គំនូរ២ផ្ទាំងរបស់វិចិត្រករ ព្រហ្ម ពន្លឺ តំណាងក្ដីសង្ឃឹមក្នុងជីវិត

ជាតិ

គំនូរ២ផ្ទាំងរបស់វិចិត្រករ ព្រហ្ម ពន្លឺ តំណាងក្ដីសង្ឃឹមក្នុងជីវិត

09, Jul 2023 , 10:39 am

រូបភាព

ដោយ: ប៉ូ សាគុន

ភ្នំពេញ៖ គំនូររូបទូកនៅលើផ្ទៃទឹក ហាក់ដូចស្ថិតក្រោមឥទ្ធិពលព្យុះភ្លៀង និងគំនូររូបព្រហ្មបាយ័ន ដែលមានមុខមើលត្រង់ និងមុខតែមួយចំហៀង គឺជាគំនូរដែលវិចិត្រករ ព្រហ្ម ពន្លឺ ស្រឡាញ់ជាងគេបំផុត ក្នុងចំណោមស្នាដៃគំនូររបស់ខ្លួនទាំងអស់។ ស្រឡាញ់ជាងគេ ក៏ព្រោះថាគំនូរទាំង២ផ្ទាំងនេះ គឺជាកម្លាំងជំរុញចិត្តលោកឱ្យមានក្ដីសង្ឃឹមក្នុងជីវិត បន្តដើរទៅកាន់ក្ដីស្រមៃ។

វិចិត្រករ ព្រហ្ម ពន្លឺ បានយកស្នាដៃគំនូររបស់ខ្លួន ដាក់តាំងបង្ហាញក្នុងវិចិត្រសាល នៃសណ្ឋាគារសូហ្វីតែលភ្នំពេញ កាលពីពេលកន្លងទៅ។ ផ្កាឈូក គឺជាអត្តសញ្ញាណរបស់ ពន្លឺ ដូច្នោះហើយ គ្រប់គំនូរទាំងអស់របស់វិចិត្រកររូបនេះ សុទ្ធតែបានផ្សារភ្ជាប់នឹងផ្កាឈូក។ ស្នាដៃរបស់វិចិត្រកររូបនេះ ពុំមែនមានតែនៅលើផ្ទាំងសំពត់សឡើយ តែមាននៅលើកែវ ថូ នៅលើអាវ និងវត្ថុផ្សេងៗទៀត។

សូមអញ្ជើញទស្សនាកិច្ចសម្ភាសរវាង កញ្ញា ប៉ូ សាគុន អ្នកសារព័ត៌មានឌីជីថលថ្មីៗ និងវិចិត្រករ ព្រហ្ម ពន្លឺ ដូចតទៅ ៖

លោក ព្រហ្ម ពន្លឺ វិចិត្រគំនូរសហសម័យ កំំពុងនិយាយជាមួយភ្ញៀវដែលមកទស្សនាគំនូររបស់ខ្លួន

អង្គុយនៅមុខផ្ទាំងគំនូររបស់ខ្លួន លោក ព្រហ្ម ពន្លឺ បានប្រាប់សារព័ត៌មានថ្មីៗថា លោកស្រឡាញ់ស្នាដៃគំនូររបស់លោកទាំងអស់ ប៉ុន្តែមានតែគំនូរ២ផ្ទាំងប៉ុណ្ណោះ ដែលលោកស្រឡាញ់ជាងគេ ក៏ព្រោះថាវាតំណាងឱ្យអត្ថន័យជីវិតរបស់លោក។ គំនូរទី១ គឺជាគំនូររូបទូក ស្ថិតនៅលើផ្ទៃទឹក មានផ្កាឈូកដុះជុំវិញ។ ទូកនោះហាក់ដូចជា ស្ថិតនៅក្រោមសម្ពាធព្យុះភ្លៀងដ៏ខ្លាំងក្លា។ រូបគំនូរមួយផ្ទាំងនេះ ត្រូវបានដាក់ឈ្មោះថា “ខ្ញុំមិនអាចនៅឯកោទេ”។

និយាយបណ្ដើរញញឹមបណ្ដើរ លោក ព្រហ្ម ពន្លឺ ពន្យល់បន្ថែម៖ «គំនូររូបទូកនេះ តំណាងឱ្យជីវិតរបស់ខ្ញុំ ដែលធ្លាប់តែលតោល។ ផ្កាឈូកតំណាងឱ្យមនុស្សជុំវិញខ្លួនខ្ញុំ ដែលផ្ដល់កម្លាំងចិត្តឱ្យខ្ញុំ។ បើទោះបីជាខ្ញុំបានជួបរឿងអ្វីក៏ដោយ ប៉ុន្តែមនុស្សជុំវិញខ្លួនខ្ញុំ តែងផ្ដល់កម្លាំងចិត្តដល់ខ្ញុំជានិច្ច»។

គំនូរទូកមានចំណងជើងថា ខ្ញុំមិនអាចនៅឯកោទេ (រូបផ្ដល់ឱ្យដោយលោក ព្រហ្ម ពន្លឺ)

ក្នុងទឹកមុខហាក់មានក្ដីសង្ឃឹមក្នុងជីវិត បុរសសម្បុរស្រអែម សក់ខ្លីស្លូតរូបនេះ បន្តពន្យល់ពីគំនូរមួយផ្ទាំងទៀត ដែលគូរអំពីមុខព្រហ្មបាយ័ន។ បុរសមានដើមកំណើតនៅរាជធានីភ្នំពេញ ពន្លឺ ថារូបនេះតំណាងដល់ ការផ្ដល់កម្លាំងចិត្តពីឪពុករបស់ខ្លួន។ លោកថាមុខព្រហ្ម ដែលមើលទៅមុខត្រង់នោះ គឺតំណាងឪពុករបស់លោក។ ចំណែកមុខព្រហ្មដែលឃើញតែមួយចំហៀង គឺតំណាងរូបលោកផ្ទាល់។ គំនូរនេះពិតជាមានន័យបំផុត សម្រាប់ដំណើរជីវិតរបស់លោក ចាប់តាំងពីលោកបែកពីឪពុក អស់រយៈពេល១៥ឆ្នាំមកនេះ។

«រូបចំកណ្ដាលតំណាងឱ្យឪពុកខ្ញុំ។ គាត់បានចែកឋានអស់១៥ឆ្នាំមកហើយ។ រូបមួយចំហៀងមុខ តំណាងឱ្យខ្ញុំ។ ខ្ញុំតែងគិតថា ឪពុករបស់ខ្ញុំ នៅឈរញញឹមពីក្រោយខ្ញុំជានិច្ច។ ខ្ញុំមានកម្លាំងចិត្ត។ ហើយនេះជាមូលហេតុដែលនាំឱ្យខ្ញុំគូររូបមួយផ្ទាំងនេះ។ រូបនេះក៏និយាយពី ពិធីបុណ្យភ្ជុំបិណ្ឌដែរ ដែលតំណាងឱ្យការឧទ្ទិសកុសល»។ នេះជាការពន្យល់របស់វិចិត្រករ ពន្លឺ។

គំនូររូបព្រហ្មបាយ័ន

ទម្រាំបានដើរមកដល់ចំណុចនេះ លោក ពន្លឺ បានឆ្លងកាត់ដំណើរជីវិតតស៊ូច្រើន ប៉ុន្តែអ្វីដែលធ្វើឱ្យលោកមិនបោះបង់ គឺការជឿជាក់លើក្ដីស្រមៃ។ អ្វីដែលសំខាន់បំផុតទៀតនោះ គឺកម្លាំងចិត្តដែលបានពីឪពុកដ៏ល្អ របស់លោក។

សម្រាប់បុរសសម្ដីមួយៗច្បាស់លាស់រូបនេះ គំនូរគឺជាជើងមេឃមួយ នៃជីវិតរបស់លោក។ គំនូរគឺជារបស់មួយ ដែលមានតម្លៃខ្លាំងបំផុតសម្រាប់លោក ដោយហេតុថា លោកអាចបកស្រាយគំនិតរបស់ខ្លួន តាមរយៈគំនូរ។ រូបគំនូររបស់លោក មានលក្ខណៈបង្កប់អត្តសញ្ញាណផ្ទាល់ខ្លួន និងមានភ្ជាប់អត្តសញ្ញាណជាតិផងដែរ។

គំនូររបស់វិចិត្រករ ព្រហ្ម ពន្លឺ

អះអាងថាខ្លួនមានកម្រិតវប្បធម៌តិច ប៉ុន្តែអាចស្វែងរកខ្លួនឯងឃើញ តាមរយៈការមិនបោះបង់ ពន្លឺ ផ្ដាំទៅអ្នកស្រឡាញ់វិស័យសិល្បៈ ពិសេសផ្នែកគំនូរ ត្រូវតែតស៊ូជម្នះឧបសគ្គ ទើបអាចរកឃើញទេពកោសល្យរបស់ខ្លួន។

លោក ព្រហ្ម ពន្លឺ បន្ថែម៖«ខ្ញុំជាសិល្បករមួយរូប ដែលមិនបានចូលសាលាធំដុំទេ ក៏មិនបានរៀនសូត្រចេះដឹងច្រើនដែរ។ ខ្ញុំសុំឱ្យបងប្អូនទាំងអស់គ្នាមានគោលដៅជីវិត។ អ្វីដែលយើងស្រឡាញ់ អ្វីដែលយើងមានបំណង យើងត្រូវធ្វើវាឱ្យបាន។ ខ្ញុំធ្លាប់ដួលច្រើន ធ្លាប់គូរគំនូរដើរសួរគេតាមផ្សារ ប៉ុន្តែខ្ញុំនៅតែមិនបោះបង់ ខ្ញុំនៅតែប្រឹងប្រែងដើម្បីសម្រេចក្ដីស្រមៃ។ បើខ្ញុំមិនមានថ្ងៃមុន ខ្ញុំមិនមានថ្ងៃនេះទេ។ បងប្អូនដែលស្រឡាញ់ផ្នែកសិល្បៈ ឬផ្នែកគំនូរ សុំកុំបោះបង់ក្ដីស្រមៃខ្លួនឯង។ បើសិនយើងបោះបង់ក្ដីស្រមៃខ្លួនឯង លើកទី១ លើកទី២ ខ្ញុំគិតថាយើងមិនអាចមានលើកទី៣ទេ។ ប្រសិនយើងបោះបង់ យើងអាចផ្លាស់ប្ដូរយកអ្វីថ្មីមួយទៀត»៕