បើតាមនាយកប្រតិបត្តិសហព័ន្ធបាល់ទាត់នូវែលសេឡង់លោក Andrew Prag​nell ប្រទេសនូវែលសេឡង់រីករាយចំពោះការទទួលបានបទពិសោធន៍នៃការរៀបចំបាល់ទាត់ស្តី្រ World Cup 2023 ហើយបង្ហាញក្តីសង្ឃឹមថានឹងអាចចាប់ដៃគូជាមួយនឹងប្រទេសអូស្ត្រាលីម្តងទៀតដើម្បីធ្វើជាសហម្ចាស់ផ្ទះការប្រកួតរបស់បុរសម្តង។
 

World Cup 2023 ក្នុងប្រទេសទាំងពីរស្ថិតក្នុងទ្វីបអូសេអានី ជាការប្រកួតលើកដំបូងដែលមានកំណែររចនាសម្ព័ន្ធការប្រកួតដែលមានក្រុមចំនួន ៣២ចូលរួម និងប្រទេសធ្វើម្ចាស់ផ្ទះចំនួន ២លើកដំបូងដូចគ្នា។ ការប្រកួត World Cup 2023 បានបំបែកកំណត់ត្រាមានអ្នកចូលទស្សនាច្រើនបំផុតលើសពីឆ្នាំ ២០១៩។
 

«យើងពិតជារីករាយនូវបទពិសោធន៍ចំពោះការរៀបចំការប្រកួតពានរង្វាន់ដែលបានកន្លងផុតទៅ។ យើងចង់បង្ហាញថាយើងគឺពិតជារៀបចំការប្រកួតបាល់ទាត់ពិភពលោកស្ត្រីល្អបំផុត ហើយវាជារឿងធម្មតាទេដែលនៅពេលណាមួយនៅពេលអនាគតយើងនឹងធ្វើជាម្ចាស់ផ្ទះ World Cup ផ្នែកបុរស។ »។ ​នេះបើតាមសម្តីរបស់នាយកប្រតិបតិ្តសហព័ន្ធបាល់ទាត់នូវែលសេឡង់លោក Pragnell។
 

គំនិតនៃការចង់ធ្វើជាម្ចាស់ផ្ទះនៃព្រឹត្តិការណ៍ World Cup បុរស ប្រទេសអូស្ត្រាលីក៏តែងតែចង់រៀបចំធ្វើម្ចាស់ផ្ទះដូចទៅនឹងនូវែលសេឡង់ ប៉ុន្តែប្រទេសស្ថិតក្នុងទ្វីបអូសេអានីគឺត្រូវការកីឡដ្ឋានឱ្យសមស្របទៅនឹងតម្រូវការរបស់ FIFA។ 
 

ការរៀបចំ World Cup បុរសបានទាមទាឱ្យកីឡដ្ឋានអាចរៀបចំការប្រកួតអាចផ្ទុកចំនួនមនុស្សចូលទស្សនាប្រមាណ ៤ម៉ឺននៅក្នុងការប្រកួតវគ្គចែកពូល និង ៦ម៉ឺននាក់នៅវគ្គពាក់កណ្តាល ផ្តាច់ព្រ័ត្រ ហើយ ៨ម៉ឺននាក់សម្រាប់វគ្គផ្តាច់ព្រ័ត្រ។
 

ការប្រកួត World Cup បុរសក្នុងឆ្នាំ ២០២៦ នឹងធ្វើឡើងនៅក្នុងប្រទេសចំនួន៣រួមគ្នា រួមមានប្រទេសអាម៉េរិក, កាណាដា និងម៉ិកស៊ិក៕