សហព័ន្ធកីឡាទាំង១២ប្រភេទនឹងចេញដំណើរទៅប្រទេសចិន ដើម្បីហ្វឹកហាត់ត្រៀមការប្រកួត Asian Games 2022 ដែលប្តូរទៅធ្វើនៅឆ្នាំ២០២៣នេះ បន្ទាប់ពីការបោះឆ្នោតជ្រើសរើសតំណាងរាស្រ្តបញ្ចប់ទៅនៅក្នុងខែកក្កដា នេះ។
 

លោក វ៉ាត់ ចំរើន បានឱ្យដឹងថាក្រុមប្រឹក្សាអូឡាំពិកអាស៊ី (OCA) បានបញ្ជាក់អំពីការចូលរួមប្រកួតកីឡាអាស៊ីលើកទី១៩  នៅប្រទេសចិនរួចរាល់ហើយ ដោយគណៈកម្មាធិការជាតិ កំពុងពិភាក្សាយ៉ាងយកចិត្តទុកដាក់ជាមួយក្រសួងអប់រំយុវជន និងកីឡា ជាពិសេសមជ្ឈមណ្ឌលជាតិហ្វឹកហ្វឺនកីឡាដើម្បីសម្រេចថាកីឡាប្រភេទណាខ្លះនឹងត្រូវបញ្ជូនទៅហ្វឹកហាត់ត្រៀមការប្រកួត។
  

«បន្ទាប់ពីបោះឆ្នោតហើយ យើងនឹងបញ្ជូនអត្តពលិកយើងចំនួន ១២ប្រភេទកីឡាទៅហ្វឹកហាត់នៅទីក្រុងហានចូវ ប្រទេសចិន។ យើងមាន ១៦០នាក់ដែលត្រៀមទៅហ្វឹកហាត់នៅចិនហ្នឹងដែលមានទាំងកីឡាប្រយុទ្ធមួយចំនួនផង ដែលត្រៀមការហ្វឹកហាត់ឡើងវិញ»។ នេះជាការបញ្ជាក់របស់លោក វ៉ាត់ ចំរើន។ លោកអគ្គលេខាធិការបន្តថា ចំនួនអាចនឹងមានកើនច្រើនរហូតដល់ទៅចន្លោះជាង ២០០នាក់ដែលត្រៀមលក្ខណៈចូលរួមការប្រកួតកីឡាអាស៊ី ឆ្នាំ២០២៣នេះ។

 

ចំពោះកីឡាទាំង១២ប្រភេទនោះដែរ លោក វ៉ាត់ ចំរើន នឹងជ្រើសរើសយកកីឡាករ-ការិនីមានសក្តានុពល ជាពិសេសលេចធ្លោនៅស៊ីហ្គេមលើកទី៣២ ដើម្បីបញ្ជូនទៅហ្វឹកហាត់នៅប្រទេសចិន

 

គួបញ្ជាក់ថា ព្រឹត្តិការណ៍កីឡាអាស៊ីលើកទី១៩ ឆ្នាំ២០២២ លើកមកឆ្នាំ២០២៣ នឹងប្រព្រឹត្តទៅចាប់ពៅថ្ងៃទី២៣ ខែកញ្ញា រហូតដល់ថ្ងៃទី៨ ខែសីហា ឆ្នាំ២០២៣ នៅទីក្រុងហានចូវ ប្រទេសចិន ដោយមានអត្តពលិកជាច្រើនមកពី ៤៥ប្រទេសចូលរួម។ កីឡាអាស៊ីលើកទី១៨ ឆ្នាំ២០១៨ នៅប្រទេសឥណ្ឌូណេស៊ី កម្ពុជា សម្រេចបានមេដាយ៣ ក្នុងនោះកីឡាការិនីជឺជីតស៊ូ ខាន់ ជេសា ឈ្នះមេដាយមាស១ កីឡាករម៉ូតូទឹក សាលី អ៊ូមើត ឈ្នះមេដាយមាស១ និងសំរឹទ្ធ១៕