នៅថ្ងៃទី១៩ ខែកក្កដា អ្នកតំណាងក្រុមហ៊ុន Panasonic Holdings បានប្រកាសថា ខ្លួននឹងផ្លាស់ប្តូរមួយផ្នែកធំនៃការផលិតម៉ាស៊ីនត្រជាក់ពីចិនទៅកាន់ទីក្រុង Oisumu ខេត្ត Gunma ប្រទេសជប៉ុន។

 

បច្ចុប្បន្ន ម៉ាស៊ីនត្រជាក់របស់ Panasonic ប្រហែល ៩០ភាគរយត្រូវបានផលិតនៅក្រៅប្រទេស ហើយភាគច្រើននៅក្នុងខេត្ត Dalian ប្រទេសចិន។ ប៉ុន្តែដោយការវាយតម្លៃលើកត្តាជាច្រើន ក្រុមហ៊ុនបានសម្រេចចិត្តផ្លាស់ប្តូរខ្សែច្រវាក់ផលិតកម្មត្រឡប់ពីចិនទៅក្នុងស្រុកវិញ។

 

ក្រុមហ៊ុន Panasonic បោះទុនប្រមាណ ២ពាន់លានយ៉េន (ជាង ១៤លានដុល្លារ) សម្រាប់វិនិយោគនៅក្នុងគម្រោងនេះ ហើយត្រូវបានគេរំពឹងថានឹងបញ្ចប់នៅខែមីនាឆ្នាំក្រោយ។

 

ខ្សែច្រវាក់ផលិតកម្មថ្មីនេះ នឹងត្រូវបានបណ្តាក់ទុនយ៉ាងច្រើនដើម្បីបង្កើនកម្រិតនៃការធ្វើការដោយស្វ័យប្រវត្តិកម្ម ហើយត្រូវបានគេរំពឹងថានឹងកាត់បន្ថយរយៈពេលប្រហែល ២ភាគ៣ នៃពេលវេលាបញ្ចប់ផលិតកម្មបើធៀបនឹងរយៈពេលបច្ចុប្បន្ន។

 

យោងតាមលោក Hiro Ikeda នាយកទទួលបន្ទុកដំណោះស្រាយឧបករណ៍របស់ក្រុមហ៊ុន Panasonic ហេតុផលចម្បងសម្រាប់ការផ្លាស់ប្តូរនេះ គឺដើម្បីធ្វើឱ្យមានការប្រសើរឡើងនូវប្រព័ន្ធបច្ចេកវិទ្យាដើម្បីបង្កើនប្រសិទ្ធភាព។

 

ទន្ទឹមនឹងនេះ ការកើនឡើងតម្លៃប្រាក់ឈ្នួលពលកម្មនៅចិន បានកាត់បន្ថយប្រាក់ចំណេញយ៉ាងច្រើន និងធ្វើឱ្យពិបាកក្នុងការប្រកួតប្រជែងតម្លៃជាមួយនឹងផលិតផលស្រដៀងគ្នារបស់ក្រុមហ៊ុនផ្សេងទៀត។

 

លើសពីនេះ គឺការព្រួយបារម្ភអំពីភាពតានតឹងពាណិជ្ជកម្មរវាងអាម៉េរិក និងចិន ដែលបានលាក់បាំងនូវកត្តាប្រឈមជាច្រើន មិនអាចទាយទុកជាមុនសម្រាប់អាជីវកម្ម ។

 

ជាងនេះទៅទៀត ក្រុមហ៊ុននេះក៏បានគិតគូរពីការកាត់បន្ថយថ្លៃដើមដឹកជញ្ជូនផលិតផលសម្រេចពីចិនទៅកាន់ជប៉ុន ក្រោមពាក្យស្លោកថ្មី «ផលិតកម្មក្នុងស្រុក សម្រាប់ការប្រើប្រាស់ក្នុងស្រុក»៕