ក្នុងអំឡុងកិច្ចប្រជុំថ្នាក់រដ្ឋម​ន្រ្តីការបរទេសអាស៊ាន និងកិច្ចប្រជុំពាក់ព័ន្ធនៅក្រុងហ្សាការតា ឥណ្ឌូណេស៊ី លោក ផាក ជីន រដ្ឋមន្រ្តីការបរទេសកូរ៉េខាងត្បូង បានរិះគន់យ៉ាងខ្លាំងលើកូរ៉េខាងជើង ដែលទើបតែបាញ់មីស៊ីលអន្តរទ្វីប ទៅក្នុងសមុទ្រខាងកើត ក្នុង ជំនួបទ្វេភាគីជាមួយប្រធានគណៈកម្មការកិច្ចការបរទេសនៃបក្សកុម្មុយនីស្តចិន លោកវ៉ាង យី នៅថ្ងៃទី១៤ ខែកក្កដា។ 

 

«រដ្ឋមន្រ្តីផាក... បានសង្កត់ធ្ងន់ថា វាពិតជាសំខាន់ជាងពេលណាទាំងអស់សម្រាប់ភាគីចិន ក្នុងការដើរតួនាទីប្រកបដោយការស្ថាបនាសម្រាប់សន្តិភាព និងស្ថិរភាពលើឧបទ្វីបកូរ៉េ»។ ក្រសួងការបរទេសកូរ៉េខាងត្បូង បានបញ្ជាក់បែបនេះនៅក្នុងសេចក្តីថ្លែងការណ៍មួយ។ 

 

ចំណែកលោកវ៉ាងវិញ បានប្រាប់ឱ្យកូរ៉េខាងត្បូង គោរពគោលការណ៍ចិនតែមួយ និងមិនជ្រៀតជ្រែកកិច្ចការផ្ទៃក្នុងរបស់ខ្លួន។ បើតាមលោកវ៉ាង រដ្ឋាភិបាលក្រុងប៉េកាំង មានឆន្ទៈធ្វើការជាមួយកូរ៉េខាងត្បូង ក្នុងការកសាងទំនាក់ទំនងដែលផ្តល់ប្រយោជន៍ទៅវិញទៅមក និងជំរុញទំនាក់ទំនងឱ្យដើរលើផ្លូវត្រូវវិញ។ 

 

សូមបញ្ជាក់ថា ចិន និងរុស្ស៊ី ជារដ្ឋដែលតែងតែជំទាស់នឹងទណ្ឌកម្មលើកូរ៉េខាងជើង ក្រោមហេតុផលថា សម្ពាធសេដ្ឋកិច្ច និងនយោបាយទាំងនោះ មិនបានជួយបន្ធូរបន្ថយភាពតានតឹងលើឧបទ្វីបកូរ៉េឡើយ៕