លោក ហ៊ុន ម៉ានី៖«បទពិសោធន៍មនុស្សចាស់ ជាកត្តាមិនអាចខ្វះបានក្នុងការដើរជាជំហានទៅមុខ»

ជាតិ

នយោបាយជាតិ

លោក ហ៊ុន ម៉ានី៖«បទពិសោធន៍មនុស្សចាស់ ជាកត្តាមិនអាចខ្វះបានក្នុងការដើរជាជំហានទៅមុខ»

31, Jul 2023 , 1:21 pm

រូបភាព

ដោយ: រត្តញូ

លោក ហ៊ុន ម៉ានី បានថ្លែងសរសើរអំពីគុណតម្លៃរបស់ថ្នាក់ដឹកនាំបច្ចុប្បន្ន ដែលជាយុវជនជំនាន់មុន ថាជាធនធានដែលពោរពេញដោយពិសោធន៍ ហើយដែលជាដៃគូដ៏ចាំបាច់សម្រាប់អ្នកបន្តវេនដែលនឹងត្រូវដឹកនាំប្រទេសបន្ត។ លោក ហ៊ុន ម៉ានី បានលើកឡើងអំពីប្រធានបទនេះ នៅព្រឹកថ្ងៃអាទិត្យទី៣០ខែកក្កដា ក្នុងឱកាសដែលលោកធ្វើជាអធិបតីសម្ពោធអគារសិក្សានៃសាលាភាសាបរទេស CAM-ASEAN សាខាក្បាលថ្នល់។

លោក ហ៊ុន ម៉ានី បានលើកឡើងអំពីគុណសម្បត្តិរបស់ធនធានមនុស្សចាស់ នៅក្នុងដំណាក់កាលនៃ ការបន្តវេនដឹកនាំរដ្ឋាភិបាលអាណត្តិទី៧ឆាប់ៗនេះ។ សម្រាប់លោក ម៉ានី ការរួមបញ្ចូលគ្នារវាងបទពិសោធន៍របស់មនុស្សចាស់ និងថាមពលរបស់អ្នកដឹកនាំជំនាន់ក្រោយ នឹងធានាភាពច្បាស់លាស់នៃការដឹកនាំ។

នៅចំពោះមុខលោកគ្រូអ្នកគ្រូនៃសាលាភាសាបរទេស CAM-ASEAN លោក ម៉ានី ថ្លែងទទួលស្គាល់សមត្ថភាពរបស់យុវជនបន្តវេនជំនាន់ក្រោយ។ ទន្ទឹមគ្នានេះ លោកបានកត់សម្គាល់យ៉ាងដូច្នេះថា៖« ទទួលតួនាទីណាមួយ មិនមែនជាការទទួលរឿងសប្បាយទេ។ ជាការរែកធ្ងន់ណាស់។ ដឹកនាំការងារប្រចាំថ្ងៃជារឿងមួយ តែដឹកនាំកែទម្រង់ … ។ ការទទួលខុសត្រូវរបស់វាសនាប្រទេសជាតិ មិនមែនជារឿងលេងសើចទេ។ បទពិសោធន៍មនុស្សចាស់ ជាកត្តាមិនអាចខ្វះបានក្នុងការដើរជាជំហានទៅមុខ។»។

លោក ហ៊ុន ម៉ានី បន្តយ៉ាងដូច្នេះទៀត៖ «អាណត្តិដែលដឹកដោយឯកឧត្តម បណ្ឌិត ហ៊ុន ម៉ាណែត នៅខាងមុខ គឺផ្តោតទាំងស្រុងទៅលើការបន្តបេសកកម្ម និងធានាបរិយាកាស និងការរីកចម្រើនរបស់យើងទាំងអស់គ្នា។ ម៉ោងនេះ អត់មានគិតរឿងអ្នកថ្មី រឿងអ្នកចាស់ទេ។»។

ចំពោះលោក ហ៊ុន ម៉ានី ថ្នាក់ដឹកនាំ ដែលបានដឹកនាំកម្ពុជាមកដល់ពេលនេះ គឺមិនមែនជារឿងសាមញ្ញនោះទេ។ លោក ម៉ានី បញ្ជាក់ថា៖«មនុស្សចាស់បច្ចុប្បន្ន ដែលដឹកនាំប្រទេសពីបាតដៃទទេមកដល់ពេលនេះ គឺមិនធម្មតាទេ។ ពួកគាត់ មានពិសោធន៍ជាក់លាក់។»។

មុនបិទបញ្ចប់ការសំណេះសំណាល លោក ម៉ានី បញ្ជាក់ថា ចំពោះលោក ភាពជាអ្នកដឹកនាំត្រូវមានធាតុផ្សំសំខាន់បីគឺ៖ ទស្សនវិស័យ, ជំនាញ (អនុវត្តការងារជាក់ស្ដែង) និងអត្តចរិត ឬឥរិយាបថបុគ្គល៕