កីឡាអន្តរជាតិ
អន្តរជាតិ
Kane ថាផ្លាស់ទៅ Bayern Munich ដើម្បីឈ្នះពាន
× Harry Kane បានចាកចេញពី Tottenham Hotspur ដែលរូបគេបានប្រើពេលស្នាក់នៅរយៈពេល ១៩ឆ្នាំ ដើម្បីទៅចូលរួមជាមួយនឹងក្រុម Bayern Munich។ ប្រធានក្រុមអង់គ្លេសរូបនេះ ថាផ្លាស់ទៅក្រុមយក្សអាល្លឺម៉ង់ ដើម្បីស្វែងរកការឈ្នះពានរង្វាន់លើកដំបូងក្នុងអាជីព។
កីឡាករវ័យ ៣០ឆ្នាំ បានចូលរួមជាមួយនឹងក្រុម Bayern Munich ជាមួយកិច្ចសន្យារយៈពេល ៤ឆ្នាំ ដោយតាមរបាយការណ៍ការផ្ទេរមានតម្លៃ ១០០លានអឺរ៉ុ (១១០លានដុល្លារ) បូករួមជាមួយនឹងប្រាក់បូកបន្ថែមផង។ Kane បានបង្ហាញខ្លួនលេងលើកដំបូងឱ្យក្រុមអំឡុងការប្រកួត Bayern រងបរាជ័យ ៣-០ ក្រោមថ្វីជើង RB Leipzig ក្នុងពានរង្វាន់ German Super Cup។
ទោះជារកបានគ្រាប់បាល់ច្រើនរាល់ការប្រកួតពីមួយរដូវកាលទៅមួយរដូវកាលនៅ Premier League និង Champions League ក្តី តែខ្សែប្រយុទ្ធវ័យ ៣០ឆ្នាំ មិនធ្លាប់បានឈ្នះពានរង្វាន់ទាំងនៅកម្រិតអន្តរជាតិ និងកម្រិតក្លិបទាល់តែសោះ ជាពិសេសជាមួយនឹងក្រុម Tottenham Hotspur។
និយាយក្នុងសន្និសីទកាសែត Kane ថារូបគេចង់ទទួលបានភាពល្អប្រសើរនៃអាជីពរបស់ខ្លួន ហើយចង់ឈ្នះពានរង្វាន់អន្តរជាតិនានា ក៏ដូចជាពានរង្វាន់ Champions League។
«ក្នុងអាជីពរបស់ខ្ញុំ យើងចង់បន្តភាពល្អប្រសើរ ជួយរុញច្រានខ្លួនខ្ញុំបន្ថែមទៀតដើម្បីទៅឱ្យបានឆ្ងាយជាងនេះ។ ខ្ញុំចឹងប្រកួតនៅកម្រិតអន្តរជាតិ ក្នុងការប្រកួត Champions League និងប្រជែងសម្រាប់ពានរង្វាន់នានារាល់ឆ្នាំ ការផ្លាស់មកកាន់ក្រុម Bayern នឹងផ្តល់ឱ្យខ្ញុំនូវឱកាស ខ្ញុំក៏សម្លឹងមើលទៅមុខចំពោះការប្រកួតប្រជែងមួយនេះ។»។ Kane បាននិយាយបែបនេះ។
នៅ Spurs ខ្សែប្រយុទ្ធសញ្ជាតិអង់គ្លេសរកបានគ្រាប់បាល់សម្រាប់ក្រុមចំនួន ២៨០គ្រាប់ ពីការបង្ហាញខ្លួន ៤៣០លើកនៅក្លិប ហើយនៅជម្រើសជាតិរូបគេបង្ហាញខ្លួន ៨៤លើក រកបាន ៥៨គ្រាប់។ Kane ក៏ជាកីឡាករទីពីរដែលរកបានគ្រាប់បាល់នៅ Premier League ច្រើនជាងគេដល់ទៅ ២១៣គ្រាប់ បន្ទាប់ពីលោក Alan Shearer ដែលមានគ្រាប់បាល់ចំនួន ២៥០គ្រាប់ លើស Kane ចំនួន ៤៧គ្រាប់។
Bayern កំពុងស្វែងរកខ្សែប្រយុទ្ធមុតស្រួច ចាប់តាំងពី Robert Lewandowski បានចាកចេញកាលពីឆ្នាំមុន ហើយក្រុមចាប់ផ្តើមជួបបញ្ហាក្នុងការបញ្ចប់ទី។ កាលឆ្នាំ ២០២០ Bayern Munich ជាក្រុមម្ចាស់ជើងឯក Champions League ដែលជាពានអឺរ៉ុបចុងក្រោយដែលគេបានឈ្នះ ហើយបញ្ចប់រដូវកាលមុនដោយឈ្នះពាន Bundesliga នោះក៏ជាពានរង្វាន់លើកទី១១ ជាប់គ្នាសម្រាប់ពួកគេ៕
Tag:
Harry Kane
Bayern Munich
© រក្សាសិទ្ធិដោយ thmeythmey.com