កីឡាអន្តរជាតិ
អន្តរជាតិ
De Bruyne នឹងអវត្តមានពីក្រុម Man City រយៈពេល៤ខែ
× Kevin De Bruyne អាចនឹងខកខានជួយក្រុម Manchester City រយៈពេល ៤ខែ បន្ទាប់ពីរូបគេបានរងរបួសសរសៃពួរនៅក្នុងជំនួបថ្ងៃបើកឆាកក្របខណ្ឌ Premier League រដូវកាល ២០២៣-២៤។ នេះបើតាមសម្តីលោក Pep Guardiola អ្នកចាត់ការទូទៅ Man City ក្នុងសន្និសិទមុនជំនួបទល់ក្រុម Sevilla ពានរង្វាន់ UEFA Super Cup។
Manchester City ជើងឯក Champions League នឹងត្រូវជួបប្រកួតតទល់ជាមួយនឹងក្រុម Sevilla ជើងឯកក្របខណ្ឌ Europa League សម្រាប់ប្រជែងពានរង្វាន់ UEFA Super Cup នៅរាត្រីថ្ងៃទី១៦ ខែសីហា វេលាម៉ោង២អាធ្រាត្រ។
De Bruyne នឹងគ្មានវត្តមានប្រកួតនៅក្នុងជំនួប UEFA Super Cup ឆ្នាំ២០២៣នេះទេ ដោយសាររបួស។ ខ្សែបម្រើសញ្ជាតិប៊ែលហ្ស៊ិកបានរងរបួសសរសៃពួ មុនពេលផ្លាស់ប្តូរចេញពីក្រុមនៅក្នុងនាទី៣៦ នៃការប្រកួតជ័យជម្នះរបស់ក្រុម Man City ៣-០ លើក្រុម Burnley កាលពីថ្ងៃទី១១ ខែសីហា នៃជំនួបបើកឆាកលីគកំពូលអង់គ្លេស។
«វាពិតជាធ្ងន់ធ្ងរ យើងត្រូវតែសម្រេចចិត្តលើការវ៉ះកាត់ ឬក៏មិនវ៉ះកាត់ ប៉ុន្តែគេក៏ត្រូវតែអវត្តមានក្នុងរយៈពេលប៉ុន្មានខែខាងមុខទៀត។ ការសម្រេចចិត្តលើការវ៉ះកាត់នឹងត្រូវធ្វើឡើង នៅក្នុងប៉ុន្មានថ្ងៃខាងមុខ ហើយគេក៏នឹងត្រូវសម្រាក ៣ ឬ៤ខែផងដែរ។»។ នេះបើតាមការលើកឡើងរបស់លោក Pep Guardiola។
ការប្រកួតរវាងក្រុម Man City ទល់នឹង Sevilla នឹងធ្វើឡើងនៅក្នុងទីក្រុង Athens សម្រាប់ជំនួបប៉ះគ្នាលើកដំបូងបំផុតនៃក្រុមទាំងពីរនៅការប្រកួត UEFA Super Cup។
ក្រុម Man City អាចនឹងរកបានពាននរង្វាន់តំបន់អឺរ៉ុបនេះលើកដំបូង ស្របពេលក្រុម Sevilla ធ្លាប់ជាម្ចាស់ជើងឯក UEFA Super Cup នេះចំនួន២លើក៕
Tag:
Kevin de Bruyne
Manchester City
© រក្សាសិទ្ធិដោយ thmeythmey.com