លោក ហេង សុខឃន បាននិយាយថា ក្លិប ដែលមានលក្ខណៈសម្បត្តិគ្រប់គ្រាន់ ត្រូវមាន​អ្នកឧបត្ថម្ភ និងរចនាសម្ព័ន្ធគ្រប់គ្រងឲ្យបានត្រឹមត្រូវ។ រចនាសម្ព័ន្ធ នោះគឺសំដៅលើ ប្រធានក្លិប, អនុប្រធាន, អគ្គលេខាធិការ, គ្រូបង្វឹក, អគ្គហិរញ្ញិក និងពេទ្យ។ 
 

«ក្លិបខ្លះ ប្រធានក្លិបដើរតួនាទីច្រើន ដូចជាប្រធានផង ពេទ្យផង គ្រូបង្វឹកផង។ មិនត្រឹមតែ​ប៉ុណ្ណោះ យើងមិនចង់ចេញអាជ្ញាប័ណ្ណឲ្យគាត់ ហើយស្រាប់តែ ២-៣ខែក្រោយ ក្លិបនេះ ស្រែក​ប្រាប់​ថាមានបញ្ហានេះ បញ្ហានោះ ខ្វះថវិកាផង អ៊‍ីចឹងផង។ យើងចង់ឲ្យគាត់ មាន​លក្ខណៈគ្រប់គ្រាន់ មុនពេលសម្រេចថាបើកក្លិប។ ទាំងអស់នេះ គឺដើម្បីគុណភាព ដើម្បី បន្ដវេនដល់អ្នកជំនាន់ក្រោយ។»។ នេះបើតាមលោក សុខឃន។
 

អគ្គលេខាធិការសហព័ន្ធប្រដាល់គុនខ្មែររូបនេះ ពន្យល់បន្ថែមថា ការបន្ដឹងនេះមិនមែន ដាក់គំនាបឲ្យក្លិបនោះទេ ប៉ុន្ដែគឺដើម្បីឲ្យក្លិបនីមួយៗ មានគុណភាព និងសមត្ថភាព គ្រប់គ្រាន់ ក្នុងការបន្ដវេនបណ្ដុះបណ្ដាលធនធានកីឡាករ-កីឡាការិនី ហើយជួយផ្សព្វ ផ្សាយគុនខ្មែរឲ្យកាន់តែរីកចម្រើន។
 

«ពីមុន យើងចេញអាជ្ញាប័ណ្ណដល់ក្លិប ដែលមានបំណងបើក គឺធូររលុង មិនរឹតបន្ដឹងដល់ ការងា​របច្ចេកទេសទេ។ ដោយសារតែ នៅពេលដែលទទួលបានអាជ្ញាប័ណ្ណ បានប្រហែល​ជា ៣-៤ខែ គឺក្លិបមានបញ្ហាកើតឡើង ទាំងគ្រូ និងកីឡាករ ទាំងសេដ្ឋកិច្ច នៅពេលនោះ បាន​បានជា ប្រធានសហព័ន្ធប្រដាល់គុនខ្មែរ បន្ដឹង ពីការសម្រេចឲ្យក្លិបមួយៗ មាន​អាជ្ញាប័ណ្ណ បន្ទាប់ពីការធ្វើជាម្ចាស់ផ្ទះ ស៊ីហ្គេម លើកទី៣២ នៅកម្ពុជា បាន​ដោយ​ជោគ​ជ័យ​។ អំឡុងព្រឹត្តិការណ៍ស៊ីហ្គេម សហព័ន្ធកីឡាប្រដាល់គុនខ្មែរ ទទួលបាន​លទ្ធផលល្អ ដូច្នេះ​ហើយ យើងចង់ពង្រឹងបណ្ដាក្លិបតូចៗ ដើម្បីឲ្យបន្ដវេន។»។ អគ្គលេខាធិការូបនេះ បាន​និយាយដូច្នេះ។
 

ដូចគ្នានេះដែរ កាលពីថ្ងៃទី១២ ខែកក្កដា ឆ្នាំ២០២៣ អគ្គលេខាធិការរូបនេះ បានថ្លែង​ក្នុង​ពិធី​ប្រកួតដណ្ដើមខ្សែក្រវាត់ ថ្នាលគុនខ្មែរ SUPER FIGHT ដូច្នេះថា វិស័យគុនខ្មែរប្រដាល់ រីកចម្រើនខ្លាំងព្រោះ មានក្លិប និងកីឡាករ-កីឡាការិនី មានសមត្ថភាពច្រើន។ 
 

គួរបញ្ជាក់ផងដែរថា ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣នៅកម្ពុជា សហព័ន្ធ​កីឡា​ប្រដាល់គុនខ្មែរ ទទួលជោគជ័យយ៉ាងខ្លាំង ដោយដណ្ដើមបានមេដាយសរុប ចំនួន​១៩ ក្នុងនោះ មាស១៤, ប្រាក់ ៣ និងសំរឹទ្ធ២៕