អន្តរជាតិ
ចិន ប្រាប់អាម៉េរិកឱ្យបញ្ឈប់ការគាំទ្រចំពោះឯករាជ្យភាពរបស់តៃវ៉ាន់
× ចិននៅថ្ងៃទី១៥ ខែសីហា បានចេញមកព្រមានអាម៉េរិកឱ្យបញ្ឈប់សម្មភាពគាំទ្រចំពោះឯករាជ្យភាពរបស់តៃវ៉ាន់ និងការរួមគំនិតជាមួយកងកម្លាំងផ្តាច់ខ្លួនឯករាជ្យតៃវ៉ាន់។ ការព្រមានរបស់ចិននេះ បានធ្វើឡើងបន្ទាប់ពីអនុប្រធានាធិបតីតៃវ៉ាន់លោក William Lai បានឈប់សម្រាកនៅទឹកដីអាម៉េរិកក្នុងដំណើរទស្សនកិច្ចទៅប៉ារ៉ាហ្គាយ។
អនុប្រធានាធិបតីតៃវ៉ាន់លោក William Lai បានធ្វើដំណើរទៅសប៉ារ៉ាហ្គាយដើម្បីចូលអបអរដល់ការឡើងកាន់តំណែងថ្មីរបស់ប្រធានាធិបតីប៉ារ៉ាហ្គាយ។ ក្នុងដំណើរនេះ លោក William Lai បានឈប់សម្រាកនៅទឹកដីអាម៉េរិក ដែលបង្កភាពមិនពេញចិត្តដល់ចិន។
បន្ទាប់ពីការឈប់សម្រាកនៅទឹកដីអាម៉េរិកនេះ អ្នកនាំពាក្យក្រសួងការបរទេសចិន លោក Wang Wenbin បានចោទថា អាជ្ញាធរអាម៉េរិក និងតៃវ៉ាន់បានរៀបចំឱ្យលោក Lai ចូលរួមសកម្មភាពនយោបាយនៅអាម៉េរិក ក្រោយលេសឈប់សម្រាកប្ដូរជើងយន្តហោះ។ អ្នកនាំពាក្យក្រសួងការបរទេសចិនរូបនេះក៏បានបន្ថែមថា ទង្វើនេះបានរំលោភយ៉ាងធ្ងន់ធ្ងរលើគោលការណ៍ចិនតែមួយ និងធ្វើឱ្យខូចដល់អធិបតេយ្យភាព និងបូរណភាពទឹកដីរបស់ចិនយ៉ាងធ្ងន់ធ្ងរ។
ដោយកត់សម្គាល់បញ្ហាតៃវ៉ាន់ជាស្នូលសំខាន់កំណត់ផលប្រយោជន៍ស្នូលរវាងចិន-អាម៉េរិក លោក Wang បានជំរុញឱ្យអាម៉េរិកគោរពតាមគោលការណ៍ចិនតែមួយ និងបទប្បញ្ញត្តិនៃសេចក្តីថ្លែងការណ៍រួមរវាងចិន-អាមេរិកចំនួនបី បំពេញការប្តេជ្ញាចិត្តរបស់ខ្លួនលើការមិនគាំទ្រក្រុមផ្តាច់ខ្លួនឯករាជ្យតៃវ៉ាន់ បញ្ឈប់គ្រប់ទម្រង់នៃទំនាក់ទំនងផ្លូវការរវាងអាម៉េរិក និងតៃវ៉ាន់ និងគោរពខ្ជាប់នូវគោលការណ៍ចិនតែមួយ។
លើសពីនេះ លោក Wang បានសង្កត់ធ្ងន់ថា ចិននឹងតាមដានយ៉ាងដិតដល់នូវការអភិវឌ្ឍ និងចាត់វិធានការយ៉ាងម៉ឺងម៉ាត់ និងរឹងមាំដើម្បីការពារអធិបតេយ្យភាព និងបូរណភាពទឹកដីរបស់ខ្លួន។
លើសពីនេះ ជាការឆ្លើយតបទៅនឹងការលើកឡើងរបស់លោក Lai ពីការមិនដកថយដោយសារការគំរាមរបស់ចិន លោកស្រី Zhu Fenglian អ្នកនាំពាក្យការិយាល័យកិច្ចការតៃវ៉ាន់របស់ចិន បានថ្កោលទោសការលើកឡើងរបស់លោក Lai និងព្រមានថា ទង្វើបែបនេះ នឹងនាំឱ្យតៃវ៉ាន់រងគ្រោះធ្លាក់ក្នុងភ្លើងសង្គ្រាម។
គួរបញ្ជាក់ថា ទាំងភាគីតៃវ៉ាន់ និងអាម៉េរិក បានអះអាងថា វត្តមានរបស់លោក Lai នេះគ្រាន់តែជាការឈប់សម្រាកធម្មតា និងប្រាប់ឱ្យចិនកុំមានប្រតិកម្ម ឬចាត់វិធានការបង្កហេតុណាមួយជាការឆ្លើយតប៕
© រក្សាសិទ្ធិដោយ thmeythmey.com