សព្វថ្ងៃនេះ ឈើជាង៧៨ម៉ឺនតោន ត្រូវបានប្រើប្រាស់ជារៀងរាល់ឆ្នាំ នៅក្នុងវិស័យឧស្សាហកម្មនៅកម្ពុជា ដោយក្នុងនោះរោងចក្រកាត់ដេរ បានប្រើប្រាស់ឈើប្រមាណ៣០ម៉ឺនតោន ដើម្បីបម្រើដល់ចង្វាក់ផលិតកម្ម ដោយយកទៅផលិតកម្ដៅនិងចំហាយទឹក។ នេះបើតាមសេចក្ដីណែនាំ ស្ដីពីការប្រើប្រាស់ប្រភពឥន្ទនៈប្រកបដោយនិរន្តរភាព ជំនួសការប្រើប្រាស់អុសសម្រាប់ឡចំហាយ  របស់ សមាគមវាយនភណ្ឌ  នៅថ្ងៃទី១៩កក្កដា។ 

 

ទាក់ទិននឹងព័ត៌មានលម្អិតពីចំនួនរោងចក្រនៅកម្ពុជា ដែលប្រើអុសនៅកម្ពុជា សារព័ត៌មានថ្មីៗពុំអាចសុំការឆ្លើយតបពីលោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានឡើយ។ យ៉ាងណាក្នុងសេចក្ដីណែនាំ TAFTA បានចាត់ទុក ការប្រើប្រាស់អុស និងធ្យូងដោយមិនមាននិរន្តរភាពនេះកំពុងធ្វើឱ្យប៉ះពាល់ដល់បរិស្ថាន ការបាត់បង់ជម្រកសត្វព្រៃ ការប្រែប្រួលអាកាសធាតុ ហើយអាចធ្វើឱ្យមានការកើនឡើងនូវឧស្ម័នផ្ទះកញ្ចក់ ដែលបង្កឱ្យមានការកើនឡើងកម្ដៅផែនដី គ្រោះទឹកជំនន់ ភាពរាំងស្ងួត ខ្យល់ព្យុះជាដើម។ 

 

 សមាគមវាយនភណ្ឌ បានជំរុញបណ្ដារោងចក្រដូច្នេះ៖ «សមាគមជឿជាក់ថាសមាជិកទាំងអស់នឹងពិនិត្យលទ្ធភាពក្នុងការផ្លាស់ប្តូរមកប្រើប្រាស់ប្រភពឥន្ធនៈប្រកបដោយនិរន្តរភាព និងកកើតឡើងវិញ ដើម្បីកាត់បន្ថយសកម្មភាពលួចកាប់ព្រៃឈើដោយខុសច្បាប់ ព្រមទាំងជំរុញការអភិវឌ្ឍន៍ប្រកបដោយនិរន្តរភាព»។ 

 

ដើម្បីបញ្ចៀស និងកាត់បន្ថយផលប៉ះពាល់ធ្ងន់ធ្ងន់ ដែលកើតចេញពីការប្រើប្រាស់អុស និងធ្យូងដោយមិនមាននិរន្តរភាពនេះ TAFTAC ក៏បានលើកទឹកចិត្តដល់បណ្តារោងចក្រ ដែលជាសមាជិកពិចារណា ទទួលយកនូវវិធានការប្រើប្រាស់ប្រកបដោយប្រសិទ្ធភាព សម្រាប់ផ្គត់ផ្គង់ថាមពលដែលមាននិរន្តភាព និងកកើតឡើងវិញផ្សេងៗដូចជា ដុំអង្កាម(Pellets /Briquettes) អង្កាមមិនទាន់កែច្នៃ ឬអុសដែលកាប់ដោយស្របច្បាប់ (Traceable Wood)ផងដែរ៕