ក្រុមនារីអាម៉េរិកនឹងចាប់ផ្តើមការប្រកួតការពារតំណែងជើងឯកសារជាថ្មីម្តងទៀត បន្ទាប់ពីគ្រងតំណែងពានរង្វាន់បាល់ទាត់ពិភពលោក ៣លើកជាប់គ្នា។ ការបង្ហាញខ្លួនលើកទី៨ របស់ខ្លួន អាម៉េរិកនឹងជួបតទល់ក្រុមនារីវៀតណាមជើងឯកតំបន់អាស៊ីអាគ្នេយ៍ នៅក្នុងកីឡដ្ឋាន Eden Park ថ្ងៃទី២២ ខែកក្កដា មុនពេលទៅប៉ះក្រុមហូឡង់ និងព័រទុយហ្កាល់។ អាម៉េរិកបានទៅដល់ទឹកដីប្រទេសនូវែលសេឡង់ដើម្បីបោះជំរំហ្វឹកហាត់ នៅថ្ងៃទី១០ ខែកក្កដា។
  

ធ្វើដំណើរទៅដល់នូវែលសេឡង់ ខ្សែប្រយុទ្ធជើងចាស់ក្រុមនារីអាម៉េរិក Morgan និយាយថាខ្លួនរីករាយ និងការរំពឹងទុកច្រើនសម្រាប់ការប្រកួត ខណៈសរសើរថាការប្រកួត World Cup នឹងក្លាយជាការប្រកួតដ៏ល្អបំផុតមួយ។
 

«ការប្រកួតនេះនឹងក្លាយជាការប្រកួតដ៏ល្អបំផុតមួយ ដែលខ្ញុំបានរំពឹងទុក។ យើងមានចំនួន ៣២ក្រុមក្នុង World Cup មិនដូចកាលពីមុនឡើយ ដូច្នេះវានឹងក្លាយជាការប្រកួតប្រជែងដ៏ខ្លាំងមួយ វានឹងក្លាយជាការប្រកួតដ៏ល្អបំផុត ហើយវាក៏នឹងទទួលបានការទស្សនា World Cup ច្រើនបន្ថែមទៀត។»។ Alex Morgan បាននិយាយក្រោយពេលធ្វើដំណើរទៅដល់ប្រទេសនូវែលសេឡង់។
 

អាម៉េរិក ធ្លាប់បានបោះជរំហ្វឹកហាត់នៅក្នុងប្រទេសនូវែលសេឡង់កាលពីខែមករា ដើមឆ្នាំ ២០២៣ ដោយកាលនោះពួកគេបានបំបាក់ក្រុមម្ចាស់ផ្ទះក្នុងការប្រកួតមិត្តភាព ២លើក​ក្នុងទីក្រុង ​Wellington និង ​Auckland។ អាម៉េរិករំពឹងក្លាយជាក្រុមដែលទទួលការចាប់អារម្មណ៍ទីពីរពីសំណាក់អ្នកគាំទ្រនូវែលសេឡង់។
 

កីឡាការិនីវ័យ ៣៤ឆ្នាំ នឹងបង្ហាញខ្លួនលើកទី៤ នៅក្នុងព្រឹត្តិការណ៍ World Cup ដោយរួមមានក្រុមកីឡាការិនីជើងចាស់រួមក្រុមដូចជា Megan Rapinoe ខ្សែប្រយុទ្ធ ឈ្នះពាន Golden Boot និង ​Golden Ball ឆ្នាំ ២០១៩ ក៏បង្ហាញខ្លួនលើកទី៤ ដូចគ្នា៕