ជាតិ
នាយកប្រតិបត្តិអង្គការតម្លាភាព៖ «យុវជនកម្ពុជាដឹងពីបញ្ហាសង្គម ប៉ុន្តែពួកគេមិនហ៊ាននិយាយ»
×![]()
ដោយ: ប៉ូ សាគុន
ភ្នំពេញ៖ លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា បានលើកឡើងថា កម្ពុជាមានកម្លាំងយុវជនប្រមាណ៦០ភាគរយ ដែលមានអាយុក្រោម៣៥ឆ្នាំ។ នេះគឺជាសក្កានុពលដ៏ធំរបស់កម្ពុជា។ ជាមួយគ្នានេះ អង្គការតម្លាភាពកម្ពុជា ក៏បានស្ទង់មតិថ្នាក់ជាតិទ្រង់ទ្រាយធំមួយ រកឃើញថាយុវជនកម្ពុជាភាគច្រើន មិនហ៊ាននិយាយពីបញ្ហាសង្គមឡើយ បើទោះបីជាពួកគេមើលឃើញថា បញ្ហាទាំងនោះរាំងស្ទះដល់ការអភិវឌ្ឍជាតិក្ដី។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា បានប្រាប់សារព័ត៌មានថ្មីៗថា យុវជនបានដឹងពីបញ្ហាសង្គម ផលប៉ះពាល់នៃអំពើពុករលួយ បញ្ហាសេវាសាធារណៈ បញ្ហាបរិស្ថាន និងកិច្ចការសង្គមដទៃទៀត ប៉ុន្ដែពួកគេមិនហ៊ាននិយាយពីបញ្ហាទាំងនោះឡើយ។
នាយកប្រតិបត្តិរូបនេះ លើកឡើងថា យុវជនមានភាពភ័យខ្លាច ដោយសារបរិយាកាសសង្គម និងនយោបាយ ត្រូវបានរឹតត្បិត។ លោកមើលឃើញថា សិទ្ធិសេរីភាពនៃការបញ្ចេញមតិ សិទ្ធិសេរីភាពក្នុងការចូលរួមសកម្មភាពសង្គម និងការបញ្ចេញភាពមិនពេញចិត្ត តាមរយៈការធ្វើបាតុកម្មជាដើម ត្រូវបានរឹតត្បិត នា៥ឆ្នាំចុងក្រោយនេះ ដែលធ្វើឱ្យយុវជនរឹតតែខ្លាច។
«យើងបានសួរគាត់(យុវជន) ដោយសារតែប្រទេសកម្ពុជាយើង មានបញ្ហាទាំងនេះច្រើន តើប្អូនៗចង់ចូលរួម ក្នុងកិច្ចការសង្គមដែរឬទេ? ភាគតិចណាស់ ដែលគាត់ឆ្លើយថា គាត់ចង់ចូលរួម។ គាត់ថាមូលហេតុចម្បង ដែលគាត់មិនចង់ចូលរួមមាន២ ទី១គឺខ្លាច ដោយសារបរិយាកាសមិនអំណោយទាន ដល់ការចូលរួម។ ទី២ គឺមិនមានឱកាសក្នុងការចូលរួម»។ នេះជាការបញ្ជាក់បន្ថែមរបស់លោក ប៉ិច ពិសី។
ដើម្បីឱ្យយុវជន មានសុវត្ថិភាពផ្លូវចិត្ត ក្នុងការចូលរួមជួយអភិវឌ្ឍជាតិ លោក ប៉ិច ពិសី ថារដ្ឋាភិបាលគួរតែបើកលម្ហសិទ្ធិសេរីភាព ក្នុងការចូលរួម សិទ្ធិសេរីភាពក្នុងការបញ្ចេញមតិ ពិសេសការបញ្ចេញមតិគ្រប់រូបភាព រួមទាំងការប្រើប្រាស់បណ្ដាញសង្គម ក៏គួរត្រូវបានលើកទឹកចិត្តដែរ។ រដ្ឋាភិបាលគួរ ប្រើប្រាស់កម្លាំង និងសក្ដានុពលយុវជន ក្នុងការចូលរួមកិច្ចការងារសង្គម ចៀសជាងការរឹតត្បិត។ លោកថា ប្រសិនមានការចូលរួមពីយុវជន នៅគ្រប់វិស័យប្រទេសជាតិនឹងរីកចម្រើន។
ជាមួយគ្នានោះ អង្គការសង្គមស៊ីវិល គួរតែជំរុញយុវជនឱ្យធ្វើសកម្មភាព ចូលរួមក្នុងមូលដ្ឋាន និងភូមិឃុំរបស់ពួកគេ។ ជំរុញឱ្យពួកគេ ចូលរួមបង្កើតគោលនយោបាយផ្សេងៗ ក្នុងក្រុមប្រឹក្សាឃុំសង្កាត់ និងការអភិវឌ្ឍភូមិឃុំ។
បន្ថែមពីនោះ លោកក៏បានលើកទឹកចិត្តយុវជនដែរ ឱ្យជំនះភាពភ័យខ្លាចរបស់ខ្លួន ដើម្បីចូលរួមផ្ដល់មតិយោបល់ដល់រដ្ឋាភិបាល ក្នុងន័យជួយកែលម្អសង្គម និងធ្វើឱ្យជាតិរីកចម្រើន។
លោក ប៉ិច ពិសី សង្កត់ធ្ងន់ថា ប្រទេសជាតិមួយមិនអាចរីកចម្រើនបានទេ ប្រសិនប្រជាពលរដ្ឋ១ភាគ៣នៃប្រទេសនោះ មិនសកម្ម។ ប្រជាពលរដ្ឋគួរសួរខ្លួនឯងថា តើគួរទុកវាសនាប្រទេសជាតិ នៅចោលឬក៏យ៉ាងណា?៕
Tag:
សង្គម
យុវជន
© រក្សាសិទ្ធិដោយ thmeythmey.com
