អន្តរជាតិ
គណៈប្រតិភូជាន់ខ្ពស់ចិន ទៅកូរ៉េខាងជើងលើកដំបូងតាំងពីវិបត្តិជំងឺកូវីដ-១៩
× ទីភ្នាក់ងារព័ត៌មានរដ្ឋកូរ៉េខាងជើង KCNA បានរាយការណ៍នាថ្ងៃទី២៤ ខែកក្កដាពីដំណើរទស្សនកិច្ចរបស់គណៈប្រតិភូជាន់ខ្ពស់ចិនក្នុងសប្តាហ៍នេះ ដែលជាទស្សនកិច្ចត្រូវបានប្រកាសលើកដំបូងចាប់តាំងពីទីក្រុងព្យុងយ៉ាងបានបិទព្រំដែនរបស់ខ្លួនបន្ទាប់ពីការរីករាលដាលជំងឺកូវីដ-១៩។
បើតាមរបាយការណ៍របស់ KCNA ប្រតិភូចិនដែលមានទាំងសមាសភាពគណបក្សកុម្មុយនីស្ត និងរដ្ឋាភិបាលដឹកនាំដោយសមាជិកការិយាល័យនយោបាយចិន លី ហុងចុង (Li Hongzhong) នឹងធ្វើដំណើរទៅកាន់កូរ៉េខាងជើង តាមការអញ្ជើញរបស់គណបក្សពលករកូរ៉េដើម្បីចូលរួមក្នុងការប្រារព្ធពិធីរំលឹកខួបលើកទី៧០។ ទីក្រុងព្យុងយ៉ាង ចាត់ទុកឱកាសនេះជាថ្ងៃបញ្ជាក់ជ័យជម្នះក្នុងសង្គ្រាមរំដោះមាតុភូមិដ៏អស្ចារ្យ។
កូរ៉េខាងជើង នឹងរៀបចំពិធីអបអរនៅថ្ងៃទី២៧ ខែកក្កដា ដែលជាខួបបញ្ចប់សង្គ្រាមកូរ៉េ។ យ៉ាងណាមិញ កូរ៉េទាំង២ នៅតែស្ថិតក្នុងលក្ខខណ្ឌមានសង្រ្គាមនៅឡើយ។
នេះជាទស្សនកិច្ចរបស់ប្រតិភូបរទេសទី១ នៅកូរ៉េខាងជើងបន្ទាប់ពីបិទព្រំដែនរបស់ខ្លួននៅដើមឆ្នាំ ២០២០ ចំពោះរាល់ការផ្លាស់ប្តូរពាណិជ្ជកម្ម និងការទូតសូម្បីតែជាមួយចិនដែលជាសម្ព័ន្ធមិត្តសេដ្ឋកិច្ច និងនយោបាយដ៏សំខាន់របស់ខ្លួន។ ប្រព័ន្ធផ្សព្វផ្សាយរដ្ឋកូរ៉េខាងជើង មិនបានបញ្ជាក់ពីរបៀបដែលគណៈប្រតិភូចិននឹងធ្វើដំណើរទៅកាន់ទីក្រុងព្យុងយ៉ាង ឬត្រូវឆ្លងកាត់នីតិវិធីចត្តាឡីស័កឡើយ។
កូរ៉េខាងជើងតែងតែរៀបចំព្រឹត្តិការណ៍នៅថ្ងៃឈប់សម្រាកដើម្បីអបអរសាទរមិត្តភាពចិន-កូរ៉េខាងជើង និងការចូលរួមរបស់ចិនក្នុងសង្គ្រាមកូរ៉េឆ្នាំ១៩៥០-១៩៥៣។ ជាឧទាហរណ៍ កាលពីខែកក្កដា ឆ្នាំ ២០២១ មេដឹកនាំកូរ៉េខាងជើងលោក គីម ជុងអ៊ុន បានធ្វើទស្សនកិច្ចដ៏កម្រមួយទៅកាន់វិមានមិត្តភាព ចិនក្នុងរដ្ឋធានីដើម្បីគោរពដល់ទាហានចិនដែលបានជួយប្រយុទ្ធនឹងអាម៉េរិក៕
© រក្សាសិទ្ធិដោយ thmeythmey.com