លោក Ten Hag បានទម្លាក់តំណែងប្រធានក្រុមរបស់ខ្សែការពារវ័យ ៣០ឆ្នាំ ដែលបានបង្ហាញខ្លួនលេងត្រឹម ៨ប្រកួតប៉ុណ្ណោះនៅរដូវកាលមុន ក្នុងក្របខណ្ឌ Premier league។ Raphael Varane, Lisandro Martinez និង Victor Lindelof កាន់កាប់តួនាទីខ្សែការពារកណ្តាលរបស់ក្រុម។
 

កាលសប្តាហ៍មុនប្រព័ន្ធផ្សព្វផ្សាយរបស់អង់គ្លេស បានរាយការណ៍ថា West Ham United បានយល់ព្រមលើកិច្ចព្រមព្រៀងដែលមានតម្លៃប្រមាណ ៣០លានផោន (៣៨លានដុល្លារ) សម្រាប់ Maguire។ Maguire ជាខ្សែការពារដែលមានតម្លៃខ្លួនថ្លៃបំផុតប្រចាំនៅប្រវត្តិសាស្ត្រ Premier League បន្ទាប់ពីផ្ទេរពីក្រុម Leicester City ក្នុងឆ្នាំ ២០១៩ តម្លៃ ៨០លានផោន (១០០លានដុល្លារ)។
 

មុនការប្រកួតបើកឆាកក្របខណ្ឌ Premier League សម្រាប់ក្រុមបិសាចក្រហមមកដល់ ក្នុងសន្និសីទកាសែតលោក Erik ten Hag បាននិយាយថាខ្សែការពារវ័យ ៣០ឆ្នាំ គួរតែប្រយុទ្ធដើម្បីរកតំណែងក្នុងក្រុម ឬគេនឹងត្រូវចាកចេញតែម្តង។
 

«គេគួរតែប្រកួតប្រជែងសម្រាប់តំណែងរបស់គេ ហើយគេមានសមត្ថភាពធ្វើជាខ្សែការពារកម្រិតខ្ពស់មួយរូប។ គេគឺជាកីឡាករការពារដ៏ល្អសម្រាប់អង់គ្លេស ហើយខ្ញុំទទួចថាគេនឹងធ្វើបានល្អសម្រាប់យើង តែគេត្រូវបានពង្រឹងសមត្ថភាព។ នៅពេលគេគ្មានទំនក់ចិត្តគ្រប់គ្រាន់សម្រាប់ការប្រយុទ្ធ ដូច្នេះគេត្រូវតែទៅ ត្រូវតែសម្រេចចិត្ត ខ្ញុំសប្បាយចិត្តជាមួយគេ អ្នកត្រូវតែជាកីឡាករកម្រិតខ្ពស់មួយរូប ដែលមិនមែនល្អត្រឹមតែការចាប់ផ្តើមតែប៉ុណ្ណោះទេ តែអ្វីគ្រប់យ៉ាងអាចផ្លាស់ប្តូរ។»។ Ten Hag បាននិយាយពី Maguire បែបនេះ។
 

ការប្រកួតក្របខណ្ឌ Premier League រដូវកាលថ្មីក្រុម Manchester United នឹងត្រូវស្វាគមន៍ក្រុម Wolverhampton Wanderers សម្រាប់ជំនួបដំបូងនៃក្រុមទាំងពីរនេះ នៅរាត្រីថ្ងៃទី១៤ ខែសីហា នាវេលាម៉ោង ២យប់រំលងអាធា្រត្រ៕