ក្នុងអំឡុងកិច្ចប្រជុំអាស៊ាននៅក្នុងក្រុងហ្សាការតា ឥណ្ឌូណេស៊ី លោក Don Pramudwinai រដ្ឋមន្រ្តីការបរទេសថៃ បានជួបជាមួយលោកវ៉ាង យី នាយកគណៈកម្មការកិច្ចការបរទេសនៃបក្សកុម្មុយនីស្តចិន។ ក្នុងកិច្ចសន្ទនានោះ លោក Don បានប្រាប់លោកវ៉ាង ពីជំនួបជាមួយលោកស្រី អ៊ុងសាន ស៊ូជី មេដឹកនាំរដ្ឋាភិបាលស៊ីវិលមីយ៉ាន់ម៉ា ដែលត្រូវបានឃុំខ្លួននៅក្នុងទីក្រុងណៃពិដោ។ បើតាមប្រមុខការទូតថៃ លោកសង្ឃឹមថា ចិននឹងបន្តដើរតួនាទីដ៏សំខាន់ ក្នុងការលើកតម្កើងដំណោះស្រាយនយោបាយលើបញ្ហាមីយ៉ាន់ម៉ា។ 

ជាការឆ្លើយតប លោកវ៉ាង បានអះអាងថា លោកគាំទ្រអាស៊ាន ក្នុងការដោះស្រាយបញ្ហាមីយ៉ាន់ម៉ា តាមវីធីរបស់ខ្លួន និងដាក់ចេញផែនការដែលអាចទទួលយកបានសម្រាប់ភាគីពាក់ព័ន្ធទាំងអស់របស់មីយ៉ាន់ម៉ា។ 

 

បន្ថែមពីនេះ មន្រ្តីការទូតជាន់ខ្ពស់ចិន ក៏បានសាទរចំពោះចំណាត់ការចុងក្រោយរបស់ថៃ លើបញ្ហាមីយ៉ាន់ម៉ាផងដែរ ដោយខ្លួននឹងឈរលើការថែរក្សាការបង្រួបបង្រួម និងកិច្ចសហប្រតិបត្តិការរបស់អាស៊ាន។ 

 

ខុសពីចិន ប្រមុខការទូតអាម៉េរិក នៅថ្ងៃទី១៤ ខែកក្កដា បានប្រាប់រដ្ឋមន្រ្តីការបរទេសអាស៊ានឱ្យដាក់សម្ពាធលើរបបសឹកមីយ៉ាន់ម៉ា ដើម្បីបញ្ឈប់អំពើហិង្សា និងវិលត្រលប់ទៅរកប្រជាធិបតេយ្យឡើងវិញ។

 

តាមរយៈសេចក្តីថ្លែងការណ៍រួមរបស់រដ្ឋមន្រ្តីការបរទេសនៅថ្ងៃទី១៣ ខែកក្កដា អាស៊ាន បន្តប្រកាន់យកការឯកភាព ៥ចំណុច ដែលដាក់ចេញដោយមេដឹកនាំកន្លងមក ជាឯកសារយោងសម្រាប់លើកឡើងពីបញ្ហានៅមីយ៉ាន់ម៉ា។ 

 

តាមសេចក្តីថ្លែងការណ៍រួមដដែលនេះ អាស៊ានមិនបានដាក់ចេញវិធានការតឹងរ៉ឹងជាមុនឡើយ ដោយបានត្រឹមតែជំរុញឱ្យភាគីពាក់ព័ន្ធទាំងអស់ បញ្ឈប់អំពើហិង្សារដោយមិនរើសអើងភ្លាមៗ និងបង្កើតបរិយាកាសល្អសម្រាប់ការដឹកជញ្ជូនជំនួយមនុស្សធម៌ និងកិច្ចពិភាក្សាថ្នាក់ជាតិប្រកបដោយការរួមបញ្ចូល៕