ជាតិ
ទេសចរនឹងមានកន្លែងគយគន់ថ្ងៃរះ និងថ្ងៃលិចកាន់តែច្រើននៅតំបន់អង្គរ
× សៀមរាប៖ ក្រៅពីទស្សនាប្រាសាទ, បុរាណស្ថាននានា, ព្រៃព្រឹក្សា, សត្វ, ជីវភាព ប្រជាជននៅតំបន់អង្គរ…ភ្ញៀវទេសចរជាតិ និងអន្តរជាតិអាចគយគន់ថ្ងៃរះ និងថ្ងៃលិចបានច្រើនកន្លែងបន្ថែមទៀត។
អាជ្ញាធរជាតិអប្សរាកំពុងរៀបចំបន្ថែមខ្សែទស្សនាគយគន់ថ្ងៃលិច និងថ្ងៃរះ។ បច្ចុប្បន្ននៅក្នុងរមណីយដ្ឋានអង្គរមានទីតាំងគយគន់ថ្ងៃលិច និងថ្ងៃរះដ៏មានភាពទាក់ទាញ និងពេញនិយមចំនួនពីរគឺ ប្រាសាទអង្គរវត្ត និងប្រាសាទភ្នំបាខែង។
ដើម្បីធ្វើឱ្យមាន ភាពសម្បូរបែបនិងបញ្ចៀសការកកកុញលំហូរនៃភ្ញៀវទេសចរនៅក្នុងតំបន់អង្គរហើយដើម្បីឱ្យស្របទៅតាមចក្ខុវិស័យរបស់អាជ្ញាធរជាតិអប្សរា ព្រមទាំង អនុសាសន៍របស់អ្នកជំនាញការ អាយស៊ីស៊ី-អង្គរ អាជ្ញាធរជាតិអប្សរា បានស្នើ និងរៀបចំខ្សែទស្សនាគយគន់ថ្ងៃលិច និងថ្ងៃរះដែលមាន សក្តានុពលនៅប្រាសាទភ្នំក្រោម ស្រះស្រង់ ខ្លោងទ្វារទន្លេអុំ កំពែង អង្គរធំ(ប្រាសាទជ្រុងទិសនិរតី) និងបារាយណ៍ខាងលិច បន្ថែមទៀត ក្រៅពីប្រាសាទអង្គរវត្ត និងប្រាសាទភ្នំបាខែង។
បើយោងតាមសៀវភៅអង្គរ«៣០ឆ្នាំ», ខ្សែទស្សនាថ្ងៃលិច និងថ្ងៃរះនៅប្រាសាទ ភ្នំក្រោមត្រូវ បានរៀបចំ និងដាក់ដំណើរការសាក ល្បងមុនគេដើម្បីបានបទពិសោធន៍ល្អៗឈាន ទៅអនុវត្តនៅទីតាំងផ្សេងៗបន្តបន្ទាប់ដូចខាងក្រោម៖
១. ខ្លោងទ្វារទន្លេអុំ
២. ប្រាសាទជ្រុងភាគនិរតី
៣. បារាយណ៍ខាងលិច
៤. ស្រះស្រង់៕
© រក្សាសិទ្ធិដោយ thmeythmey.com