ការទូទាត់ប្រាក់តាម KHQR Code បានក្លាយជាការពេញនិយមរបស់ប្រជាពលរដ្ឋ ខណៈចំនួនប្រតិបត្តិការសាច់ប្រាក់ ក៏កើនឡើងគួរឱ្យកត់សម្គាល់ដែរ។ គិតត្រឹមខែមេសា ឆ្នាំ២០២៣ ចំនួនប្រតិបត្តិការតាម KHQR Code ជាប្រាក់រៀល មានជិត១៧ម៉ឺនប្រតិបត្តិការ ដែលស្មើនឹងទំហំទឹកប្រាក់ ៩៧ប៊ីលានរៀល។ នេះបើយោងតាមរបាយការណ៍ ចុង ក្រោយរបស់ធនាគារជាតិ។
ប្រព័ន្ធ KHQR ត្រូវបានធនាគារជាតិអភិវឌ្ឍឡើង ដើម្បីផ្ដល់ភាពងាយស្រួលដល់ពលរដ្ឋក្នុងការទូទាត់ប្រាក់ ដែលមានសុវត្ថិភាព ងាយស្រួល និងមានស្ដង់ដារ។ លើសនេះប្រព័ន្ធក៏បានឆ្លើយតបទៅនឹងក្របខណ្ឌគោលនយោបាយសេដ្ឋកិច្ច និងសង្គមឌីជីថលរបស់កម្ពុជាឆ្នាំ២០២១-២០៣៥ ផងដែរ។
បន្ទាប់ពីប្រកាសដាក់ឱ្យប្រើប្រាស់នូវប្រព័ន្ធKHQR បានមួយឆ្នាំ ពោលគឺចាប់ពីថ្ងៃខែកក្កដា ឆ្នាំ២០២២មក ចំនួនប្រតិបត្តិការតាមប្រព័ន្ធនេះ គឺមានការកើនឡើងជាលំដាប់ ដោយការទូទាត់តាមប្រព័ន្ធជាប្រាក់រៀលមានចំនួន ១៦៩ ១៩៥ប្រតិបតិ្តការ (គិតជាប្រាក់មានចំនួន៩៧ប៊ីលានរៀល) ខណៈចំនួនប្រតិបតិ្តការជាដុល្លារតាម KHQR កើនដល់ ២១៦ ០៦៩ ប្រតិបត្តិការ ដែលមានទំហំទឹកប្រាក់ ៣៨លានដុល្លារអាម៉េរិក។ នេះបើយោងតាមរបាយការណ៍ប្រចាំឆមាសទី១ និងទិសដៅការងារឆមាសទី២ ឆ្នាំ២០២៣ របស់ធនាគារជាតិនៃកម្ពុជា។
ជាមួយគ្នានេះ ធនាគារជាតិមានគោលដៅពង្រឹងកិច្ចសហការលើផ្នែកនវានុវត្តន៍ហិរញ្ញវត្ថុ និងប្រព័ន្ធទូទាត់សង់ប្រាក់ឆ្លងដែន ដោយបានតភ្ជាប់ហេដ្ឋារចនាសម្ព័ន្ធប្រព័ន្ធទូទាត់សងប្រាក់ជាមួយប្រទេសចំនួនក្នុងតំបន់ ដូចជា ប្រទេសថៃ ម៉ាឡេស៊ី ឡាវ ប្រទេសវៀតណាម។ ក្រៅពីនេះ ធនាគារជាតិ ក៏បានពង្រឹងផ្នែកនវានុវត្តន៍ និងប្រព័ន្ធទូទាត់ជាមួយប្រទសហ៊ី្វជី កោះសូឡូម៉ូន និងប្រទេសរវ៉ាន់ដា ដើម្បីចែករំលែកចំណេះដឹងពាក់ព័ន្ធនឹងនវានុវត្តន៍ និងការទូទាត់តាមបែបឌីជីថលសម្រាប់សេវាកម្មហិរញ្ញវត្ថុរវាងគ្នាទៅវិញទៅមក។
ធនាគារជាតិបានបញ្ជាក់ថា ប្រព័ន្ធធនាគារផ្លូវការរបស់កម្ពុជា មានធនាគារពាណិជ្ជ៥៩, ធនាគារឯកទេស៩, គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ៥, គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ៨២, គ្រឹះស្ថានឥណទានជនបទ១១៨។ គ្រឹះស្ថានភតិសន្យាហិរញ្ញវត្ថុមានចំនួន១៧, គ្រឹះស្ថានផ្តល់សេវាទូទាត់សងប្រាក់មាន៣៥, ការិយាល័យតំណាងធនាគារបរទេសមាន៦ និងអាជីវកម្មប្តូរប្រាក់មាន ២ ៨៩០កន្លែង។
របាយការណ៍ប្រចាំឆមាសទី១ និងទិសដៅការងារឆមាសទី២ ឆ្នាំ២០២៣ របស់ធនាគារជាតិបានបង្ហាញ ថា ទ្រព្យសកម្មរបស់ប្រព័ន្ធធនាគារមានកំណើន៩,៩ភាគរយ ដែលមានទំហំទឹកប្រាក់សរុប ៨២,២ពាន់លានដុល្លារអាម៉េរិក។ ក្នុងនោះ វិស័យធនាគារគ្របដណ្តប់៨៥ភាគរយ នៃទ្រព្យសកម្មសរុប ស្របពេលវិស័យមីក្រូហិរញ្ញវត្ថុ មានចំណែក១៤,៤ភាគរយ និងវិស័យភតិសន្យាហិរញ្ញវត្ថុមានចំណែក០,៦ភាគរយ៕