អត្តពលិករុស្ស៊ី និងបេឡារុស ត្រូវបានគណៈកម្មាធិការអូឡាំពិកអន្តរជាតិ IOC ដាក់បម្រាមហាមឃាត់មិនឱ្យចូលរួមប្រកួតប្រជែងព្រឹត្តិការណ៍កីឡាអន្តរជាតិនានា ចាប់តាំងពីប្រទេសរុស្ស៊ីបាន វាយប្រហារលើប្រទេសអ៊ុយក្រែន កាលពីដើមឆ្នាំ ២០២២។ សង្គ្រាមរវាងប្រទេសទាំងពីរនៅតែបន្តក្តៅកគុក តែស្ថាប័នកីឡាដ៏ធំរបស់ពិភពលោកបាននិយាយថា កីឡាករគ្មានកំហុសឡើយសម្រាប់ការប្រកួត។
 

នៅក្នុងមហាសន្និបាត OCA លើកទី៤២ នៅថ្ងៃទី១០​ ខែកក្កដា ក្នុងក្រុងបាងកក ប្រទេសថៃ លោក ​​Husain Al-Musallam ​អគ្គនាយកនៃស្ថាប័ន ​OCA បានប្រកាសអំពីការបើកទ្វារសម្រាប់អត្តពលិករុស្ស៊ី និងបេឡារុសចូលរួមប្រកួតកីឡាអាស៊ីហ្គេម​ដែលធ្វើនៅប្រទេសចិន។ 
 

បើតាមសម្តីរបស់នាយក OCA ដដែលនោះ អត្តពលិករុស្ស៊ី និងបេឡាតែចំនួន៥០០នាក់ប៉ុណ្ណោះដែលនឹងត្រូវអនុញ្ញាតចូលរួមប្រកួតប្រជែងក្រោមស្លាកទង់ជាតិអព្យាក្រឹត្យ។ លោក ​Al-Musallam បានអះអាំងបន្ថែមថា មន្រ្តីពាក់ព័ន្ធនឹងនយោបាយមកពីប្រទេសរុស្ស៊ី និងបេឡារុស មិនត្រូវបានអញ្ជើញឱ្យចូលរួមការប្រកួតនេះឡើយ ហើយក៏នឹងមិនមានសញ្ញាសម្គាល់អ្វីមួយឡើយដែលទាក់ទងនឹងសហព័ន្ធកីឡាអូឡាំពិកនៃប្រទេសទាំងពីរនោះផងដែរ។ 
 

អត្តពលិកដែលទៅប្រកួតប្រជែងត្រូវតែមានអព្យាក្រឹត្យភាព និងឯករាជ្យ នៅ Asian Games ដើម្បីដណ្តើមសំបុត្រទៅកាន់ព្រឹត្តិការណ៍អូឡាំពិកទីក្រុងប៉ារីស​ ២០២៤។ ហើយអត្តពលិកមកពីប្រទេសទាំងពីរ ក៏ត្រូវបានកំណត់មិនឱ្យលើសពីចំនួន ៥០០នាក់ ក្នុងការប្រកួតជម្រុះដើម្បីទៅកាន់ព្រឹត្តិការណ៍ Paris 2024 ផងដែរ។ 
 

ទោះយ៉ាងណា ប្រតិភូដែលមកពីចំនួន ៤៥ប្រទេស ឬគណៈកម្មាធិការអូឡាំពិក ដែលស្ថិតក្នុងមហាសន្និបាត OCA យល់ព្រមឱ្យពួកគេចូលរួមប្រកួត លុះត្រាតែគណៈកម្មាធិការអូឡាំពិកអត្តរជាតិ (IOC) ផ្តល់ភ្លើងខៀវសម្រាប់ពួកគេដែរ។ 
 

គួរបញ្ជាក់ថា Asian Games 2022 លើកទី១៩ ត្រូវបានផ្អាកការរៀបចំកាលពីខែកញ្ញា ឆ្នាំ ២០២២​ ដោយសារតែប្រទេសចិនរងផលប៉ះពាល់ពីសំណាក់ជំងឺកូវីដ-១៩ ហើយបានលើកមកធ្វើចាប់ពីថ្ងៃទី២៣ ខែកញ្ញា ឆ្នាំ ២០២៣ វិញ។ ព្រឹត្តិការណ៍រំពឹងនឹងមានអត្តពលិកចូលរួមប្រមាណ ១២,០០០នាក់ ទូទាំងតំបន់អាស៊ី, មន្ត្រីការប្រកួតចំនួន ៤,៧០០នាក់, ក្រុមអ្នកសារព័ត៌មានចំនួន ១២,០០០នាក់ថែមទៀត៕

​