កីឡាអន្តរជាតិ
អន្តរជាតិ
Messi ថាឈ្នះពាន League Cup នឹងក្លាយជាកំណត់ត្រាដ៏អស្ចារ្យសម្រាប់ Inter Miami
× ខ្សែប្រយុទ្ធ Lionel Messi បាននិយាយថាការនាំក្រុម Inter Miami ឈ្នះពានរង្វាន់លើកដំបូងសម្រាប់ពួកគេនឹងក្លាយជាកំណត់ត្រាដ៏អស្ចារ្យសម្រាប់ក្រុមអាម៉េរិកមួយនេះ។ Messi ដែលធ្លាប់ឈ្នះពានរង្វាន់បាល់ទាត់កំពូលៗលើពិភពលោករួមទាំង World Cup ផង លើកឡើងដូច្នេះ មុនពេលត្រូវដឹកនាំ Inter Miami តទល់ Nashville SC នៅវគ្គផ្តាច់ព្រ័ត្រ។
Inter Miami ជាក្រុមស្ថិតនៅបាតតារាងនៃក្របខណ្ឌ Major League Soccer (MLS) Eastern Conference ហើយក៏ជារដូវកាលដ៏ពិបាកសម្រាប់ពួកគេក្នុងការប្រជែងដើម្បីអាចបន្តដំណើរទៅកាន់វគ្គបន្ទាប់។ ប៉ុន្តែចាប់តាំងពី Messi បានមកចូលរួមជាមួយក្រុមស្ថិតក្នុងប្រទេសអាម៉េរិក ក្រុមដែលមានម្ចាស់ជាអតីតកីឡាករដ៏ល្បី David Beckham ចាប់ផ្តើមបង្កើតរឿងរ៉ាវអស្ចារ្យជាបណ្តើរៗ។
កាលពេលថ្មីៗនេះ Inter Miami បានឡើងទៅកាន់វគ្គផ្តាច់ព្រ័ត្រ League Cup លើកដំបូងក្រោយពួកគេបានប្រកួតឈ្នះក្រុម Philadephia Union លទ្ធផល ៤-១។ ការប្រកួតនោះ Messi រកបានគ្រាប់បាល់ទី៩ របស់ខ្លួនសម្រាប់ Inter Miami។
ធ្វើដំណើរជាមួយនឹង Inter Miami បាន ៦ប្រកួតកន្លងមក Messi តែងចូលរួមចំណែកដ៏ធំនៅក្នុងក្រុម ដោយគេរកបានគ្រាប់បាល់ចំនួន ៩គ្រាប់ រហូតជួយក្រុមឡើងទៅដល់វគ្គផ្តាច់ព្រ័ត្រ ដែលការប្រកួតនឹងធ្វើឡើងនៅថ្ងៃទី២០ ខែសីហា ដោយត្រូវជួបតទល់ក្រម Nashville SC។ មុនការប្រកួតមកដល់ Messi បានប្រាប់អ្នកកាសែតថាការឈ្នះពាននៅ Miami នឹងក្លាយជារឿងដ៏អស្ចារ្យសម្រាប់រូបគេ និងអ្នកគាំទ្រក្លិប។
«មែនហើយ វាពិតជាមិនគួរឱ្យជឿមែនទេ? ទាំងសម្រាប់ខ្ញុំ និងគ្រប់គ្នាដែលបានគាំទ្រដល់ក្លិប។ សម្រាប់អ្នកគ្រប់គ្នាដែលបាននាំក្លិបទទួលបានឱកាសដ៏ធំមួយនេះ ព្រមទាំងបានជួយឱ្យក្លិបរីកចំរើន និងបាននាំក្រុមដល់ចំណុចកំពូលនៃពិភពលោក ការឈ្នះពានរង្វាន់ជារឿងសំខាន់បំផុត។ វាពិតជាគួរឱ្យចាប់អារម្មណ៍ខ្លាំងណាស់។»។ Messi បាននិយាយប្រាប់អ្នកកាសែតបែបនេះ។
ក្រោយពេលចំណាយពេលជាមួយក្លិប Paris Saint Germain ២រដូវកាល និងជួយក្រុមជម្រើសជាតិអាហ្សង់ទីនឈ្នះពានរង្វាន់ World Cup 2022 នៅប្រទេសកាតាកាលពីខែធ្នូ Messi បាននាំមកនូវជ័យជម្នះអំពីវប្បធម៍បាល់ទាត់ពីតំបន់អឺរ៉ុបទៅកាន់ក្រុម Inter Miami។
ក្លិប Inter Miami បានតែងតាំងគ្រូបង្វឹកលោក Gerardo Martino ឬ Tata កាលពីខែមុន បន្ទាប់មកក្រុមក៏បានចុះកិច្ចសន្យានាំយក Messi និងអតីតមិត្តរួមក្រុមរបស់ពួកគេ Jordi Alba និង Sergio Busquets បានជួយធានាកៅអីសម្រាប់ពានរង្វាន់ CONCACAF Champions League ជាមួយនឹងការប្រកួត League Cup វគ្គផ្តាច់ព្រ័ត្ររបស់ពួកគេ។ ក្រុមបញ្ចប់ចំណាត់ថ្នាក់កំពូលទាំង ៣ នៅ League Cup ឈ្នះកៅអីប្រកួតពានរង្វាន់ក្លិបកំពូលប្រចាំតំបន់អាម៉េរិកខាងជើង CONCACAF Champions League៕
Tag:
Lionel Messi
Inter Miami
© រក្សាសិទ្ធិដោយ thmeythmey.com