នាព្រឹកថ្ងៃទី១ ខែសីហា ឆ្នាំ២០២៣ សហព័ន្ធកីឡាប្រដាល់គុនខ្មែរ បានចេញសេចក្ដីជូនដំណឹង ពីការស្នើរសុំបន្ដសិទ្ធជាសមាជិកភាពរបស់សហព័ន្ធប្រដាល់គុនខ្មែរ។ ​សេចក្ដីជូនដំណឹងនោះ បានបញ្ជាក់ថា កន្លងមកសហព័ន្ធ ពិនិត្យឃើញថាមានសមាគម ក្លិបមួយចំនួន បានផុតសុពលភាព ហើយមួយចំនួនទៀត បានស្នើសុំថ្មី សុំប្ដូរទីតាំង និងសុំប្ដូរឈ្មោះក្លិប។ ដូច្នេះ ដើម្បីពង្រឹងការគ្រប់គ្រងលើស្ថាប័នទាំងនោះ សហព័ន្ធ តម្រូវឲ្យសមាគម និងក្លិប ដែលផុតសុពលភាពទាំងនោះ ត្រូវដាក់ពាក្យស្នើសុំសុពលភាពឡើងវិញ។ ប្រសិនជា សមាគម ឬក្លិបណាខកខាន សហព័ន្ធ ចាត់ទុកថាបោះបង់ចោល សុពលភាពសមាជិក។
 

លោក ហេង សុខឃន បានបញ្ជាក់ប្រាប់សារព័ត៌មានថ្មីៗ តាមទូរស័ព្ទដូច្នេះថា៖«សហព័ន្ធប្រដាល់គុនខ្មែរ ឱ្យក្លិបបន្តសុពលភាព ឬពង្រឹងដល់ការស្នើសុំជាសមាជិកភាព ក្នុងគោលបំណងដើម្បីបង្កើនការអភិវឌ្ឍគុនខ្មែរ និងធ្វើឲ្យមានស្ដង់ដារ គុណភាព។»។
 

អគ្គលេខាធិការសហព័ន្ធរូបនេះ បន្ដទៀតថា បច្ចុប្បន្ន សហព័ន្ធ មានសមាជិក ក្លិប១២០ ហើយសហព័ន្ធ និងពិនិត្យទៅលើកិច្ចការរៀងរាល់ ៣ខែម្ដង ដើម្បីកុំឲ្យមានបញ្ហា ដូចជាការខ្វះខាតផ្សេងៗ ក្នុងនោះរួមទាំងបញ្ហាថវិការផងដែរ។
 

គួរបញ្ជាក់ផងដែរថា ការស្នើសុំសុពលភាព គឺមានរយៈពេល ៤ឆ្នាំ ពោល គឺមួយអាណត្តិ របស់សហព័ន្ធប្រដាល់កម្ពុជា៕