លោកវ៉ាង យី រដ្ឋមន្រ្តីការបរទេសចិន និងជាប្រធានការិយាល័យគណៈកម្មការកិច្ចការបរទេសរបស់បក្សកុម្មុយនីស្តចិន បានធ្វើទស្សនកិច្ចនៅថ្ងៃទី១២ និងថ្ងៃទី១៣ ខែសីហា។ ក្នុងដំណើរទស្សនកិច្ចស្របពេលខួប ៦៥ឆ្នាំនៃការទូតប្រទេសទាំងពីរនេះ លោកវ៉ាង បានជួបថ្នាក់ដឹកនាំកម្ពុជា ក៏ដូចជាបានជជែកពីកិច្ចសហប្រតិបត្តិការ ពាណិជ្ជកម្ម និងមិត្តភាពជាដើម។ 

 

ក្រោយដំណើរទស្សនកិច្ចខាងលើ អ្នកនាំពាក្យក្រសួងការបរទេសចិន បានបញ្ជាក់ថា ចិន គាំទ្រកម្ពុជា ក្នុងការស្វែងរកមាគ៌ាអភិវឌ្ឍដែលស្របនឹងលក្ខខណ្ឌជាតិ រួមទាំងការការពារអធិបតេយ្យ ឯករាជ្យ និងសេចក្តីថ្លៃថ្នូររបស់ជាតិ និងត្រៀមខ្លួនសម្រាប់កិច្ចសហប្រតិបត្តិការផ្សេងៗ។ 

 

«ចិន ត្រៀមខ្លួនរួចជាស្រេចដើម្បីពង្រឹងសាមគ្គីភាព និងកិច្ចសហប្រតិបត្តិការជាមួយកម្ពុជា ពង្រីកក្របខណ្ឌកិច្ចសហប្រតិបត្តិការទ្វេភាគីឆកោណត្បូងពេជ្រ និងកសាងសហគមន៍កម្ពុជា-ចិនជាមួយអនាគតរួមក្នុងយុគថ្មី»។ លោក Wang បានសង្កត់ធ្ងន់បែបនេះ នៅក្នុងសន្និសីទសារព័ត៌មាន នៅថ្ងៃទី១៤ ខែសីហា។ 

 

ក្របខណ្ឌកិច្ចសហប្រតិបត្តិការទ្វេភាគីត្បូងពេជ្ររវាងកម្ពុជា និងចិន គឺផ្តោតលើវិស័យចំនួន៦ (ឆកោណ) ក្នុងនោះមាន កិច្ចសហប្រតិបត្តិការនយោបាយ, សមត្ថភាព និងគុណភាពផលិតកម្ម, កសិកម្ម, ថាមពល, សន្តិសុខ និងការផ្លាស់ប្ដូររវាងប្រជាជន និងប្រជាជន។ 

 

សូមបញ្ជាក់ថា ក្របខណ្ឌកិច្ចសហប្រតិបត្តិការទ្វេភាគីឆកោណត្បូងពេជ្រ ត្រូវបានបង្កើតឡើងនៅក្នុងខែកុម្ភៈ កន្លងទៅស្របពេលទំនាក់ទំនងប្រទេសទាំងពីរ ឈានចូលដល់ខួប ៦៥ឆ្នាំ៕