ជាតិ
សេដ្ឋកិច្ច
លោក សៀ ឬទ្ធី៖ យើងគួរបង្វែរពីការវិនិយោគដីធ្លី ទៅលើការដឹកជញ្ជូនវិញ លោក សៀ ឬទ្ធី អគ្គនាយកក្រុមហ៊ុន World Bridge Group ថ្លែងចំណាប់អារម្មណ៍ក្នុងវេទិកាធុរកិច្ចឆ្នាំ២០២៣ ដែលរៀបចំដោយសមាគមឧកញ៉ាកម្ពុជា នៅសណ្ឋាគារហ្គោឌិន ស៊ីធី កាលពីថ្ងៃទី១១សីហា។
× លោក សៀ ឬទ្ធី អគ្គនាយកក្រុមហ៊ុន World Bridge Group បានជំរុញឱ្យវិនិយោគិនក្នុងស្រុក បង្វែរពីការរកស៊ីពីវិស័យដីធ្លី ទៅលើវិស័យដឹកជញ្ជូនវិញ ស្របពេលដែលស្ថានភាពជាប់ក្នុងវិស័យអចលនទ្រព្យកម្ពុជា អាចអូសបន្លាយក្នុងរយៈពេលវែង។ បើតាមអ្នកជំនួញក្នុងវិស័យសំណង់ អចលនទ្រព្យ ដឹកជញ្ជូន និងឡូជីស្ទិករូបនេះ សព្វថ្ងៃវិស័យដឹកជញ្ជូនកម្ពុជាមានកំណើនល្អ។
ដ្បិតតែវិស័យដឹកជញ្ជូនកំពុងមានសក្តានុពល ប៉ុន្តែក៏ទាមទារឱ្យមានការចូលរួមអភិវឌ្ឍ បន្ថែមពីវិនិយោគក្នុងស្រុក ដើម្បីធ្វើឱ្យវិស័យនេះកាន់តែមានប្រកួតប្រជែង និងទាក់ទាញលំហូរទុនវិនិយោគពីបរទេស។ «អ្នកផលិតសម្លឹងឃើញកម្ពុជា ប៉ុន្តែការផលិតផលដែលមានភាពប្រកួតប្រជែងលើតម្លៃដើម វាអាស្រ័យទៅលើដឹកជញ្ជូន ពីព្រោះវិស័យដឹកជញ្ជូនពាក់ព័ន្ធទៅនឹងការរកស៊ីពី១៥ ទៅ២០ភាគរយ នៃតម្លៃដើម»។ លោក សៀ ឬទ្ធី ថ្លែងបែបនេះក្នុងវេទិកាធុរកិច្ចកម្ពុជាឆ្នាំ២០២៣ នៅសណ្ឋាការហ្គោឌិន ស៊ីធី នាថ្ងៃទី១១សីហា។
លោក សៀ ឬទ្ធី បន្តថា ៖ «ដើម្បីឱ្យវិស័យដឹកជញ្ជូនយើងមានភាពប្រកួតប្រជែងបាន យើង ត្រូវគិតអំពីហេដ្ឋារចនាសម្ព័ន្ធ(Logistics Infrastructure)។ នេះជារឿងមួយដែលរដ្ឋាភិបាល កំពុងវិនិយោគ តែវិស័យឯកជនក៏ត្រូវវិនិយោគរួមដែរ»។ បើតាមអ្នកជំនួញរូបនេះ ការ វិនិយោគរបស់វិស័យឯកជននោះ មានការដឹកជញ្ជូនដោយមានការភ្ជាប់ជាមួយឡាន ឃ្លាំង (ឃ្លាំងស្តុកទំនិញទូទៅ, ឃ្លាំងត្រជាក់...) និងភ្ជាប់ជាមួយកន្លែងវេចខ្ចប់ទំនិញ ឬកន្លែង ប្រមូលផ្តុំដែលធ្វើឱ្យវិស័យដឹកជញ្ជូនមានភាពងាយស្រួលហើយ មានតម្លៃដើមទាប រួមទាំង មានភាពប្រកួតប្រជែង។
លោក សៀ ឬទ្ធី បានលើកឧទាហរណ៍មកពន្យល់យ៉ាងដូច្នេះ៖ « ការប្រមូលសម្ភារកសិកម្ម! យើងដឹកកសិកម្មពីខេត្តផ្សេងៗ យកមកប្រមូលផ្តុំតែនៅរាជធានីភ្នំពេញនោះ ធ្វើឱ្យការដឹក ជញ្ជូននោះថ្លៃបាត់ទៅហើយ[...]។ ដូច្នេះយើងត្រូវមានការប្រមូលផ្តុំមួយដែលមានលក្ខណៈតំបន់ ដើម្បីធ្វើឱ្យការដឹកជញ្ជូន នោះវាថោក។ [ដូចជាផលិតផលកសិកម្ម] នៅសៀមរាប កំពង់ធំ ឧត្តរមានជ័យ កំពង់ ចាម...ទាំងអស់ យើងត្រូវបង្កើតតំបន់ប្រមូលផ្តុំមួយ»។ នេះជារឿងមួយដែលធ្វើឱ្យការដឹក ជញ្ជូនរបស់កម្ពុជាមានភាពប្រកួតប្រជែង ព្រោះកាលណាគេនិយាយអំពីការដឹកជញ្ជូន គឺមានទាំងទៅនឹងមក ដោយមិនអាចមានតែទំនិញទៅហើយអត់មានទំនិញមកទេ ព្រោះវា ធ្វើការដឹកជញ្ជូនថ្លៃ។ នេះជាចំណុចទីមួយ។
ចំណុចទីពីរ លោក សៀ ឬទ្ធី បន្តនិយាយថា ការដឹកជញ្ជូន(Logistics) គឺជាពេលវេលា។ ដើម្បីឱ្យពេលវេលាលឿន គឺវាអាស្រ័យទៅលើឡានល្អ និងហេដ្ឋារចនាសម្ព័ន្ធផ្លូវថ្នល់ត្រូវ តែល្អ។ ចំណុចទីបី គឺការតភ្ជាប់ ព្រោះបើនិយាយអំពីការដឹកជញ្ជូនដែលថោក គឺជាការដឹក ជញ្ជូនតាមផ្លូវទឹក ប៉ុន្តែសព្វថ្ងៃនៅកម្ពុជាមិនទាន់មានការវិនិយោគណាមួយ ទៅលើវិស័យ តាមផ្លូវទឹកនៅឡើយទេ។
«ប៉ុន្តែការពិត សព្វថ្ងៃយើងមានសក្តានុពលច្រើនណាស់ ក្នុងការវិនិយោគទៅលើវិស័យ ដឹកជញ្ជូនតាមផ្លូវទឹកតាមដងទន្លេយើង ដែលយើងអាចធ្វើបាន»។ បើតាម លោក សៀ ឬទ្ធី អ្នកមានដើមទុន គឺអាចវិនិយោគបានទៅលើវិស័យដឹកជញ្ជូន ក្នុងការភ្ជាប់ពីផ្លូវទឹកមកឡាន ពីឡានមករថភ្លើង ហើយពីរថភ្លើងទៅកប៉ាល់...។
«ខ្ញុំសូមឱ្យមិត្តភក្តិយើងនៅទីនេះជាឧកញ៉ាទាំងអស់ ឬអ្នកឧកញ៉ា គួរគិតគូរក្នុងការវិនិយោគ[លើវិស័យដឹកជញ្ជូន]។ ព្រោះ យើងឃើញថាវិស័យ រោងចក្រ កាន់តែមានភាពផុសផុល ប៉ុន្តែវិស័យដឹកជញ្ជូន ក៏ជាវិស័យមួយដែលយើងគិតថា វាមាននិរន្តរភាព និងអាចមានចំណូល ហើយយើងគិតថា យើងនឹងបង្វែរការវិនិយោគទៅ លើបញ្ហាដីធ្លី នាំគ្នាមកវិនិយោគទៅលើបញ្ហាដឹកជញ្ជូនឡើងវិញ»។ លោក សៀ ឬទ្ធីបន្ថែមបែបនេះ៕
© រក្សាសិទ្ធិដោយ thmeythmey.com