ពិធី​សម្ពោធ​ទីស្នាក់ការកណ្តាល​ថ្មី​នេះ ប្រព្រឹត្តទៅក្រោមអធិបតីភាព លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា លោក ពន្លឺ តុលា ជាអគ្គនាយកប្រតិបត្តិ និងសមាជិកក្រុមប្រឹក្សាភិបាល របស់ក្រុមហ៊ុន ដាយ អ៊ិឈិ ឡាយហ្វ៍។ 
  

លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជាមានប្រសាសន៍ថា៖ “ខ្ញុំសូមអបអរសាទរដល់ ក្រុមហ៊ុន ដាយ អ៊ិឈិ ឡាយហ្វ៍ កម្ពុជា សម្រាប់ការសម្ពោធទីស្នាក់ការកណ្តាលថ្មីនេះ ដែលបានឆ្លុះបញ្ចាំងពីការរីកចម្រើន និងឆន្ទៈរបស់ក្រុមហ៊ុនក្នុងការធ្វើអាជីវកម្មនៅកម្ពុជារយៈពេលយូរអង្វែង។ ទន្ទឹមនឹងនេះ ទីស្នាក់ការកណ្តាលថ្មីនេះ ក៏បានចូលរួមចំណែកជំរុញដល់វិស័យធានារ៉ាប់រងនៅកម្ពុជាឱ្យកាន់តែមានភាពរីកចម្រើនថែមទៀត ជាមួយនឹងសេវាកម្មធានារ៉ាប់រងអាយុជីវិតកាន់តែសម្បូរបែបប្រកបដោយទំនុកចិត្ដជូនដល់ប្រជាពលរដ្ឋកម្ពុជា និងផ្ដល់ភាពងាយស្រួលដល់អតិថិជនក្នុងការទិញផលិតផលធានារ៉ាប់រង។”​ 
 

អគ្គនាយកប្រតិបត្តិ ​ក្រុមហ៊ុន ដាយ អ៊ិឈិ ឡាយហ្វ៍ លោក ពន្លឺ តុលា មានប្រសាសន៍ថា៖ “ការសម្ពោធទីស្នាក់ការកណ្តាលថ្មីនេះ បង្ហាញជាថ្មីម្ដងទៀតថា​យើងមានឆន្ទៈក្នុងការបម្រើប្រជាជន​កម្ពុជាជាច្រើនឆ្នាំតទៅមុខទៀត។ ទីស្នាក់ការកណ្តាលថ្មីរបស់យើង មានភាពធំទូលាយ ទំនើបជាងមុន និងមានលក្ខណៈពិសេសជាច្រើនដើម្បីបំពេញតម្រូវការ ដែលមានស្រាប់ និងតម្រូវការថ្មី ដែលកំពុងកើនឡើង ដោយសារយើងបានឈានដល់ភាពរីកចម្រើនថ្មីមួយកម្រិតទៀត។ ទីតាំងថ្មីនេះអនុញ្ញាតឱ្យយើងផ្តល់សេវាកម្មកាន់តែប្រសើរ សាមញ្ញ និងមានប្រសិទ្ធភាពខ្ពស់ជូនដល់អតិថិជនរបស់យើង និងភាគីពាក់ព័ន្ធទាំងអស់ពីកន្លែងតែមួយ។”
  

ទីស្នាក់ការកណ្តាលថ្មី ដែលមានភាពធំទូលាយ និងផាសុកភាពល្អ ​គឺជានិម្មិតរូបនៃមហិច្ឆតារបស់ក្រុមហ៊ុន ដាយ អ៊ិឈិ ឡាយហ្វ៍ ដើម្បី​ក្លាយ​ជា​ក្រុមហ៊ុន​ធានា​រ៉ាប់រង​អាយុ​ជីវិត​ឈានមុខគេនៅក្នុង​ប្រទេសកម្ពុជា។ ទីស្នាក់ការកណ្តាលថ្មីនេះ មានទីតាំងស្ថិតនៅអគារសាមគ្គីក្នុងតំបន់ពាណិជ្ជកម្មដ៏សំខាន់មួយក្នុងខណ្ឌទួលគោក និងត្រូវបានរចនាឡើងដើម្បីផ្តល់បទពិសោធន៍ ផលិតភាព និងការប្រាស្រ័យទាក់ទងគ្នាល្អបំផុត។
 

ជាមួយគ្នានេះដែរ ទីស្នាក់ការកណ្តាលថ្មីក្រុមហ៊ុន ដាយ អ៊ិឈិ ឡាយហ្វ៍ ផ្ដល់លក្ខណៈពិសេស និងបំពាក់ជាមួយសំភារៈបរិក្ខារជាច្រើនមានដូចជា កន្លែងចតរថយន្តផ្ដល់ភាពងាយស្រួល កន្លែងរង់ចាំប្រកបដោយផាសុកភាព បន្ទប់ប្រជុំដ៏ធំទូលាយ កន្លែងសម្រាប់ការបណ្ដុះបណ្ដាល និងកន្លែងហាត់ប្រាណផងដែរ។ នៅតាមជញ្ជាំងនៅក្នុងទីស្នាក់ការកណ្តាលថ្មីនេះ ត្រូវបានលម្អទៅដោយគំនូរបង្ហាញវប្បធម៌ខ្មែរ និងជប៉ុន ដែលគូរដោយវិចិត្រករខ្មែរ។

  

 

ក្រុមហ៊ុន ដាយ អ៊ិឈិ ឡាយហ្វ៍ គឺជាក្រុមហ៊ុនធានារ៉ាប់រងអាយុជីវិត ដែលមានការរីកលូតលាស់លឿនមួយនៅក្នុងប្រទេសកម្ពុជាក្នុងរយៈពេលត្រឹមតែជាង ៤ ឆ្នាំប៉ុណ្ណោះ។ ក្រុមហ៊ុន ដាយ អ៊ិឈិ ឡាហ្វ៍ កម្ពុជា  ជាក្រុមហ៊ុនបុត្រសម្ព័ន្ធរបស់ក្រុមហ៊ុន Dai-ichi Life Holdings, Inc. (“ដាយ អ៊ិឈិ ឡាយហ្វ៍ ហូលឌីង ឬ DLHD”) ដែលជាក្រុមហ៊ុនធានារ៉ាប់រងអាយុជីវិតឈានមុខគេក្នុងប្រទេសជប៉ុនអស់រយៈពេលជាង ១២០​ ឆ្នាំ ​ជាប្រវត្តិសាស្ត្រ។ DLHD ទទួលបានការវាយតម្លៃ A+ ដោយ S&P និងបានចុះបញ្ជីនៅលើទីផ្សារភាគហ៊ុនតូក្យូស្តុកអ៊ិ​ច​ឆេង (Tokyo Stock Exchange) ។​
 

ចាប់តាំងពីបង្កើតក្រុមហ៊ុន DLHD ក្នុងឆ្នាំ ១៩០២ មក ក្រុមហ៊ុន ដាយ អ៊ិឈិ ឡាយហ្វ៍ បានប្តេជ្ញាចិត្តឈរនៅក្បែរអតិថិជនរបស់យើងជានិច្ច និងមនុស្សជាទីស្រឡាញ់របស់ពួកគេអស់មួយជីវិត និងខិតខំប្រឹងប្រែងរួមគ្នាក្នុងការផ្តល់ជូននូវ “ភាពស្ងប់ចិត្ត” ក្រោមទស្សនៈវិស័យ “អតិថិជនជាចម្បង”។ ក្រុមហ៊ុនបានរួមចំណែកផ្តល់ជូននូវភាពស្ងប់ចិត្តតាមរយៈការផ្តល់សេវាធានារ៉ាប់រងអាយុជីវិត និងសេវាហិរញ្ញវត្ថុផ្សេងៗដល់សហគមន៍ក្នុងមូលដ្ឋាន។  
 

*ក្រុមហ៊ុន ដាយ អ៊ិឈិ ឡាយហ្វ៍ ហូលឌីង មានគ្រឹះមូលធនដ៏រឹងមាំជាមួយនឹងទ្រព្យសម្បត្តិសរុបចំនួន ៤៦១ ពាន់លានដុល្លារ និងបុព្វលាភធានារ៉ាប់រង និងប្រាក់ចំណូលផ្សេងៗទៀតជាង ៤៩ពាន់លានដុល្លារ (គិតត្រឹមថ្ងៃទី ៣១ ខែមីនា ឆ្នាំ២០២៣) ៕