អត្ដពលិកកម្ពុជា ដណ្ដើមបានមេដាយបណ្តោះអាសន្នចំនួន១៣បន្ថែមទៀត សរុប៥៦មេដាយ ក្នុងមេដាយមាស២៤ ប្រាក់២៤ និងសំរិទ្ធ៨ ពីការប្រកួតកីឡានគរបាល និងកងពន្លត់អគ្គិភ័យពិភពលោក លើកទី២០ (World Police and Fire Games 2023) នៅទីក្រុង Winnipeg ប្រទេសកាណាដា។ ចំនួនមេដាយនេះ គិតត្រឹមថ្ងៃទី៣ ខែសីហា ឆ្នាំ២០២៣។
មេដាយទាំង ៥៦នោះ រកបានលើប្រភេទកីឡាដូចជា៖
កីឡាចំបាប់ ដណ្ដើមបាន ២៣មេដាយ៖ មាស១០, ប្រាក់១០ និងសំរិទ្ធ៣។
កីឡាបាល់ទះក្នុងសាល ឈ្នះមេដាយមាស១។
កីឡាហែលទឹក ទទួលបាន ១៥មេដាយ៖ មាស៦, ប្រាក់៦ និងសំរិទ្ធ៣។
កីឡាវាយកូនឃ្លីលើតុ ៥មេដាយ៖ មាស២ និងប្រាក់៣។
ការ៉ាតេ ៨មេដាយ៖ មាស៣, ប្រាក់៣ និងសំរិទ្ធ២។
កីឡាលើកទម្ងន់ Bench Press ឈ្នះមេដាយមាស ២។
យូដូ ឈ្នះមេដាយប្រាក់២។
គួរបញ្ជាក់ផងដែរថា ប្រតិភូកីឡាកម្ពុជា ចេញដំណើរទៅប្រកួត នៅព្រឹកថ្ងៃទី២៥ ខែកក្កដា ឆ្នាំ២០២៣។ កីឡា ១៣ប្រភេទនោះ រួមមាន៖ វាយកូនឃ្លីលើតុ, បាល់ទះឆ្នេរខ្សាច់, ចំបាប់, ចំបាប់កាច់ដៃ, កីឡាវាយសី, យូដូ, ជឺជីតស៊ូ, ហែលទឹក, ការ៉ាតេ, វាយកូនគោល, បាល់ទះក្នុងសាល, Bench Press និង Push Pull Lifting ។
ចំពោះការប្រកួតនឹងចាប់ផ្ដើមពីថ្ងៃទី២៨ ខែកក្កដា រហូតដល់ថ្ងៃទី០៦ ខែសីហា ឆ្នាំ២០២៣ ។ ដោយឡែកកម្ពុជា ធ្លាប់ដណ្ដើមបានមេដាយសរុប ៣៣គ្រឿង ក្នុងព្រឹត្តិការណ៍នេះ កាលពីឆ្នាំ២០២២ ក្នុងនោះ មានមេដាយមាស១៥ ប្រាក់៨ និងសំរឹទ្ធ ១០៕