ខ្សែប្រយុទ្ធ Lionel Messi, Kevin De Bruyne និង Errling Haaland ត្រូវបានប្រកាសជាកីឡាករកំពូលទាំង៣ចុងក្រោយ ដែលត្រូវប្រជែងពានរង្វាន់កីឡាករឆ្នើមប្រចាំឆ្នាំ (UEFA Men’s Player of the Year 2022-23) ពីសំណាក់សហព័ន្ធបាល់ទាត់អឺរ៉ុប (UEFA) នាថ្ងៃទី១៧ ខែសីហា។
UEFA ថ្ងៃទី១៧ ខែសីហា បានប្រកាសអំពីឈ្មោះកីឡាករល្អៗចំនួន ៣រូប សម្រាប់ប្រជែងពានរង្វាន់កីឡាករល្អប្រចាំ ២០២២-២៣ របស់ស្ថាប័នបាល់ទាត់អឺរ៉ុបមួយនេះ ដោយផ្អែកលើទម្រង់លេងដែលកីឡាករទាំងនោះបានបង្ហាញនៅក្រុមរបស់ពួកគេព្រមទាំងនៅជម្រើសជាតិដូចគ្នា។ ការប្រកាសអំពីកីឡាករដែលឈ្នះពានរង្វាន់នេះ នឹងធ្វើឡើងនៅក្នុងថ្ងៃចាប់ឆ្នោតចែកពូលសម្រាប់ការប្រកួត UEFA Champions League រដូវកាល ២០២៣-២៤ ដោយធ្វើឡើងនៅថ្ងៃទី៣១ ខែសីហា ក្នុងទីក្រុង Monaco។
ស្ថិតក្នុងកម្មវិធីដែលមួយ UEFA ក៏នឹងផ្តល់នូវពានរង្វាន់សម្រាប់គ្រូបង្វឹកដ៏ល្អនៅក្នុងរដូវកាល ២០២២-២៣ ផងដែរសម្រាប់ពានរង្វាន់ UEFA Men’s Coach of the Year។ គ្រូបង្វឹកទាំង៣រូប ដែលមានឈ្មោះរួមមាន Pep Guardiola អ្នកចាត់ការ Manchester City, លោក Simone Inzaghi អ្នកចាត់ការ Inter Milan និង លោក Tamara Spalletti អ្នកចាត់ការ SSC Napoli។
កីឡាករដែលត្រូវពានរង្វាន់ UEFA Men’s Player of the Year ទាំង៣ ដែលទទួលបានការបោះឆ្នោតច្រើនជាងគេបង្អស់រួមមានខ្សែប្រយុទ្ធ Lionel Messi, ខ្សែបម្រើ Kevin De Bruyne និងខ្សែប្រយុទ្ធវ័យ២៣ឆ្នាំ Errling Haaland។
សម្រាប់ពានរង្វាន់ UEFA ទៅលើកីឡាករ និងគ្រូបង្វឹក ភាគច្រើនគឺមកពីក្រុម Manchester City ហើយហាក់បីដូចកំពុងគ្រប់គ្រងលើបញ្ជីបេក្ខភាពទាំងនេះផងដែរ។ Haaland, Kevin De Bruyne និង Pep Guardiola សុទ្ធសឹងតែជាបុគ្គលជាប់ឈ្មោះនៅលើបញ្ជីឈ្មោះចុងក្រោយរបស់ UEFA។
Haaland និង De Bruyne ឈរឈ្មោះជាមួយនឹងម្ចាស់ពានរង្វាន់ World Cup 2022 ខ្សែប្រយុទ្ធវ័យ ៣៦ឆ្នាំ បន្ទាប់ពីកីឡាករមិត្តរួមក្រុមទាំងពីរបានជួយក្រុមឈ្នះពានរង្វាន់ ៣ ក្នុងមួយរដូវកាល។ Haaland រកបាន ៥២គ្រាប់ ពី ៥៣ប្រកួតសម្រាប់ Man City ដែលជាកំណត់ត្រាថ្មីក្នុងរដូវកាលរបស់ Manchester City និងឈ្នះស្បែកជើងមាសថែមទៀត។
ទន្ទឹមនឹងនេះ De Bruyne ជាកីឡាករដែលបញ្ជូនបាល់ឱ្យមិត្តរួមក្រុមស៊ុតច្រើនជាងគេបំផុតនៅ Premier League និង Champions League ដោយគេបានបញ្ជូន ១៦ក្នុងលីគ និង ៧គ្រាប់ក្នុងការប្រកួតពានរង្វាន់ដទៃទៀត។
សម្រាប់ Messi រូបគេទទួលបានជោគជ័យក្នុងការកាន់ពាន World Cup ដោយរកបាន ២គ្រាប់ក្នុងការប្រកួតចុងក្រោយទល់បារាំង នឹងបានជួយក្រុម PSG ឈ្នះពានរង្វាន់ Ligue 1 បន្ទាប់ពីបានស្វែងរកទម្រង់លេងល្អរបស់គេនៅក្លិបយក្សបារាំងមួយនេះ។
ទោះជាយ៉ាងណាកីឡាករទាំងបីរូបនេះនឹងត្រូវទទួលរង់ចាំការបោះឆ្នោតគាំទ្រជាបន្តទៀតដើម្បីអាចក្លាយជាបុគ្គលឈ្នះពានរង្វាន់កីឡាករល្អប្រចាំឆ្នាំរបស់ UEFA បាន៕