កីឡាអន្តរជាតិ
អន្តរជាតិ
ក្លិប Inter Miami នឹងចុះកិច្ចសន្យាយក Jordi Alba ចូលរួមជាមួយ Messi និង Busquets
× អតីតខ្សែការពារស្លាបឆ្វេងក្រុម Barcelona កីឡាករ Jordi Alba នឹងចូលរួមជាមួយនឹង Lionel Messi និង Sergio Busquets នៅ Inter Miami ក្នុងក្របខណ្ឌលីគកំពូលអាម៉េរិក Major League Soccer។ នេះបើតាមសម្តីរបស់ប្រធានក្លិប Inter Miami លោក Jorge Mas ថ្ងៃទី១៨ ខែកក្កដា។
កីឡាករវ័យ ៣៤ឆ្នាំ បានចាកចេញពីក្រុម Barcelona ក្រោយពេលបញ្ចប់រដូវកាល ២០២២-២៣ ដោយរូបគេបានបង្ហាញខ្លួនលេងក្រុមយក្សប្រចាំអេស្ប៉ាញបានជាង ៤៥០ប្រកួត។ Alba បានឈ្នះពានរង្វាន់ Champions League ក្នុងឆ្នាំ ២០១៥, ពានរង្វាន់ La Liga ចំនួន ៦លើក, Copa del Rey ចំនួន ៥លើក, Spanish Super Cup ៤លើក និង Club World Cup ១លើក។
កីឡាករខ្សែការពាររូបនេះក៏បានបង្ហាញខ្លួនលេងឱ្យជម្រើសជាតិអេស្ប៉ាញចំនួន ៩០លើក នឹងក្លាយជាផ្នែកដ៏សំខាន់មួយដោយចូលរួមជាមួយនឹងអតីតមិត្តរួមក្រុមរបស់គេទាំងពីរនៅក្លិប Inter Miami។ Messi និង Busquets បានចុះកិច្ចសន្យាជាមួយនឹងក្លិបស្ថិតក្នុងប្រទេសអាម៉េរិករួចរាល់។
«រូបគេបានចុះកិច្ចសន្យារួចហើយ គេក៏នឹងមកដល់ក្នុងពេលឆាប់ៗ។ លោក Tata (គ្រូបង្វឹក Gerardo Martino) បានបញ្ចូលរូបគេទៅកាន់គម្រោងនៃក្រុម។»។ លោក Jorge Mas បាននិយាយបែបនេះក្នុងកិច្ចសម្ភាសជាមួយនឹងទូរទស្សន៍ TyC Sports។
ក្លិប Inter Miami ក្រៅពីនេះ ពួកគេក៏កំពុងតែសម្លឹងមើលការចុះកិច្ចសន្យាបន្ថែមទៀតទៅលើអតីតកីឡាករក្រុម Bar celona មួយរូបទៀតនោះគឺ ខ្សែប្រយុទ្ធសញ្ជាតិអ៊ុយរូហ្កាយ Luis Suarez ដែលគេបច្ចុប្បន្នកំពុងប្រកបអាជីពនៅក្លិប Gremio របស់ប្រេស៊ីល។ លោក Jorge Mas បាននិយាយដូច្នេះថា ៖«ការចរចាគ្នាត្រូវបានធ្វើឡើង ប៉ុន្តែគេជាកីឡាកររបស់ក្រុម Gremio ខ្ញុំគោរពលើរឿងនេះ។»។
លើសពីនេះទៅទៀតម្ចាស់ក្លិប Inter Miami រូបនេះក៏បានអះអាងបន្ថែមថា ក្លិបរបស់លោកក៏បាននាំមកនូវកីឡាករខ្សែបម្រើសញ្ជាតិប៉ារ៉ាហ្កាយ Diego Gomez ពីក្លិប Libertad ហើយក៏នឹងជជែកអំពីកិច្ចសន្យាជាមួយកីឡាករសញ្ជាតិអាហ្សង់ទីនមកពីក្លិ Racing Club កីឡាករ Tomas Aviles ផងដែរ៕
Tag:
Inter Miami
Jordi Alba
© រក្សាសិទ្ធិដោយ thmeythmey.com