ជាតិ
លោក ហ៊ុយ យ៉ាឡេង ស្នើឱ្យឈប់ទិតៀនលោក ដែលជាអ្នកដឹកនាំផង និងសម្ដែងរឿងខ្លួនឯងផង
×![]()
ដោយ: ប៉ូ សាគុន
ភ្នំពេញ៖ លោក ហ៊ុយ យ៉ាឡេង ដែលមានជំនាញ និពន្ធសេណារីយោភាពយន្ត ដឹកនាំរឿង និងជាតួសម្ដែងផងនោះ បានស្នើដល់សាធារណជន ឈប់ទិតៀនលោកដែលជាអ្នកដឹកនាំផង និងសម្ដែងរឿងខ្លួនឯងផងនោះ។ លោក យ៉ាឡេង ថាលោកគឺជាអ្នកដឹកនាំរឿង និងជាតួសម្ដែងពេញសិទ្ធិ ដែលចេញពីសាលាជំនាញត្រឹមត្រូវ។
«ខ្ញុំបាននិយាយដដែលៗ គួរតែបញ្ឈប់ពាក្យហ្នឹង។ ខ្ញុំឥឡូវក្លាយទៅជាតួកុន និងជាអ្នកដឹកនាំរឿងពេញសិទ្ធិ។ ខ្ញុំរៀននៅសាលាវិចិត្រសិល្បៈខាងសម្ដែង អ៊ីចឹងអ្នកទាំងអស់គ្នាម្ដេចត្រូវប្រកាន់ខ្ញុំ? បើប្រកាន់ខ្ញុំម្ដេចមិនប្រកាន់ ឈិនឡុង មិនប្រកាន់ ទិនហ្វី? ពួកគាត់សុទ្ធតែជាអ្នកដែលខ្ញុំត្រូវយកគំរូតាម»។ នេះគឺជាការប្រៀបធៀប ដែលលោក ហ៊ុយ យ៉ាឡេង ថាតួអង្គទាំងពីរខាងលើ ផ្ដើមចេញពីតួសម្ដែង ហើយវិវឌ្ឍន៍ទៅដល់ការដឹកនាំ និងហួសទៅដល់ការនិពន្ធផង។
សូមអស់លោក លោកស្រី អញ្ជើញទស្សនាបទសម្ភាស រវាងកញ្ញា ប៉ូ សាគុន ជាមួយអ្នកដឹកនាំសម្ដែង និងជាតួសម្ដែង លោក ហ៊ុយ យ៉ាឡេង ដូចតទៅ៖
មានសាធារណជនមួយចំនួន បានលើកឡើងថា លោក ហ៊ុយ យ៉ាឡេង មិនគួរសម្ដែងដោយខ្លួនឯងច្រើនរឿង ក្នុងភាពយន្តដែលលោកនិពន្ធ និងដឹកនាំឡើយ។ អ្នកខ្លះទៀតបាននិយាយថា ប្រសិនលោក យ៉ាឡេង ជួលតួសម្ដែងផ្សេង ឱ្យសម្ដែងក្នុងរឿងរបស់លោកនិពន្ធ ទំនងជាអាចទទួលបានចំណាប់អារម្មណ៍ ច្រើនជាងអ្នកដឹកនាំរឿង សម្ដែងដោយខ្លួនឯងផ្ទាល់។ ការបញ្ចេញមតិយោបល់នេះ បានកើតឡើងជាយូរមកហើយ ហើយវាបានបន្តរហូតមកដល់បច្ចុប្បន្ន។
ឆ្លើយតបនឹងការលើកឡើងខាងលើ អ្នកដឹកនាំដែលមានជោគជ័យច្រើន លើប្រភេទរឿងខ្មោច និងភ័យរន្ធត់រូបនេះ អះអាងថា អ្នកនិពន្ធ និងអ្នកដឹកនាំ ដឹងសុខភាពរឿង ដឹងប្លង់ ដឹងអារម្មណ៍តួ ស៊ីជម្រៅខ្លាំង។ ប្រសិនអ្នកនិពន្ធ ឬអ្នកដឹកនាំ សម្ដែងដោយខ្លួនឯង រឿងនោះមានលទ្ធភាព សម្ដែងបានល្អជាងការរើសតួពីក្រៅ។
តួសម្ដែងដែលទទួលបានការបណ្ដុះបណ្ដាល ពីសកលវិទ្យាល័យភូមិន្ទវិចិត្រសិល្បៈ ដែលជាសាលាធំបំផុតផ្នែកសិល្បៈសម័យនិងបុរាណ ស្ទើរគ្រប់ទម្រង់ នៅប្រទេសកម្ពុជា ពន្យល់ដូច្នេះ៖«យើងដឹងពីសុខភាពរឿង យើងដឹងពីចរិតតួក្នុងរឿង យើងជាអ្នកចេញប្លង់។ ដូច្នេះបើយើងជាអ្នកសម្ដែង គឺវាបានល្អជាងការដែលយើងប្រាប់គេ ថាយើងចង់បានបែបណា។ ពេលខ្លះតួផ្សេងសម្ដែង អាចមិនល្អដូចអ្វីដែលអ្នកដឹកនាំចង់បាន»។
លោក យ៉ាឡេង សំណូមពរដល់អ្នកដែលប្រកាន់ ឈប់ប្រកាន់នឹងលោកទៀត ដ្បិតអីលោកសម្ដែងមួយឆ្នាំប្រមាណតែមួយរឿងប៉ុណ្ណោះ។ ទោះជាយ៉ាងណាក៏ដោយ អ្នកដឹកនាំរឿងរូបនេះ ថាអ្នកដែលប្រកាន់ ចំពោះការសម្ដែងរបស់លោកមានតិច ហើយអ្នកទាំងនោះ គឺជាអ្នកដែលស្អប់លោក និងមិនដែលមើលកុនរបស់លោកឡើយ។ លោកបន្ថែមថា អ្នកដែលមើលកុនរបស់លោក នៅតែស្រឡាញ់លោក។
«ខ្ញុំក៏មិនទៅសម្ដែងរឿង ដើរតួស្អាត សង្ហា ឬជាកូនទេវបុត្រដែរ ខ្ញុំទៅម្ដេចរួច? ខ្ញុំរើសតែរឿងណាដែលខ្ញុំទៅរួច។ ដូច្នេះខ្ញុំសំណូមពរអ្នកដែលប្រកាន់ សូមឈប់ប្រកាន់ខ្ញុំទៅ»៕
Tag:
សិល្បៈ
ភាពយន្ត
កុន
រឿង
© រក្សាសិទ្ធិដោយ thmeythmey.com
