យោងតាមការផ្សាយរបស់អគ្គនាយកដ្ឋានកីឡា នាពិធីបិទការប្រកួតកីឡាទាញព្រ័ត្រជ្រើសរើសជើងឯកថ្នាក់ជាតិ ឆ្នាំ២០២៣ កាលពីថ្ងៃទី១៥ ខែកក្កដា លោក មាស សារិន បានលើកយកអនុសាសន៍ ៦ចំណុច ដែលសហព័ន្ធកីឡាទាញព្រ័ត្រកម្ពុជា ត្រូវអនុវត្ត ដើម្បីឲ្យវិស័យកីឡាមួយនេះ រីកចម្រើន ក៏ដូចជាអាចទៅប្រកួតប្រជែងជាមួយអន្ដរជាតិ ផងដែរ។ 

អនុសាសន៍ ៦ចំណូចនោះ មានដូចជា៖ 
  

១-បណ្តុះបណ្តាលថ្នាក់ថ្នាល បង្កើនបរិមាណកីឡាករ កីឡាការិនី ក្លឹប សមាគម កីឡាទាញព្រ័ត្រឱ្យបានទូលំទូលាយ 

២-យកចិត្តទុកដាក់រៀបចំ និងជំរុញការបណ្តុះបណ្តាលកីឡាករ កីឡាការិនីថ្នាល នៅតាមបណ្តា សមាគម-ក្លិប ដើម្បីលើកកម្ពស់សមត្ថភាព

៣-ពង្រឹងសមត្ថភាពអាជ្ញាកណ្តាល ចៅក្រម ឲ្យកាន់តែល្អប្រសើរ ទាំងបរិមាណ និងគុណភាព 

៤-ជំរុញឲ្យមានការរៀបចំការប្រកួតឱ្យបានច្រើន ការហ្វឹកហាត់ជាប្រចាំនៅតាមបណ្តាក្លិប សមាគម

៥-ពង្រឹងរចនាសម្ព័ន្ធគ្រប់គ្រងផ្ទៃក្នុងសហព័ន្ធ ក្លិប សមាគមទូទាំងប្រទេស 

៦-ប្រឹងប្រែងស្វែងរកដៃគូអភិវឌ្ឍបន្ថែមទៀត ដើម្បីបង្កើនព្រឹត្តិការណ៍ប្រកួតឲ្យបានច្រើនក្នុងមួយឆ្នាំ​ តាមដែលអាចធ្វើបាន។
 

ការប្រកួតជ្រើសជើងឯកថ្នាក់ជាតិនេះ មានកីឡាករ-កីឡាការិនី​ ចូលរួមចំនួន ២៤៤នាក់ មកពី១២ សមាគមកីឡា ខេត្ត-ក្រុង ដោយសហព័ន្ធ បានដាក់ ៤វិញ្ញាសា ដើម្បីប្រកួត មានដូចជា៖ វិញ្ញាសា  ៨ ទល់ ៨ (បុរស) ទម្ងន់ ៦០០Kg, វិញ្ញាសា  ៨ ទល់ ៨ ផ្នែក (នារី) ទម្ងន់ ៥០០Kg,  វិញ្ញាសា  ៤ ទល់ ៤ (បុរស) ទម្ងន់ ៤០០Kg និងវិញ្ញាសា  ៤ ទល់ ៤ (នារី) ទម្ងន់ ២៥០Kg។
 

ក្រោយបញ្ចប់ការប្រកួត ខេត្តបាត់ដំបង ឈរនៅចំណាត់ថ្នាក់លេខ១ ដោយបានមេដាយមាស ២, ប្រាក់១ តាមពីក្រោយដោយខេត្តស្វាយរៀង មេដាយមាស១ ប្រាក់២។ ចំណែកលេខ​៣ កងទ័ពជើងទឹក មេដាយមាស ១, លេខ ៤ បានទៅលើខេត្តត្បូងឃ្មុំ មេដាយប្រាក់១ រីឯខេត្តកំពត ស្ថិតក្នុងចំណាត់ថ្នាក់លេខ៥ បានមេដាយសំរឹទ្ធ៣ និងលេខ ៦ មជ្ឈមណ្ឌលកីឡាខេមរភូមិន្ទ មេដាយសំរឹទ្ធ១។ ដោយឡែក ខេត្តកំពង់ចាម, ខេត្តកណ្ដាល, ក្រសួងមហាផ្ទៃ, ខេត្តកំពង់ឆ្នាំង, ខេត្តក្រចេះ និងភ្នំពេញ មិនទទួលបានមេដាយទេ៕