កម្លាំងមន្ត្រីជំនាញនៃមជ្ឈមណ្ឌលសកម្មភាពកម្ចាត់មីកម្ពុជា (CMAC) បានបណ្ដុះបណ្ដាលជំនាញដោះមីន ដល់មន្ត្រីមកពីអង្គភាពផ្តល់សេវាកម្មក្នុងគ្រាអាសន្ន (SESU) របស់អ៊ុយក្រែន កាលពីថ្ងៃទី៥ ដល់៩ កក្កដា នៅប្រទេសប៉ូឡូញ។ វគ្គហ្វឹកហ្វឺនលើកទី២នេះ ប្រកបដោយភាពជោគជ័យ។ នេះបើតាមលោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក មជ្ឈមណ្ឌលសកម្មភាពកំចាត់មីនកម្ពុជា សរសេរលើហ្វេសប៊ុក។
បើតាមលោក ហេង រតនា វគ្គហ្វឹកហ្វឺននេះអាចដំណើរការទៅបាន ដោយមានការសម្របសម្រួលពី រដ្ឋាភិបាលជប៉ុន តាមរយ:ទីភ្នាក់កិច្ចសហប្រតិបតិ្តការអន្តរជាតិ(JICA) និងប្រមុខរដ្ឋាភិបាល សម្ដេច ហ៊ុន សែន ។
កិច្ចសហការជួយផ្ដល់ជំនាញកម្ចាត់មីន ក្នុងប្រទេសអ៊ុយក្រែននេះ កើតចេញពីកិច្ចពិភាក្សាគ្នារវាងសម្ដេចនាយករដ្ឋមន្រ្តី ហ៊ុន សែន និងលោក Kishida Fumio នាយករដ្ឋមន្ត្រីជប៉ុន ក្នុងកិច្ចប្រជុំអាស៊ាន និងប្រជុំពាក់ព័ន្ធ លើកទី៤០-៤១ នៅរាជធានីភ្នំពេញ កាលពីខែវិច្ឆិកា ឆ្នាំ២០២២។
កាលពីខែមករា កន្លងមក មជ្ឈមណ្ឌលសកម្មភាពកម្ចាត់មីនកម្ពុជា (CMAC) បានហ្វឹកហ្វឺនដល់មន្ត្រីជំនាញអ៊ុយក្រែន លើការប្រើប្រាស់សម្ភារ បច្ចេកទេសបោសសម្អាតមីន ជាពិសេសឧបករណ៍រាវមីនប្រភេទ ALIS ផលិតនៅប្រទេសជប៉ុន នៅវិទ្យាស្ថានបច្ចេកទេសកំចាត់មីន ដែលមានទីតាំងនៅក្នុងខេត្តកំពង់ឆ្នាំង។
ដោយឡែកសម្ដេចនាយករដ្ឋមន្រ្តី ហ៊ុន សែន កាលពីថ្ងៃទី៩ កក្កដា ក៏បានអំពាវនាវដល់ប្រទេសជាសមាជិកអង្គការណាតូ និងប្រទេសសម្ព័ន្ធមិត្ត ដូចជា អង់គ្លេស អេស្ប៉ាញ អាល្លឺម៉ង់ កាណាដា ជាដើម ដែលជាប្រទេសហត្ថលេខី នៃអនុសញ្ញាហាមឃាត់គ្រាប់បែកចង្កោម ត្រូវនាំគ្នាចូលរួមទប់ស្កាត់ប្រធានាធិបតីអាម៉េរិក ចូ បៃឌិន និងប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី កុំឱ្យប្រើប្រាស់អាវុធដ៏កាចសាហាវមួយនេះ នៅក្នុងជម្លោះសង្គ្រាម។ កម្ពុជា ជាប្រទេសរងគ្រោះដោយសារគ្រាប់បែកចង្កោមនេះ នៅក្នុងសម័យសង្គ្រាមឥណ្ឌូចិន នាទសវត្សរ៍៦០ និង៧០។
គ្រាប់បែកចង្កោមជាសំណល់សង្គ្រាមនៅកម្ពុជា នៅតែបន្តគំរាមកំហែងដល់អាយុជីវិតនិងសុខសុវត្ថិភាពប្រជាជនកម្ពុជានៅឡើយ ទោះបីជាមានអាយុកាលជាង៥០ឆ្នាំហើយក៏ដោយ។ ក្តីឈឺចាប់និងផលលំបាកនៃសង្គ្រាម ជាពិសេសដោយសារគ្រាប់បែកចង្កោមនៅកម្ពុជា និងបណ្តាប្រទេសរងគ្រោះមួយចំនួន ក៏ក្លាយជាចំណែកមួយនៃចលនាបង្កើតបានអនុសញ្ញាអន្តរជាតិអូស្លូស្តីពី«ការហាមប្រាមការប្រើប្រាស់ ការផលិត ការស្តុកទុក និងការដឹកជញ្ជូនគ្រាប់បែកចង្កោម» ដែលបានចូលជាធរមានជាច្បាប់អន្តរជាតិ នៅឆ្នាំ២០០៨ មាន១២៣ប្រទេស ។ ក្នុងនោះមានរដ្ឋភាគីចំនួន១១១ និងរដ្ឋហត្ថលេខីចំនួន១២។ នេះបើតាមលោក ហេង រតនា។
បើតាមអគ្គនាយកមជ្ឈមណ្ឌលសកម្មភាពកំចាត់មីនកម្ពុជារូបនេះ កម្ពុជារងការទម្លាក់ ប្រមាណ៣០លានកូនគ្រាប់បែកចង្កោម លើទីតាំងរាប់ម៉ឺនគោលដៅក្នុងក្របខណ្ឌទូទាំងប្រទេស នៅទសវត្សរ៍ ៦០និង៧០ ។ បើតាមការសិក្សាវាយតម្លៃឃើញថា គ្រាប់បែកចង្កោមដែលបានប្រើក្នុងសង្គ្រាមឥណ្ឌូចិន មានកម្រិតអត្រាមិនផ្ទុះ ប្រមាណ២៥ទៅ៣០ភាគរយ ដែលបរិមាណនេះ បន្តបង្កគ្រោះថ្នាក់រយៈពេលយូរអង្វែង។
លោក បានបញ្ជាក់លើហ្វេសប៊ុកថា៖« សូមបញ្ឈប់មហិ្ឆតាប្រើប្រាស់គ្រាប់បែកចង្កោមនេះក្នុងសមរភូមិប្រយុទ្ធ ព្រោះថាវិនាសកម្មពិតប្រាកដគឺប្រជាជនស៊ីវិលស្លូតត្រង់ ដែលត្រូវរងទុក្ខវេទនាយូរអង្វែងក្រោយសង្គ្រាមបានបញ្ចប់។ ទង្វើនេះក៏ពាក់ពន្ធ័ដោយផ្ទាល់ដល់ការគោរពច្បាប់អន្តរជាតិ និងសិទ្ធិមនុស្សផងដែរ» ។
សូមរម្លឹកថា សង្គ្រាមរវាងរុស្ស៊ីនិងអ៊ុយក្រែន បានផ្ទុះឡើងចាប់តាំងពីខែកុម្ភៈ ឆ្នាំ២០២២មក។ សហគមន៍អន្តរជាតិនានា មើលឃើញថា រុស្ស៊ី ជាអ្នកឈ្លានពានលើអ៊ុយក្រែន៕