យោងទៅលើការផ្សាយរប​ស់សហព័ន្ធកីឡាអេឡិកត្រូនិកកម្ពុជា នាថ្ងៃទី៣ ខែសីហា លោក ជា ច័ន្ទបរិបូណ៍ ប្រធានសហព័ន្ធ បានទទួលស្គាល់ក្រុម SYS ជាសមាជិកជាផ្លូវការ។ ជាមួយនិងការចេញសេចក្ដីដំណឹងនេះដែរ សហព័ន្ធ ណែនាំខ្លះទៅដល់ក្រុមនេះ ក៏ដូចជាក្រុមកីឡាអេឡិចត្រូនិច ដែលជាសមាជិកទាំងអស់ ឲ្យប្រកាន់ខ្ជាប់នៅក្រមសីលធម៌ ក្នុងនាមជាកីឡា-កីឡាការិនីអាជីព ជាពិសេសគឺការពង្រឹងសមត្ថភាពរបស់ខ្លួន ដើម្បីប្រកួតប្រជែងជាមួយអន្ដរជាតិ។
 

សហព័ន្ធកីឡាអេឡិចត្រូនិកកម្ពុជា បានចេញសេចក្ដីណែនាំ មិនឲ្យក្រុមទាំងអស់ បង្ករជាសកម្មភាពប្រមូលផ្ដុំក្មេងទំនើង, មិនត្រូវគេចម៉ោងសិក្សា, មិនលេងល្បែងស៊ីសង ភ្នាលគ្នា, មិនត្រូវប្រើប្រាស់គ្រឿងញៀន និងជួញដូផ្លូវភេទ ជាពិសេស មិនត្រូវបង្ករជាបញ្ហាដល់គ្រួសារ និងសង្គមជាតិ។
 

ជាមួយគ្នានេះ លោក សំ សុផាន់នី ស្ថាបនិក​ SYS ដែលត្រូវបានគេស្គាល់ថាជាតួអង្គ Paragon ក្នុងវិញ្ញាសា Mobile Legend Bang Bang បានប្រាប់សារព័ត៌មានថ្មីៗ តាមតេលេក្រាមថា ក្រុម SYS មានភាពកក់ក្ដៅ ដោយបានចូលជាសមាជិករបស់សហព័ន្ធ ព្រោះរាល់ពេលមានបញ្ហា ឬកិច្ចការប្រកួតអន្ដរជាតិ សហព័ន្ធ នឹងដើរតួរជាអាណាព្យាបាល ក្នុងការដោះស្រាយ ឬផ្ដល់អនុសាសន៍។
 

ស្ថាបនិករូបនេះ បានបង្ហាញពីជំនឿចិត្តថា ក្រុមរបស់ខ្លួន នឹងអាចប្រកួតប្រជែងជាមួយក្រុម ក្នុងស្រុក និងក្រៅស្រុកបាន ព្រោះពួកបានត្រៀមខ្លួនរួចជាស្រេចសម្រាប់ការសាងស្នារដៃ។ «ពួកខ្ញ៉ំតែងតែមានទំនុចចិត្តខ្ពស់ក្នុងការប្រកួតប្រជែងមិនថាក្នុងស្រុក ឬក្រៅស្រុកពួកយើងត្រៀមខ្លួចរួចជាស្រេច។»។ លោក សុផាន់នី ប្រាប់ដូច្នេះ។
 

គួរបញ្ជាក់ផងដែរថា បច្ចុប្បន្ន ក្រុម SYS មានសមាជិក ចំនួន១២នាក់។ ក្រុមនេះ ចាប់បង្កើតដំបូង នៅថ្ងៃទី២៤ ខែកញ្ញា ឆ្នាំ២០២០ ប៉ុន្ដែទើបត្រូវបានសហព័ន្ធ ទទួលស្គាល់នៅ ឆ្នាំ២០២៣នេះ៕