សៀមរាប៖ រូបបដិមាព្រហ្មមុខបួននៅព្រលានយន្តហោះ សៀមរាប-អង្គរ ស្ថិតក្នងស្រុកសូទ្រនិគម ផ្ទុះការចាប់អារម្មណ៍ច្រើន។ ចាប់អារម្មណ៍ព្រោះថាប្លែក និងថ្មី មិនទាន់មាន ពីមុន។ តាមមន្រ្តីជំនាញ ការជ្រើសរើសបដិមាព្រហ្មមុខបួនដាក់កណ្ដាលព្រលានយន្ត ហោះថ្មីនេះ មានការគិតគូរច្បាស់លាស់ និងមានអត្តន័យពេញលេញផងដែរ។ រូបនេះធ្វើ ស្ពាន់ មានទម្ងន់ប្រមាណ៦តោន និងដំឡើងដោយសិល្បករខ្មែរ នៅខេត្តសៀមរាប។
ព័ត៌មានពិស្ដារ សូមស្ដាប់និងអានបទសម្ភាសរវាងអ្នកសារព័ត៌មានថ្មីៗ ជាមួយលោក លី រស្មី រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាអ្នករៀបចំប្លង់ព្រហ្មមុខបួន នេះដូចទៅ៖
អ៊ីសា រ៉ហានី៖ ការរៀបចំរូបព្រហ្មមុខបួននៅព្រលានយន្តហោះសៀមរាបអង្គរ ស្រុកសូទ្រនិគមហាក់មានភាពទាក់ទាញជាខ្លាំង។ តាមព័ត៌មានទទួលបាន គឺលោកជាអ្នកគូសប្លង់ និងដឹកនាំក្នុង គម្រោងមួយនេះ។ ជាសំណួររបស់ខ្ញុំ តើហេតុអ្វីយើងធ្វើរូបព្រហ្មមុខបួននៅក្នុងព្រលានថ្មីនេះ?
លី រស្មី៖ បាទចង់ជម្រាបប្អូនថា មុននឹងសម្រេចធ្វើរូបព្រហ្មមុខបួនដាក់ក្នុងអាកាសយានដ្ឋានយើងបានប្រជុំ យើងមានគណៈកម្មការតម្រង់ទិសដែលដឹកនាំដោយឯកឧត្តម តឹករ៉េត សំរេច ហើយគណៈកម្មការ ទាំងអស់ក៏បានមូលមាត់គ្នាថា កំណត់យករូបព្រហ្មហ្នឹងដាក់ក្នុងព្រលានយន្តហោះថ្មីនេះ។ ហើយរូបព្រហ្មនេះក៏តំណាងឱ្យព្រហ្មវិហារធម៌ទាំងបួន ដាក់នៅចំចំណុចកណ្ដាលនៃអាកាសយានដ្ឋានអន្ដរជាតិសៀមរាប-អង្គរ ក៏ហាក់បានដូចជាទទួលស្វាគមន៍ចំពោះភ្ញៀវទេសចរជាតិ-អន្ដរជាតិដែលមកពីទិសទាំងបួននោះដែរ។ ហើយទីពីរ ដើម្បីថែរក្សាមរតកវប្បធម៌ សិល្បៈដូនតារបស់ខ្មែរយើងដែលធ្លាប់មាន វត្តមានដែលយើងឃើញរូបព្រហ្មហ្នឹងតាំងពីសតវត្សទី១២មក។ មែនទែនមុននឹងទៀត តែជាប្រាសាទនៅ សតវត្សទី១២ មានដូចជាប្រាសាទបាយ័ន្ត ប្រាសាទតាព្រហ្ម ប្រាសាទផ្សេងៗទៀតដែលមានឆ្លាក់ប្រាង្គ ជាបដិមាព្រហ្មអ៊ីចឹង។ ហើយទីបី យើងឃើញហើយនៅក្នុងប្រទេសខ្មែរយើងបច្ចុប្បន្ននេះ ការតម្កល់រូបព្រហ្មហ្នឹងច្រើនតែធ្វើឱ្យរួចពីដៃ អត់សូវបានគិតគូរទៅលើភាពវិចិត្ររចនាសមស្របទៅតាម មរតកសិល្បៈស្ថាបត្យកម្មខ្មែរប៉ុន្មានទេ។ អ៊ីចឹងបានខ្ញុំនិងក្រុមការងារគិតថា ធ្វើរូបព្រហ្មនេះធ្វើម៉េចឱ្យមានភាពផ្ចិតផ្ចង់គ្រប់ទម្រង់ គ្រប់គ្រឿងទាំងអស់សម្រាប់ពាក់ទៅលើរូបព្រហ្ម គឺត្រូវរំលេចចេញឱ្យអស់ ដើម្បីបង្ហាញជាគំរូមួយសម្រាប់ការសិក្សារូបព្រហ្ម។ ទីបួន ដើម្បីបន្សល់ទុកស្នាដៃឱ្យកូនចៅជំនាន់ក្រោយ អ្នកសិក្សាស្រាវជ្រាវគេអាចសិក្សាតាមបានផង។
ការដំឡើងព្រះព្រហ្មនៅព្រលានយន្តហោះអន្ដរជាតិសៀមរាប-អង្គរ។ រូបភាពពីលោក លី រស្មី
អ៊ីសា រ៉ហានី៖ លោក អាចថារូបព្រហ្មនេះ មានអ្វីពិសេសជាងរូបព្រហ្មកន្លងមក ដែលគេធ្លាប់កសាងឬយ៉ាងណា?
លី រស្មី៖ បាទ យើងធ្វើព្រហ្មកន្លងមកនោះ យើងច្រើនតែធ្វើអត់មានកំពូលខាងលើ។ កំពូលខាងលើកំពូលមានត្របកឈូកបីជាន់។ យើងតែងរំលងរឿងហ្នឹងចោលដោយសារប្រាសាទបុរាណគេធ្វើដែរ ក៏ប៉ុន្ដែសម័យកាលតៗមកវាបាក់បែកអស់ទៅ អ៊ីចឹងអាកន្លែងដែលស្រួចហ្នឹងវាងាយនឹងបាក់ជាងគេ អ៊ីចឹងក៏បាត់បង់ទៅ ហើយខ្មែរយើងក្រោយមកយើងឃើញថា តែងធ្វើអត់កំពូល។ ហេតុដូច្នេះហើយ យើងធ្វើថ្មីនេះ គឺគ្រប់ទម្រង់គ្រប់គ្រឿងទាំងអស់។ ហើយនៅជ្រុងសារពើរសូត្រនៃរូបព្រហ្មដែលស្ថិតនៅតាមអនុទិសទាំងបួនមានរូបទេពប្រណម្យតាមជ្រុងមួយៗហ្នឹងក៏យើងរំលេចចេញដែរ។ ហើយការធ្វើឥឡូវមិនបានរំលេចបែបហ្នឹងទេ ជួនកាលគេដាក់រូបគ្រុឌក៏បាន គេដាក់រូបទេពប្រណម្យក៏បាន។ ហើយនៅលើប្រាង្គមួយៗហ្នឹងគឺមានក្បាច់ យើងហៅក្បាច់នាគមុម ឬក្បាច់សំបកត្រពាំង ដែលដាក់នៅតាមជ្រុងនីមួយៗនៃសារពើរសូត្រ ក៏យើងបានរំលេចចេញឱ្យអស់ដែរ។ អ៊ីចឹងបានខ្ញុំលើកយកមកថា ការរៀបចំរូបព្រហ្មនេះឡើងគឺធ្វើឱ្យត្រឹមត្រូវទៅតាមគ្រប់ទម្រង់ គ្រឿងលម្អនៃសិល្បៈស្ថាបត្យកម្មខ្មែរទាំងអស់ដើម្បីវិចិត្ររចនានៅលើប្រាង្គព្រះព្រហ្មនេះ។
ការដំឡើងព្រះព្រហ្មនៅព្រលានយន្តហោះអន្ដរជាតិសៀមរាប-អង្គរ។ រូបភាពពីលោក លី រស្មី
អ៊ីសា រ៉ហានី៖ លោក លី រស្មី តើការសិក្សាប្លង់ ឬគំរូប្លង់នេះយើងយកចេញពីណាមកដែរ?
លី រស្មី៖ ប្លង់នេះតាមពិតទៅខ្ញុំសិក្សាពីប្រាសាទបាយ័ន្ត ក៏ប៉ុន្តែព្រះភ័ក្រ្តព្រហ្មហ្នឹង យើងឃើញព្រះភ័ក្រ្តនៅប្រាសាទតាព្រហ្មល្អដែរ។ ប្រាសាទបាយ័ន្តក៏យើងសិក្សាតាមគំរូនោះដែរ។ ផ្ទៃមុខហ្នឹង គឺយើងជ្រើសរើសពីប្រាសាទដែលនៅច្រកចូល បានន័យថាខ្លោងទ្វារគោរបុរៈខាងមុខប្រាសាទបាយ័ន្ត ចំកណ្ដាលគេហ្នឹងបាទ។ ព្រោះនៅគោរបុរៈនៅបាយ័ន្តហ្នឹងក៏មានមុខព្រហ្មកំពូលបីដែរ ហើយគេធ្វើបាន ល្អខ្លាំង។
អ៊ីសា រ៉ហានី៖ ព្រហ្មមុខបួនកំពុងដំឡើង និងមិនទាន់រួចរាល់នៅឡើយទេ ប៉ុន្តែឃើញមហាជនមានការ កោតសរសើរច្រើន និងស្កឹមស្កៃ ប៉ុន្តែគេមិនទាន់ដឹងថាវាមានកម្ពស់ ទំហំ ទម្ងន់អីប៉ុន្មានទេ តើឯកឧត្តម អាចជម្រាបបានទេ?
លី រស្មី៖ ចំពោះកម្ពស់ៗប្រមាណ៧ម៉ែត្រ ទម្ងន់វាអាចចូលដល់៦តោន។ យើងសង់ពីស្ពាន់។
ការដំឡើងព្រះព្រហ្មនៅព្រលានយន្តហោះអន្ដរជាតិសៀមរាប-អង្គរ។ រូបភាពពីលោក លី រស្មី
អ៊ីសា រ៉ហានី៖ តើសិល្បករខ្មែរឬបរទេសជាអ្នកដំឡើងរូបនេះឡើង?
លី រស្មី៖ បាទ ស្ពាន់គឺយើងធ្វើនៅខ្មែរទាំងអស់។ សូមជម្រាបថា បន្ទាប់ពីយើងបានសិក្សារូបបដិមាមួយចំនួននៅខេត្តព្រះសីហនុមក យើងមានបទពិសោធន៍ក្នុងការស្លស្ពាន់ ការចាក់ស្ពាន់។ អ៊ីចឹងយើងបានសហការគ្នាជាមួយក្រុមការងារជាងដែលនៅសៀមរាបផ្ទាល់ ដើម្បីធ្វើប៉ាន់ហើយនិងស្លស្ពាន់ចាក់នេះ គឺយើងធ្វើនៅខ្មែរទាំងអស់។
អ៊ីសា រ៉ហានី៖ រូបនោះរៀងធំដែរ តើដំណើរការនៃការរៀបចំឬដំឡើងនោះមានភាពលំបាកយ៉ាងម៉េចខ្លះ ដែរលោក?
លី រស្មី៖ យើងជួបបញ្ហាលំបាកខ្លះដែរ ដោយសាររូបនោះទីមួយធំ ទីពីរគ្រឿងលម្អរូបមានច្រើន ដែលយើងត្រូវធ្វើពុម្ពច្រើនដើម្បីតម្រូវយកមកដាក់នៅលើរូបហ្នឹង។ ខ្ញុំឧទាហរណ៍ដូចជា បាំងខ្លែង ដូចជាទេពប្រណម្យ ដូចជាគ្រឿងលម្អនៅតាមចមត្រចៀក តាមបាំងមកុដខាងលើហ្នឹង និងសន្លឹកសីមា។ អ៊ីចឹងវាមានច្រើនដែលយើងត្រូវធ្វើពុម្ពដាច់ៗពីគ្នាដើម្បីយកមកតុបតែងលម្អ នៅលើរូបព្រះព្រហ្មហ្នឹង។ ហើយផលលំបាកមួយទៀតនឹងគឺ នៅពេលដែលយើងផ្គុំចូលគ្នា ធម្មតាខាងស្ពាន់វាការប្រែប្រួលខ្លះដែរ។ អ៊ីចឹងនៅពេលហ្នឹងគឺយើងត្រូវដុតកម្ដៅច្រើនដើម្បីធ្វើម៉េចឱ្យ រូបព្រហ្មនឹងវាចូលទៅកាន់ទីតាំង និងត្រូវតាមទម្រង់ដើមរបស់រូប។ ហើយគ្រឿងផ្គុំរបស់ព្រហ្មក៏យើងបាន សិក្សាល្អិតល្អន់ដែរ ដោយមានគ្រឿងដែកពីខាងក្នុងដើម្បីចាប់ភ្ជាប់ជាមួយស្ពាន់ហ្នឹងឱ្យវាកាន់តែជាប់បានល្អ។
អ៊ីសា រ៉ហានី៖ មកដល់បច្ចុប្បន្ន តើយើងដំឡើង ឬរៀបចំបានប៉ុន្មានភាគរយហើយ?
ការដំឡើងព្រះព្រហ្មនៅព្រលានយន្តហោះអន្ដរជាតិសៀមរាប-អង្គរ។ រូបភាពពីលោក លី រស្មី
លី រស្មី៖ បើយើងគិតទៅយើងបានប្រមាណ៨៥ភាគរយហើយ។ យើងសង្ឃឹមថាប្រហែលជានៅដើមខែ៨ នឹងបញ្ចប់រួចរាល់។ ការសម្ពោធយើងនឹងធ្វើនៅកំឡុងពេលយើងសម្ពោធអាកាសយានដ្ឋានតែម្ដង ដោយសារនៅពេលនោះនឹងមានពិធីមួយគឺពិធីបើកព្រះនេត្រ នៅពេលនោះបានរូបហ្នឹងពេញលក្ខណៈជា ព្រះព្រហ្មដែលមានឫទ្ធិបារមីសមជារូបព្រហ្មដែលយើងអាចគោរពបូជាបាន។
អ៊ីសា រ៉ហានី៖ ទាក់ទងនឹងប្លង់ព្រលានយន្តហោះសៀមរាប-អង្គរវិញ តើជាការគូសប្លង់របស់លោកដែរ ឬយ៉ាងណា?
លី រស្មី៖ អត់ទេ! ព្រលានយន្តហោះហ្នឹងខាងចិនជាអ្នកគូសប្លង់ ប៉ុន្តែខ្ញុំជួយទៅលើគ្រឿងលម្អស្ថាបត្យកម្មមួយចំនួន ហើយនិងការតុបតែងលម្អខាងក្នុងមួយចំនួនផងដែរ ជាមួយគណៈកម្មការតម្រង់ទិស។
អ៊ីសា រ៉ហានី៖ ចំពោះរូបព្រហ្មខាងលើ ក្រោយដំឡើងរួច តើនឹងមានការបើកឱ្យចូលទស្សនាដែរទេ?
លី រស្មី៖ មានអ្នកសួរច្រើនថាចង់ទៅមើល ខ្ញុំថាអត់ទាន់ទេ ព្រលានយន្តហោះមិនទាន់បើកទេ ទាល់តែយើងបើកហើយយើងអាចចូលទៅមើលបាន ក៏ប៉ុន្តែចូលហ្នឹង ដោយសាររូបព្រហ្មហ្នឹងស្ថិតនៅខាងក្នុងនៃមណ្ឌលកណ្ដាលនៃអាកាសយានដ្ឋានអន្ដរជាតិហ្នឹង យើងចូលបានទាល់តែ Register បន្ទាប់ពីពេលពិនិត្យប៉ាស្ព័រអីចូលទៅទើបយើងឃើញរូបព្រហ្ម គឺទាល់តែអ្នកដំណើរចេញចូលទើបអាចឃើញរូបនោះបាន៕