ខណៈរដ្ឋប្រហារយោធា បានឈានចូលរយៈពេលជាង ២ឆ្នាំ ការប៉ះទង្គិចរវាងយោធា និងកម្លាំងការពារប្រជាជន (PDF) របស់រដ្ឋាភិបាលស្រមោលមីយ៉ាន់ម៉ា នៅតែបន្តកើតមាន។ មិនតែប៉ុណ្ណោះ ដំណោះស្រាយនយោបាយជាក់លាក់នៅតែមិនទាន់មានឡើយ ហើយអាស៊ាន ក៏មិនបានដាក់ចេញវិធានការកម្រិតធ្ងន់ណាដែរ ដោយបន្តចាត់ទុកការឯកភាព៥ចំណុច ជាវិធានការដោះស្រាយវិបត្តិមួយនេះ។ 

 

ក្នុងជំនួបជាមួយលោក Ferdinand Marcos Jr. ប្រធានាធិបតីហ្វីលីពីន ដែលបានបំពេញទស្សនកិច្ចនៅម៉ាឡេស៊ីចាប់ពីថ្ងៃទី២៥ ដល់ថ្ងៃទី២៧ ខែកក្កដា លោក អាន់វ៉ា អ៊ីប្រាហ៊ីម នាយករដ្ឋមន្រ្តីម៉ាឡេស៊ី បានឯកភាពពីភាពចាំបាច់នៃការពង្រឹងតួនាទីរបស់អាស៊ានក្នុងការបញ្ចប់ហិង្សានៅមីយ៉ាន់ម៉ា។ 

 

ទន្ទឹមនេះ លោកអាន់វ៉ា នៅថ្ងៃទី២៦ ខែកក្កដា បានបញ្ជាក់ថា ប្រទេសជិតខាងមីយ៉ាន់ម៉ា គួរតែត្រូវបានផ្តល់ឱ្យនូវកាលៈទេសៈបត់បែន និងពេលវេលាខ្លះ សម្រាប់រក្សាទំនាក់ទំនងជាមួយមីយ៉ាន់ម៉ាលើមូលដ្ឋានក្រៅផ្លូវការ។ យ៉ាងណាមិញ ប្រមុខរដ្ឋាភិបាលម៉ាឡេស៊ី ក៏បានបញ្ជាក់ច្បាស់ៗផងដែរថា ការរក្សាទំនាក់ទំនងបែបនេះ មិនគួរប្តូរទៅនឹងបញ្ហាសិទ្ធិមនុស្ស និងការយកចិត្តទុកដាក់លើជនជាតិភាគតិច រួមទាំងជនជាតិរ៉ូហ៊ីងយ៉ាឡើយ។ 

 

ស្របគ្នានេះ លោក Marcos ក៏បានយល់ឃើញផងដែរថា ការរក្សាទំនាក់ទំនងទ្វេភាគី ជាធាតុដ៏សំខាន់មួយ សម្រាប់ដោះស្រាយបញ្ហាទាំងអស់​ ដែលអាស៊ានកំពុងប្រឈម។ 

 

ខណៈវិបត្តិនយោបាយមីយ៉ាន់ម៉ាកំពុងផុងជ្រៅ លោក Don Pramudwinai រដ្ឋមន្រ្តីការបរទេសថៃ នៅមុនកិច្ចប្រជុំថ្នាក់រដ្ឋមន្រ្តីការបរទេសនៅឥណ្ឌូណេស៊ី បានជួបជាមួយលោកស្រី អ៊ុងសាន ស៊ូជី មេដឹកនាំរដ្ឋាភិបាលស៊ីវិល ដោយស្ងាត់ៗ។ ក្នុងជំនួបនោះ លោក Don បានបញ្ជាក់ថា​លោកស្រីស៊ូជី មានលើកទឹកចិត្តឱ្យមានកិច្ចចរចាគ្រប់ភាគីផង។ 

 

កន្លងមក រដ្ឋមន្រ្តីការបរទេសអាស៊ាន បានចេញសេចក្តីថ្លែងការណ៍រួមមួយ ដោយបន្តចាត់ទុកការឯកភាព៥ចំណុច ជាការដោះស្រាយដ៏សំខាន់លើវិបត្តិមីយ៉ាន់ម៉ា រួមទាំងរិះគន់ការបន្តអំពើហិង្សានៅមីយ៉ាន់ម៉ាផង។ ជាការឆ្លើយតប របបយោធាមីយ៉ាន់ម៉ា បានរិះគន់អាស៊ាន ដែលមិនអើពើ ចំពោះការស្តារសន្តិភាព និងប្រជាធិបតេយ្យរបស់ខ្លួន៕