កីឡាអន្តរជាតិ
អន្តរជាតិ
លីគបាល់ទាត់ហូឡង់ ហាមអ្នករើសអើងអ្នកស្រឡាញ់ភេទដូចគ្នា ចូលកីឡដ្ឋាន១៨ខែ
× ការប្រកួតក្របខណ្ឌបាល់ទាត់លីគនានាក្នុងប្រទេសហូឡង់ នឹងត្រូវបញ្ឈប់ភ្លាមៗ ប្រសិន បើអ្នកគាំទ្រដែលចូលរួមការប្រកួត ស្រែកច្រៀងដោយប្រមាថ លើអ្នកស្រលាញ់ភេទដូចគ្នា។ នេះបើតាមសមាគមបាល់ទាត់ហូឡង់ (KNVB) ។
ចាប់ផ្តើមពីរដូវកាល ២០២៣-២៤ នៃការប្រកួតលីគក្នុងប្រទេសហូឡង់ អ្នកអធិប្បាយក្នុងកីឡដ្ឋាន នឹងប្រកាសពីការហាមឃាត់ទៅលើការស្រែកច្រៀង ដោយការប្រមាថលើការ ស្រលាញ់ភេទដូចគ្នា ទៅកាន់អ្នកគាំទ្រដែលបានចូលមកទស្សនាការប្រកួត នៅតាមវគ្គនីមួយៗ។ ប្រសិនបើមានការស្រែកច្រៀងដោយការប្រមាថ លើសពី២ដង ការប្រកួតនោះ នឹងត្រូវផ្អាកបណ្តោះអាសន្នតែម្តង។
សម្រាប់បុគ្គលដែលត្រូវបានគេរកឃើញថា មានកំហុស ឬបង្កការរើសអើងនិងការស្រែក ច្រៀង ដោយប្រើពាក្យប្រមាថ នឹងប្រឈមនឹងការហាមប្រាមចូលទស្សនាការប្រកួត ក្នុងកីឡដ្ឋានរយៈពេល ១៨ខែ។
ការសម្រេចចិត្តដាក់ការបង្រ្កាប ទៅលើបញ្ហាការប្រមាថលើអ្នកស្រលាញ់ភេទដូចគ្នា ត្រូវបានធ្វើឡើង បន្ទាប់ពីមានការជួបជុំនូវក្លិបអាជីពជាច្រើន ក្នុងប្រទេសហូឡង់ ហើយដែលគណៈប្រតិភូមកពីក្លិបទាំងអស់នោះ បានឯកភាពគ្នា នឹងបានបោះឆ្នោតសម្រាប់វិធានការ។
«បាល់ទាត់ គឺសម្រាប់មនុស្សគ្រប់គ្នា ទាំងប្រុសស្រី និងភេទទី៣។ នេះបើតាមសម្តីអ្នកស្រី Marianne van Leeuwen ប្រធានផ្នែកបាល់ទាត់របស់សមាគម KNVB។
ការប្រកួតកាលពីខែមេសា នៅក្នុងការប្រកួតក្របខណ្ឌលីគកំពូលហូឡង់ អ្នកគាំទ្រក្រុម SV Spakenburg បានស្រែកច្រៀងដោយពាក្យប្រមាថ ចំពោះការស្រលាញ់ភេទដូចគ្នា ទៅលើកីឡាករ Xavi Simons របស់ក្រុម PSV Eindhoven។ មិនតែប៉ុណ្ណោះ ក្នុងការប្រកួតរវាងហូឡង់ ទល់អាល្លឺម៉ង់ អ្នកគាំទ្រ បានស្រែកពាក្យប្រមាថ «រាល់ជនជាតិអាល្លឺម៉ង់សុទ្ធតែជាខ្ទើយ»។
មិនត្រឹមតែហូឡង់ឡើយ សមាគមបាល់ទាត់អង់គ្លេស កាលពីខែមករា ក៏បានដាក់បន្ថែមការហាមប្រាម លើការស្រែកច្រៀងដោយប្រើពាក្យប្រមាថ ការស្រលាញ់ភេទដូចគ្នានេះ ទៅក្នុងបញ្ជីរបស់ខ្លួន ដើម្បីទុកជាការដាក់ពិន័យទៅលើអ្នកគាំទ្រ ដែលគ្មានក្របសីលធម៌ដែរ។
កាលពីខែមិថុនា ការប្រកួតអន្តរជាតិ រវាងក្រុមអាម៉េរិក ទល់នឹងម៉ិកស៊ិក ការប្រកួតនោះ ត្រូវបានបញ្ឈប់ បន្ទាប់ពីអ្នកគាំទ្របានស្រែកប្រមាថ ទៅលើអ្នកគាំទ្រក្រុមអាម៉េរិក Matt Turner៕
© រក្សាសិទ្ធិដោយ thmeythmey.com