការណ៍​«បំណង​ប្រាថ្នា​» ជាការលើកកម្ពស់ការអប់រំវិទ្យាសាស្រ្ត និងបច្ចេកវិទ្យា (STEM) ដោយប្រមូលផ្តុំ​សិស្ស​ដែលមានសក្តានុពលក្នុងការស្រាវជ្រាវ គំនិតច្នៃប្រឌិត និង​នវានុវត្តន៍ ឱ្យផ្សារភ្ជាប់​ជាមួយបរិបទ​នៃការអប់រំតាមបែបឌីជីថល។ ការបង្កើតគម្រោង​បំណង​ប្រាថ្នា គឺផ្តោតលើវត្ថុ​គំរូវិទ្យាសាស្រ្ត ដែលអាចកែសម្រួល  ឬដោះ​ស្រាយនូវ​បញ្ហានានា ដែលកំពុងជួបប្រទះក្នុង​ជីវភាពរស់នៅប្រចាំថ្ងៃ។ នេះបើតាមសេចក្តីប្រកាសព័ត៌មានដដែល។
 

ការចូលរួមប្រកួត នឹងត្រូវរៀបចំជា ៥ ដំណាក់កាល គឺការចុះឈ្មោះនៅលើវេទិកាឌីជីថល, ការស្វែងរកដៃគូ ការបង្កើតក្រុម និងការសរសេរឯកសារទស្សនទាន, ការពិគ្រោះយោបល់ និងកា​រកែលម្អ , ​ការធ្វើបទបង្ហាញ និងការពារគម្រោងនៅ​វេទិកាសាធារណៈ, និងការ​ផលិត​វត្ថុគំរូ​​។ 
 

ចំពោះកាលបរិច្ឆេទនៃដំណើរការព្រឹត្តិការណ៍ «បំណងប្រាថ្នា» នឹងចាប់ផ្តើមពី​សប្តាហ៍ទី៤ ខែ​កក្កដា ឆ្នាំ២០២៣ ដែលជាដំណាក់កាលចុះឈ្មោះ ​ដល់សប្តាហ៍ទី៣ ឬទី៤ នៃខែធ្នូ ឆ្នាំ​២០​២៣​ គឺការធ្វើវេទិកាសាធារណៈ ផ្សព្វផ្សាយស្នាដៃចូលរួមស្រាវជ្រាវ ប្រកាស​លទ្ធផល​ និង​ការប្រគល់ពានរង្វាន់ជ័យលាភី​។ 
 

សិស្សានុសិស្សដែលចូលរួមប្រកួត​ នឹងទទួលបាន​វិញ្ញាបនបត្របញ្ជាក់ការចូលរួម មេដាយ ថវិកា និងរង្វាន់មួយចំនួនទៀត ពីក្រសួងអប់រំ យុវជន និង​កីឡា ​។ ពួកគេក៏ ​ក៏មានអាទិភាព​​សម្រាប់ទស្សនកិច្ចសិក្សានៅតាមគ្រឹះស្ថានឧត្តមសិក្សា បណ្តាសហគ្រាស ឧស្សាហកម្ម ដើម្បី​ទទួលបានចំណេះជំនាញណាមួយ និងថវិកាឧបត្ថម្ភបន្ថែមទៀត ដើម្បីជាជំនួយ​ក្នុងការ​ផលិតវត្ថុគំរូទៅតាមគម្រោង និងបំណងប្រាថ្នារបស់ខ្លួន៕